Mensahe sa Unang Kapangulohan
Ang Pag-ampo nga may Hugot nga Pagtuo
Ni Presidente Henry B. Eyring
Unang Magtatambag sa Unang Kapangulohan
Ang pag-ampo sobra pa sa mga pulong nga atong gilitok ngadto sa Dios. Kini duha ka paagi nga komunikasyon tali sa Dios ug sa Iyang mga anak.
Kon kita nag-ampo gyud, atong ipahayag ang mga pagbati sa atong kasingkasing gamit ang yanong mga pulong. Ang Langitnong Amahan kasagarang motubag pinaagi sa paghatag nato og mga ideya inubanan sa mga pagbati. Siya kanunay maminaw sa matinud-anong pag-ampo nga atong gihalad kon kita mag-ampo uban sa pasalig nga mosunod Niya, bisan unsa pa ang Iyang tubag ug bisan kanus-a kini moabut.
Ang Ginoo mihimo niining saad ngadto sa tanan kinsa mobasa ug mag-ampo kabahin sa Basahon ni Mormon:
“Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.
“Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:4–5).
Kini nga saad sigurado. Minilyon ka mga tawo ang misulay ug mipamatuod niana nga talagsaong saad kabahin sa pag-ampo pinaagi sa pagdawat sa panalangin nga mipuno sa ilang mga kinabuhi uban sa mahangturong kalipay. Kana nga saad magamit sa tanan natong pag-ampo aron masayud sa hunahuna ug kabubut-on sa Dios para kanato. Ato kining magamit sa matag higayon nga kita makadawat og tambag gikan sa usa ka sulugoon sa Dios kinsa may katungod sa paggiya kanato. Sama pananglit, kita makasalig niini kon kita maminaw sa pakigpulong sa kinatibuk-ang komperensya. Ato kining magamit kon kita gitudloan sa mapainubsanon nga mga misyonaryo nga gitawag sa Dios pinaagi sa buhing propeta. Ingon man kini magamit sa tambag nga atong madawat gikan sa atong bishop o presidente sa branch.
Aron ang pag-ampo adunay epekto sa atong kinabuhi, ang mga lagda yano lang. Kita kinahanglan nga mangutana aron masayud sa tinuod pinaagi sa pag-ampo ngadto sa Amahan diha sa pangalan ni Jesukristo. Kita kinahanglan nga kinasingkasing nga mangutana, buot ipasabut nga kita adunay limpyong intensyon sa pagbuhat sa unsay gikinahanglan sa tubag sa Dios ngari kanato. Ug ang atong tinuoray nga intensyon nagagikan sa atong hugot nga pagtuo diha ni Jesukristo.
Ang investigator nga mobasa sa Basahon ni Mormon sa dili pa bunyagan ug kumpirmahan mahimong makadawat og kasiguroan nga ang basahon tinuod ug saksi nga si Joseph Smith mihubad niini pinaagi sa gahum sa Dios. Human nga makumpirmahan isip miyembro sa Simbahan, atong maangkon ang Espiritu Santo isip atong kompanyon aron pagpamatuod sa ubang kamatuoran. Dayon, kon kita mag-ampo nga may hugot nga pagtuo, kita makalaum nga ang Espiritu Santo mopamatuod kanato nga si Jesus mao ang Kristo, nga ang Dios nga Amahan buhi, ug nga Sila nahigugma kanato ug sa tanang anak sa Langitnong Amahan.
Mao kana ang usa ka rason nga adunay saad sa Basahon ni Mormon nga kita adunay gugma nga putli sa atong kasingkasing samtang ang Espiritu Santo mopamatuod kanato nga si Jesus mao ang Kristo: “Kon ang tawo magmaaghup ug magmapainubsanon sa kasingkasing, ug mokumpisal pinaagi sa gahum sa Espiritu Santo nga si Jesus mao ang Kristo, siya kinahanglan gayud adunay gugma nga putli” (Moroni 7:44).
Adunay dakong oportunidad nga motubo sa espirituhanong paagi matag Dominggo sa Pagpuasa. Ang Dominggo sa Pagpuasa makatabang kanato nga makasinati sama ni Alma ug sa mga anak nga lalaki ni Mosiah, kinsa nag-ampo ug nagpuasa aron masayud sa mahangturong kamatuoran aron sila makatudlo sa mga Lamanite uban sa gahum, awtoridad, ug gugma (tan-awa sa Alma 17:3, 9).
Sa Dominggo sa pagpuasa atong gihiusa ang pag-ampo ug pagpuasa. Alang sa pagpanalangin sa mga kabus, kita mohatag og ubay-ubay nga halad sa puasa ngadto sa bishop o presidente sa branch nga dili mominos sa kantidad sa duha ka kan-anan nga wala ta mokaon. Ang atong mga hunahuna ug pag-ampo i-focus ngadto sa Manluluwas ug niadtong Iyang buot nga kita moserbisyo pinaagi sa pagtubag sa ilang espirituhanon ug temporal nga mga panginahanglan.
Ang atong mga pag-ampo ug mga tinguha mahimong mas mahisama sa mga pag-ampo ug tinguha sa Manluluwas samtang kita magpuasa aron mahimong mas maaghup, matudloan, ug mahigugmaon. Ug sama sa Iyang gibuhat, kita mag-ampo aron masayud sa kabubut-on sa Amahan para kanato ug sa pagbuhat niini.