Makadani Kaayo nga Hilo

Alison L. Randall, Utah, USA

Sa dihang migawas ko sa atubangang pultahan aron kuhaon ang pamantalaan, nakakita ko og dili maayong talan-awon. Usa ka pulahon nga bundo sa mga fire ant ang naporma pagkagabii, nag-anam og kataas diha sa kal-ang sa nataran ug sa daplin sa karsada.

Bisan tuod ang akong bana ug ako dili pa lang dugay nagpuyo sa Texas, USA, nasayud ko gikan sa masakit nga kasinatian nianang sakit nga pinaakan sa hulmigas, dili ang ilang kolor, maoy naghatag kanila niana nga angga. Miadto ko sa garahian, kon asa namo gitagoan ang pangpatay sa mga insekto. Dayon gibasa nako ang mga instruksyon sa label.

“[Kini nga pangpatay sa insekto] grabe gyud nga makadani sa mga fire ant,” mabasa niini. “Dalhon nila kini sa ilang bundo, ipakaon sa ilang reyna, ug ang kolonya sa hulmigas mamatay.” Ang label miingon nga mosablig og pipila ka grano niini ibabaw ug libut sa bundo. Ang mga hulmigas na ang motiwas niini.

Nagduha-duha ko. Ang mga fire ant ingon og wais para nako, nakahimo og bundo sa usa lang ka gabii. Nagduhaduha ko nga sila mailad sa dili mailhan nga hilo, apan ako ra gihapong gisablig kini.

Pagkataud-taud akong nakita ang bundo nga daghang naglihok. Nagpalayo ko apan miduko aron tan-awon ang kaguliyang. Sila napuno sa kalipay nga ingon og nag-ulan lang og mana gikan sa langit. Ilang gidala ang puting mga grano sa ilang gagmayng mga pa-ak [pincers] ug nagdali-dali pag-ayo aron madala ang hilo ngadto sa ilang bundo.

Nagtan-aw ko nga nahingangha. Andam silang modala og hilo sa ilang panimalay. Klaro, ang mga pulong nga “grabe gyud nga makadani” dili hinambog. Sa usa ka paagi ang kompanya niining pangpatay og insekto nakahimo sa usa ka butang nga dili maayo—gani makamatay pa—nga maayo kaayo tan-awon.

Wala pa gyud ko makakita og mas impresibong ehemplo nga ang makadaut mahimo nga maanindot tan-awon. Naghunahuna ko kon sa unsang paagi si Satanas maghimo sa samang butang. Nahupay ko nga nakaamgo nga bisan tuod siya mosablig sa iyang dili mailhan nga hilo palibut sa akong panimalay, dili niya kini madala sa sulod—gawas kon akong tugutan. Busa unsaon nga dili kini makasulod?

Nakahinumdom ko sa usa sa akong paborito nga kasulatan: “Kay tan-awa, ang Espiritu ni Kristo gihatag ngadto sa matag tawo, siya masayud sa maayo gikan sa dautan.” Uban nianang Espiritu, si Mormon mipasabut nga, kita “mahimo nga masayud uban sa usa ka hingpit nga kasayuran” kon ang usa ka butang iya sa Dios o ni Satanas (Moroni 7:16).

Kadto nga kasinatian sa pagtan-aw niadtong nangamatay nga mga hulmigas mipuno nako og pasalamat nga ang akong bana ug ako makahukom ug makasigurado kon tugutan ba namo nga mosulod ang usa ka butang sa among panimalay. Ang among buluhaton mao ang pagtudlo sa among mga anak sa pagsunod sa Espiritu ni Kristo aron sila usab makaila sa hilo kon makasugat sila niini.

Samtang nagduko ko, nagtan-aw niadtong mga insekto nga mibalhin sa tanang grano ngadto sa ilang bundo, nanumpa ko nga akong buhaton ang tanan nakong mahimo nga dili makasulod ang hilo sa akong panimalay.

Ang label miingon nga mosablig og pipila ka grano niini ibabaw ug libut sa bundo. Ang mga hulmigas na ang motiwas niini.