Pagkat-on og Dugang mahitungod sa Unsay Giandam
Ang tagsulat nagpuyo sa Oslo, Norway.
Ang mga kabatan-onan sa Oslo, Norway, migahin og usa ka adlaw sa pag-andam alang sa kinabuhi isip usa ka full-time nga misyonaryo.
Imahe sa mga kwadro pinaagi ni lukas_zb/iStock/Thinkstock
Sukad gipahibalo ni Presidente Thomas S. Monson ang kausaban sa edad sa misyonaryo nga pagserbisyo, ang kabatan-onan sa tibuok Simbahan mahinamong mitubag dili lamang sa imbitasyon sa pagserbisyo apan usab sa imbitasyon sa pagpangandam sa pagserbisyo. Ug ang usa ka paagi sa pag-andam mao ang pagkat-on og dugang mahitungod unsay giandam kon kamo usa ka full-time nga misyonaryo.
Ang ubang kabatan-onan sa Norway mao gayud ang gibuhat atol nianang tibuok adlaw nga “Misyonaryo nga Kasinatian” nga gipasiugdahan sa Fredrikstad Ward sa Oslo Norway Stake.
Pagsulod sa “MTC”
Ang kabatan-onan nagpundok sa meetinghouse sa usa ka kwarto nga nagrepresentar sa missionary training center. “Nakadawat kami og buluhaton sa pagkat-on mahitungod sa usa ka nasud,” miingon si Jakob R. sa Moss Ward. “Kini naghatag kanamo og pagbati unsay bation nga makadawat og tawag sa misyon ug masayud nga kamo mahimo nga pagatawgon ngadto sa usa ka dapit nga lahi sa unsay inyong naandan.”
Ang Pakighimamat sa “Presidente sa Misyon”
“Dayon miadto kami sa sunod nga pultahan aron makigkita sa usa ka returned missionary kinsa maoy midala sa papel sa presidente sa misyon,” miingon si Simon W. sa Oslo Ward. Ang returned missionary ug laing mga returned missionary mihisgot mahitungod sa unsay mapaabut samtang nagserbisyo og misyon. “Ako makaingon nga nindot nga makat-on gikan sa mga returned missionary unsay mapaabut atol sa usa ka full-time nga misyon,” miingon si Simon. Ang mga partisipante nakadawat usab og name badge, giparesan og usa ka kompanyon, ug gitudloan nga makig-uban sa ilang kompanyon sa tanang panahon.
Pagpalambo og mga Kahanas
Ang mga workshop mitudlo sa kabatan-onan kabahin sa pagpalambo sa espirituhanong paagi apan usab mahitungod sa pagdumala sa temporal nga mga panginahanglan sama sa pagpanglaba, pagsunod og badyet, ug sa pagpabilin nga anaa sa maayong pisikal nga kondisyon.
“Ako ganahan kaayo sa workshop kabahin kon unsaon sa pagsugod og panagsultihanay sa ebanghelyo,” miingon si Inger Sofie J. sa Oslo Ward. “Kana usa ka butang nga mahimo nakong sugdan karon dayon.”
“Nalingaw ko nga maghisgot kon unsaon sa paggamit sa Isangyaw ang Akong Ebanghelyo,” miingon si Karl Frederik O. sa Fredrikstad Ward. “Kanunay kong nagtuo nga ang mga misyonaryo dunay ilang kaugalingong listahan sa mga kasulatan nga kat-unan, apan akong nahibaloan nga unsay akong gibuhat sa seminary makatabang kanako isip usa ka misyonaryo ug mao usab ang unsay akong gitun-an na sa Isangyaw ang Akong Ebanghelyo.”
Daghang batan-ong mga lalaki miingon nga usa sa labing halandumon nga mga workshop naglakip sa mga kasinatian sa pagplantsa og puti nga polo. “Nagpahinumdom kini nako nga dunay daghang praktikal nga mga kahanas nga akong makat-unan aron makaandam alang sa full-time nga misyon,” miingon si Jakob.
“Akong nakat-unan nga dunay daghan nakong mahimo karon sa pag-apil sa full-time nga mga misyonaryo nga nagserbisyo dinhi aron kaming tanan kabahin sa samang team,” miingon si Sarah R. sa Sandvika Ward. “Ang mga miyembro mga misyonaryo usab.”
Isip usa ka pahinumdom nga ang mga misyonaryo nagserbisyo sa tibuok kalibutan, ang mga snak gikan sa resipe sa laing-laing mga kanasuran. “Nagpahinumdom kana nako nga ako kinahanglan mosulay og bag-ong mga pagkaon karon aron ako maanad og kaon sa mga wala nako masulayi. Kana makatabang nako nga dali maka-adjust kon ako tawagon sa usa ka dapit diin sila mokaon og pagkaon nga wala nako maandi,” miingon si Simon.
Pagpangandam
“Sa pagtapos sa adlaw, human kami makadungog sa mga pagpamatuod sa duha sa mga kabatan-onan ug duha ka bag-ong returned missionary, kami mikanta sa himno nga ‘Called to Serve,’ miingon si Liss Andrea O. sa Fredrikstad Ward. “Mibati ko nga kon ako magsige og kanta niini nga himno sa tanang panahon, pirme akong mapahinumduman nga kita mga misyonaryo, kita nagserbisyo sa Langitnong Amahan ug Siya mopanalangin kanato.”
Pagkatapos sa adlaw, ang kabatan-onan sa stake nakasabut nga wala lamang sila mangandam alang sa usa ka full-time nga misyonaryo nga kasinatian apan nga sila makabaton og misyonaryo nga mga kasinatian karon ug sa ilang tibuok kinabuhi.