Siya Nahigugma Kanimo

Alice Victoria Weston-Sherwood, Arkansas, USA

Naglingkod ko sa suok sa celestial room duol sa organ atol sa pagpahinungod sa Memphis Tennessee Temple. Si Presidente James E. Faust (1920–2007), sakop sa Unang Kapangulohan gikan 1995 hangtud 2007, miabut aron sa pagpahinungod sa templo. Siya ug ang pipila ka mga lider naglingkod luyo sa mikropono. Usa ka lokal nga choir sa Simbahan misulod ug mibarug sa ilang luyo.

Usa ka batan-ong babaye nga akong gibisitahan usa sa miyembro sa choir. Sa tibuok miting, nag-ampo ko nga iyang madawat kon unsa ang iyang tuyo. Siya sekretong misulti nako nga siya miadto sa pagpahinungod sa templo niadtong adlawa aron masayud sa iyang relasyon sa Ginoo. Siya nakahimo og grabeng mga sala kaniadto, ug bisan tuod naghinulsol siya, nanlimbasug gihapon siya nga mobati og maayo sa iyang kaugalingon ug sa pagkanta diha sa choir.

Akong gitutokan si Presidente Faust, mibati nga siya, isip usa ka representante sa Ginoo diha sa Unang Kapangulohan, aduna gyuy buhaton. Apan unsaon nako pagsulti kaniya, ug sa unsang paagi makahimo siya og usa ka butang? Human sa miting, siya mogawas sa kwarto sa samang paagi nga siya misulod, ug walay mga pakig-ila-ila, walay pakiglamano, ug walay pakig-istorya. Ako nakasabut nga siya busy ug adunay mga gihan-ay nga pagbiyahe, apan nag-ampo gihapon ko.

Si Presidente Faust, namalandong pag-ayo, mitan-aw nako og kadiyot—ang iyang kilay nag-abut. Pagkahuman sa miting, malipayon ang iyang panagway nga puno sa kahayag.

Iya kong gitan-aw pag-usab ug dayon mibarug, milingi, ug mipatuy-od sa iyang bukton kutob sa mahimo. Direkta niyang gitudlo ang akong higala. Dayon lig-on ug kusog siyang miingon, “Ang Ginoo nahigugma kanimo!”

Ang gibuhat ni Presidente Faust gamay ug yano apan gamhanan kaayo nga kini mahimong moabut lang gikan sa Espiritu Santo nga nagdasig kaniya nga dili nako mabuhat. Kadtong pipila lang ka pulong mipanalangin sa akong higala ug nagpadayon sa paglig-on sa akong pagtuo nga ang Ginoo naghunahuna sa mga detalye sa atong kinabuhi ug “nga pinaagi sa gagmay ug yano nga mga butang ang mga dagko nga butang ipahinabo” (Alma 37:6).