Kami Namulong kang Kristo
Ang Jadeite Cabbage
Ang tagsulat nagpuyo sa Utah, USA.
Panahon sa akong misyon sa Taiwan, ang akong kompanyon ug ako migahin og gamayng panahon atol sa adlaw sa pagpangandam sa National Palace Museum sa Taipei. Ang labing importante nga piraso sa art didto mao ang Jadeite Cabbage. Daghan kaayong mga tawo ang nakadayeg niini, apan ang ako lang nakita mao ang usa ka cabbage nga gikulit sa jade. Nindot kini, walay pagduha-duha, apan tingali adunay usa ka butang nga wala nako makita.
Sa dihang nahuman na mi sa museyo, akong gipangutana ang akong kompanyon, “Unsay imong hunahuna kabahin sa Jadeite Cabbage?”
“Gusto kaayo nako kadto nga piraso sa art!”
“Ngano man?” nangutana ko. “Usa lang kini ka cabbage.”
“Nagpakatawa ka? Ang Jadeite Cabbage usa ka pasumbingay sa akong kinabuhi!” misulti siya.
“Ang cabbage?”
“Oo!” Wala ka ba masayud sa istorya?”
“Klarong wala.”
Iya kong gisultian sa istorya. Ug sakto siya. Kini nahimong pasumbingay sa akong misyon ug kinabuhi.
Aron ang kinulit nga jade adunay dakong bili, ang jade kinahanglang usa ra gyud ang kolor. Ang mga kinulit nga hinimo gikan sa hingpit nga jade ibaligya og mahal tungod kay hapit imposible nga makakita og hingpit nga jade. Ang Jadeite Cabbage kay berde sa usa ka tumoy ug puti sa pikas, ug kini adunay mga liki ug gansal-gansal. Walay hanas nga tigkulit ang mag-usik og panahon para niining jade, hangtud miabut ang tawo nga gitawag sa mga Chinese og gamhanang tigkulit.
Kon kining jade makasulti, mahunahuna nako ang ilang panag-istoryahanay niining bag-ong tigkulit. Akong mahunahuna nga gipunit sa tigkulit kining piraso sa jade.
“Unsay imong tuyo?” nangutana ang jade.
“Nangita ko og jade nga akong kuliton,” miingon ang tigkulit.
“Dayon pangita og laing piraso. Ako walay bili. Ako adunay duha ka kolor nga nagsagol gyud nga dili ka makabuwag niini. Ako adunay mga liki ug gansal-gansal. Wala gyud koy bili. Ayaw usiki ang imong panahon.”
“Ah, kataw-anan ka nga jade. Salig nako. Usa ko ka gamhanan nga tigkulit. Himoon tikaw nga usa ka obra maestra.”
Ang nakapahimong talagsaon sa Jadeite Cabbage mao ang wala mailhing gamhanan nga tigkulit migamit sa mga kahuyang sa jade—ang duha ka kolor, mga liki, ug mga gansal-gansal—sa paghimo sa cabbage nga daw mas may kinabuhi. Ang lagumon nga puti nga bahin nahimong pungango sa cabbage, ug ang mga liki ug gansal-gansal nakahatag og kinabuhi sa mga dahon. Kon dili pa tungod sa “mga kahuyang” niining jade, dili gyud unta ni ingon ka tinuod nga tan-awon.
Tungod sa katahum niining piraso sa art, kini nahimong gasa alang sa usa sa mga harianon sa China ug giadorno sa pasilyo sa nindot nga mga palasyo sa Asia hangtud nahamutang kini sa museyo sa Taiwan.
Kini nakapahinumdom nako sa Ether 12:27: “Kon ang mga tawo moduol ngari kanako Ako mopakita ngadto kanila sa ilang kahuyang. … Ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.”
Human akong nakita ang Jadeite Cabbage, kini nga kasulatan naghatag nako og bag-ong kahulugan. Kitang tanan sama niining piraso sa jade, apan kita anaa pa sa proseso nga gikulit. Kita kinahanglang mosalig sa gamhanan nga tigkulit, si Jesukristo, kinsa mokuha sa atong mga kahuyang ug himoon kining kalig-on. Kita, sa atong dili hingpit nga talan-awon, usahay mo-focus sa atong mga kasaypanan ug dayon masagmuyo tungod kay kita nagtuo nga kita dili makakab-ut sa gidahuman. Apan ang atong Manluluwas, si Jesukristo, nakakita nato kon unsa kita mamahimo. Samtang atong tugutan ang Iyang Pag-ula nga moepekto sa atong kinabuhi, Iya kitang hulmahon ngadto sa pagkaobra maestra kinsa mopuyo uban sa Hari sa mga hari sa umaabut.