Atong mga Panimalay, Atong mga Pamilya
Ang Kasingkasing ni Lizochka
Ang tagsulat nagpuyo karon sa Belgium.
Paghulagway pinaagi ni Annie Henrie
Ang akong bana ug ako nagpamiyembro sa Simbahan didto sa Russia niadtong 1995 ug na-sealed pagkasunod tuig sa Stockholm Sweden Temple. Ang among duha ka batan-ong mga babaye na-sealed usab kanamo. Paglabay sa duha ka tuig kami napanalanginan og laing anak nga babaye, si Lizochka. Ang among kinabuhi maayo ra og dagan. Kaming tanan malipayon. Apan duha ka adlaw human sa iyang pagkahimugso, ang among anak naglisud sa pagkaon. Sa usa ka bulan nadungangan ang iyang timbang og 300 lang ka gramo.
Ang mga kawani sa children’s medical center misulti namo nga mas kanunay siyang pakan-on. Akong nakita nga siya gustong mokaon apan dili makakaon. Sa katapusan, gipabalhin siya sa akong bana ngadto sa ospital sa siyudad. Diha-diha dayon ang doktor misulti namo sa iyang paghiling—adunay depekto ang iyang kasingkasing sa pagkahimugso. Usa ka balbula sa kasingkasing wala molihok, ug ang hinay nga dagan sa dugo ngadto sa iyang baga nakapalisud kini sa iyang pagginhawa o pagkaon.
Kinahanglan siyang operahan, apan sa Russia ang pinakabata nga na-operahan niini kay dos anyos. Ang among anak usa pa lang ka bulan. Ang doktor miresita og tambal para kaniya ug miingon nga sa dili madugay, inigka dako niya, sila mo-opera kaniya.
Paglabay sa usa ka bulan, migrabe pag-ayo ang sakit ni Lizochka, ug amo siyang gidali pagdala sa ospital. Gikugos nako siya samtang naa mi sa sakyanan. Siya mitan-aw nako ingon og nangamuyo og tabang. Kon dili pa ko miyembro sa Simbahan, wala ko masayud unsay buhaton. Apan ang akong bana ug ako misalig sa Ginoo ug hugot nga mituo nga ang tanan mamaayo ra. Naningkamot ko nga mapakalma siya, nag-ingon, “Ayaw kahadlok, akong palangga. Ang Dios nahigugma kanato. Siya motabang kanato, ug ang tanan ma-OK ra.”
Sa katapusan miabut mi. Gigunitan nako siya, midagan ko sa admitting division. Ang mga mata ni Lizochka misugod na sa pagpiyong. Siya naglisud sa pagginhawa. Hapit dili makasulti, akong gisultihan ang usa ka doktor kabahin sa akong anak, ug ang mga kawani sa medikal midala niya ngadto sa intensive care unit. Ang doktor miingon nga ang iyang baga misugod sa paghubag, ug ila siyang gikonekta sa artificial-respiration machine.
Pagkasunod adlaw nakig-istorya mi sa direktor sa cardio surgery division. Siya miingon, “Ako nakahimo niining operasyon pero sa mas magulang nga mga bata. Pila na siya ka tuig karon?”
“Duha ka bulan,” gisultihan namo siya.
“Siya nasakitan na og maayo. Gamay siya kaayo, ug ang paghubag sa iyang baga nakapakomplikado niini, apan dili na nato kini langay-langayon. Wala pa ko makahimo niini nga operasyon sa gamayng bata. Himoon nako kutob sa akong mahimo. Kinahanglan mo nga mopalit og artificial double valve, apan mahal kini kaayo—mga $2,100. Ang operasyon himoon inig upat ka adlaw.”
Unsay among buhaton? Kami ni bisan kinsa nga among kaila walay ingon niana nga kantidad. Hinoon, nasayran sa uban ang among sitwasyon, ug pinaagi sa ilang kamahinatagon ug kalooy sa Ginoo among nalikom ang gikinahanglang pundo. Gipalit sa akong bana ang among gikinahanglang balbula aron maluwas ang kinabuhi sa among anak.
Dili lang ang tanan nga mga kaigsoonan sa among branch ang nag-ampo ug nagpuasa para sa among gamay nga anak apan mao usab ang mga misyonaryo ug daghang mga Santos sa Ulahing mga Adlaw sa tibuok siyudad. Among nabati ang ilang suporta. Naglingkod sa pasilyo sa adlaw sa operasyon, among nabati ang Espiritu Santo ug ang pag-ampo sa among mga kaigsoonan. Kami nasayud nga sila anaa duol kanamo! Ug ang Dios uban kanamo, naggiya sa mga nag-opera. Siya dili mobiya kanamo, ug ang tanan mamaayo ra.
Sa dihang migawas ang nag-opera human sa operasyon, siya, daw naglibug, miingon namo, “Nagmalampuson kini. Among nabutang ang balbula. Wala ko masayud kon sa unsang paagi, apan kini milampos.” Apan nasayud mi kon sa unsang paagi kini milampos. Ang Langitnong Amahan mipanalangin kaniya.
Si Lizochka nagpabilin sa ospital og tulo pa ka adlaw samtang mikupos ang hubag sa iyang kasingkasing ug baga. Siya gihiwaan ug gitabunan lang og nipis nga mimbrana, ug pipila ka adlaw ang milabay gioperahan siya pag-usab aron isira iyang dughan ug mga organ. Hapit walay usa sa mga doktor nagtuo nga siya mabuhi. Apan kami nagtuo sa Langitnong Amahan ug sa Iyang gahum, ug kami nagtuo nga kon kini Iyang kabubut-on, siya maayo.
Bugtong ang Dios lang ang naghatag namo og balik sa among Lizochka. Sa matag adlaw, siya nag-anam-anam og kaayo. Gipabilin siya sa ospital og laing bulan, ug karon siya anaa na sa balay uban kanamo.
Ang Dios usa ka Dios sa mga milagro. Siya naminaw sa atong mga pag-ampo, ug atol sa atong kalisdanan, Siya nagsuporta kanato. Ang mga pagsulay makapalig-on sa atong pagtuo ug nagtudlo kanato nga motuo, molaum, ug mohigugma.