Mensahe sa Visiting Teaching
Ang Balaan nga Misyon ni Jesukristo: Tinapay sa Kinabuhi
Tun-i sa mainampuong paagi kini nga materyal ug tinguhaa nga masayud unsaon kini sa pagpakigbahin. Sa unsang paagi nga ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Detalye gikan sa Sa Paghandum Kanako, ni Walter Rane
Si Jesus miingon, “Ako mao ang buhing tinapay nga nanaug gikan sa langit: bisan kinsa nga mokaon niining maong tinapay, siya mabuhi sa dayon” (Juan 6:51). “Si Jesus nagtudlo kanato, Iyang mga disipulo, nga kinahanglan kitang motan-aw ngadto sa Dios sa matag adlaw alang sa pagkaon—sa tabang ug pagpatunhay—nga atong gikinahanglan nianang piho nga adlaw,” miingon si Elder D. Todd Christofferson sa Korum sa Napulog Duha ka mga Apostoles. “Ang pagdapit sa Ginoo … nagpakita sa usa ka mahigugmaong Dios, nga nahibalo bisan sa gagmay, inadlaw nga mga panginahanglan sa Iyang mga anak ug matinguhaon nga moabag kanila, sa matag usa. Siya nag-ingon nga makapangayo kita diha sa hugot nga pagtuo nianang Nilalang ‘nga nagapanghatag ngadto sa tanang mga tawo sa madagayaon gayud, ug sa walay pagpamoyboy; ug kini igahatag’ (Santiago 1:5).”1 Samtang kita makasabut nga si Jesukristo mohatag sa atong mga panginahanglan, kita modangup Kaniya para sa atong espirituhanon nga pagpatunhay.
Si Elder Jeffrey R. Holland sa Korum sa Napulog Duha ka mga Apostoles midapit kanato nga “moapil sa pagpanimpalad sa unang mga disipulo ni Kristo kinsa nagtinguha usab sa tinapay sa kinabuhi—kinsa wala mobalik apan miduol Kaniya, miuban Kaniya, ug miila nga para sa kasiguroan ug kaluwasan wala nay laing tawo nga ilang kadangpan.”2
Dugang nga mga Kasulatan
Gikan sa mga Kasulatan
Si Jesukristo nagtudlo og pundok sa katawhan nga sobra sa 4,000 ka mga tawo. Human sa tulo ka adlaw, Siya miingon ngadto sa Iyang mga disipulo: “Naluoy ako sa katawhan, [tungod kay] … wala silay makaon:
“Ug kon papaulion ko sila nga walay mga kaon, panguyapan sila sa dalan. …
“Ug kaniya mitubag ang iyang mga tinun-an nga nanag-ingon, Asa man kitag tinapay dinhi sa awaaw nga arang ikabusog niining maong panon sa katawhan?
“Ug [si Jesus] nangutana kanila, Pila ba kabuok ang inyong tinapay? Sila mitubag, Pito.”
Dayon Iyang “gikuha ang pito ka tinapay, ug sa nakapasalamat na siya, gipikaspikas niya kini, ug gihatag ngadto sa iyang mga tinun-an aron ilang idulot; …
“Ug dihay ilang pipila ka gagmayng isda: ug sa nakapanalangin siya niini, siya nagsugo nga idulot usab kini ngadto kanila.
“Ug sila nangaon, ug nangabusog: ug ilang gihipos ang mga tipik nga nahabilin nga mipuno sa pito ka mga alat [basket].” (Tan-awa sa Marcos 8:1–9.)