Unsaon sa Pagpangutana og mga Pangutana Nga Importante

Ni David A. Edwards

Mga Magasin sa Simbahan

Ang pagpangutana sa saktong mga pangutana makatabang nga maabli ang mga kasingkasing sa mga tawo ngadto sa usa ka pagpamatuod sa kamatuoran.

Kamo adunay mga oportunidad sa pagtudlo sa tanan nga naglibut kaninyo, bisan sa usa ka minuto nga panag-istoryahanay diha sa bus, sa usa ka leksyon sa simbahan, sa online nga mga komentaryo, o sa usa ka lawom nga tinagsa nga diskusyon uban sa usa ka higala.

Mao nga ania ang usa ka tip sa epektibo nga pagtudlo sa bisan unsa nga sitwasyon: pangutana.

Ang maayo nga mga pangutana mosangpot ngadto sa maayo nga pagkat-on, ug ang pagpangutana og maayo nga mga pangutana mao ang usa ka butang nga inyong matun-an, mabansay, ug makat-unan pag-ayo. Ania kon unsaon.

Pangutana og mga Pangutana Nga Importante

Ang mga pangutana nga importante mao ang mga pangutana nga makahimo ninyo sa paghunahuna ug pagbati pag-ayo, kadtong mogiya ninyo ngadto sa kamatuoran, pagpamatuod, ug kausaban. Kini dunay daghang mga hilisgutan, apan sa kasagaran kini dunay pipila ka mga butang nga komon: (1) kini dili taphaw o pinasikad lang sa hitabo (bisan tuod kini mahimong usa ka follow-up sa mga pangutana nga pinasikad sa hitabo), (2) kini adunay pipila ka koneksyon sa atong kinabuhi matag adlaw, ug (3) kini naghagit nato sa paghatag og mas labaw pa kay sa usa ka inandam nga tubag.

Hinumdumi Nganong Kita Mangutana

Ang mga pangutana makadasig nato pinaagi sa pagpaila og usa ka kakulang nga gustong pun-an sa atong hunahuna. Sa piho nga paagi, ang pagpangutana nga makaagni og personal nga pagpamalandong makapahimo sa mosunod nga proseso nga mahitabo:

1. Ang mga tawo mainteresado sa unsay inyong gisulti.

2. Gamiton nila ang ilang kabubut-on sa paghunahuna ug sa pagtubag.

3. Kini nga paggamit sa kabubut-on nagtugot sa Espiritu Santo nga mopamatuod ngadto kanila sa kamatuoran.¹

Uban niini nga proseso sa hunahuna, kamo makakuha og pagbati unsa nga matang sa mga pangutana nga ipangutana ug hain ang likayan.

Pananglitan: Imbis mangutana lang, “Ngano nga ang pagbasa sa mga kasulatan importante?” mahimo kamong mangutana, “Sa unsang paagi nga ang pagtuon sa kasulatan nakahimo og kalainan sa inyong kinabuhi?”

Hinumdumi nga Kamo Nagtudlo og mga Tawo, Dili Lamang mga Leksyon

Kon kamo nakaila sa mga tawo nga inyong gitudloan ug naghunahuna mahitungod sa ilang mga panginahanglan, kamo mopili sa mga pangutana nga gitumong sa pagtabang kanila, dili lamang mahisgutan ang piho nga mga ideya.

Pananglitan: Imbis mangutana lang, “Unsa ang mga lakang sa proseso sa paghinulsol?” mahimo kamong mangutana, “Unsaon ninyo pagtarung sa mga butang kon kamo nasayud nga nakabuhat kamo og sayop?”

Pagtuon ug Paghunahuna Pag-ayo

Sa pag-andam sa pagtudlo sa ebanghelyo, pagtuon sa mga kasulatan ug sa mga pagtulun-an sa modernong mga propeta ug mga apostoles, ug pag-ampo aron ang Espiritu Santo mouban kaninyo ug niadtong inyong gitudloan (tan-awa sa D&P 42:14; 50:21–22).

Usab, kon gusto kamong mangutana sa mga tawo nga makapahunahuna gyud kanila, kamo mismo kinahanglang mobuhat sa samang matang sa paghunahuna. Pamalandongi unsay inyong gitun-an. Inyong mamatikdan nga ang inyong gihunahuna pag-ayo mao ang mga pangutana nga inyong gipangutana samtang kamo nagtuon. Hatagi og pagtagad ang mga matang sa mga pangutana nga makapahunahuna ninyo pag-ayo. Mao kini ang mga pangutana nga mogiya ngadto sa mas lawom nga pagsabut ug pagpamatuod, ang sama nga mga matang sa mga pangutana nga inyong ipangutana kon kamo nagtabang sa uban sa pagkat-on sa ebanghelyo.

Pananglitan: Imbis mangutana, “Unsaon nato nga makaangkon og gugmang putli?”mahimo kamong mangutana, “Sa inyong hunahuna unsa ang gipasabut sa Moroni 7:48 sa dihang miingon kini sa pag-ampo alang sa gugmang putli ‘uban sa tibuok kusog sa kasingkasing’?”

Padayon ngadto sa mas Lisud nga mga Pangutana

Usahay labing maayo nga hinay-hinay nga mopadulong sa mga pangutana nga nagkinahanglan og dugang nga mga paghunahuna ug mga pamalandong sa kaugalingon, mao nga mahimo kamong mangutana og pasiuna nga pangutana nga sayon tubagon ug dayon sundan og usa o daghan pang mga pangutana nga mogiya ngadto sa mas hunahunaon nga tubag. Ania ang pipila ka yanong mga ehemplo:

Pasiuna nga Pangutana	Follow-up nga Pangutana
Pilay edad ni Joseph Smith sa dihang miadto siya sa Sagradong Kakahoyan?	Kanus-a kamo nag-ampo ngadto sa Langitnong Amahan uban sa matang sa kasinsero nga tinguha sama kang Joseph?
Nagtuo ka ba sa Dios?	Unsay papel sa Dios sa inyong kinabuhi?
Unsay inyong nahimo sa pagserbisyo sa uban sa bag-ohay lang?	Sa unsang paagi nga ang pagkahibalo nga kitang tanan mga anak sa Dios makapausab sa paagi nga kamo maghunahuna mahitungod sa pagserbisyo?

Kon kamo nagtinguha sa giya sa Espiritu Santo samtang kamo mangutana, kamo mahimong mas makapangutana sa husto nga pangutana sa sakto nga panahon. Dili gayud kamo makahibalo. Basin makapausab kini sa kinabuhi sa usa ka tawo.

Mubo nga sulat

1. “Kinahanglan kamong mogamit sa inyong kabubut-on sa pagtugot sa Espiritu sa pagtudlo kaninyo” (Richard G. Scott, “Aron Makabaton og Espirituhanong Giya,” Liahona, Nob. 2009, 8).

Mga Leksyon sa Dominggo

Hilisgutan niining Bulana: Pagkahimong Mas Sama kang Kristo

Mga Tip sa Pagpangutana

• Paghulat sa tubag.

• Paggamit og follow-up nga mga pangutana sa pagdasig og lawom nga paghunahuna.

• Paglikay sa mga pangutana nga makamugna og kontrobersiya o makaawhag og mga panaglalis.

• Usahay pangutana og makaawhag og hilom nga pagpamalandong.

Alang sa dugang nga mga tip sa pagtudlo, tan-awa ang Pagtudlo, Walay Labaw ka Mahinungdanon nga Tawag: Usa ka Giya nga Kapanguhaan alang sa Pagtudlo sa Ebanghelyo (1999), 69–70.

Apil sa Pag-istoryahanay

Mga Butang nga Pamalandungon sa Dominggo

• Aduna bay nangutana kaninyo nga nakapahimo ninyo sa pagkat-on pa og dugang sa ebanghelyo o sa pag-usab sa inyong kinabuhi?

• Sa unsang paagi ang Manluluwas migamit og mga pangutana kon Siya magtudlo?

Mga Butang nga Mahimo Ninyong Buhaton

• Samtang kamo magtuon sa kasulatan niining semanaha, pagsulat og lista sa pipila ka mga pangutana nga inyong mahunahunaan.

• Sa simbahan, pangutana isip kabahin sa panaghisgutan sa klase.

Paghulagway sa mga himan ni Sergey Markov/Hemera/Thinkstock; paghulagway sa ulo pinaagi sa johavel/iStock/Thinkstock

Paghulagway sa mga kamot pinaagi sa ilyast/iStock/Thinkstock