Ang Ebanghelyo sa Akong Kinabuhi
Ang Akong Pagpamatuod sa Ebanghelyo ug sa Basahon ni Mormon Konektado
Ang tagsulat nagpuyo sa Singapore.
Alang nako, ang kamatuoran sa ebanghelyo ni Jesukristo ug ang katinuod sa Basahon ni Mormon konektado. Kon ang ebanghelyo tinuod, nan ang Basahon ni Mormon tinuod.
Ang mga misyonaryo mitudlo sa akong pamilya sa ebanghelyo didto sa among panimalay sa Singapore. Ang akong amahan wala magpamiyembro sa Simbahan, apan ang akong inahan nagpamiyembro. Siya mitudlo kanamo kabahin ni Jesukristo ug sa Iyang ebanghelyo. Bisan bata pa, mapagarbuhong giingnan nako ang akong mga higala nga ako usa ka Santos sa Ulahing mga Adlaw.
Misalig ako kanunay sa mga pagtulun-an sa akong inahan. Apan sa dihang nahimo nakong usa ka young adult, usa ka misyonaryo nangutana nako kon kapila na nako nabasa ang Basahon ni Mormon. Gipangutana na ako niini kaniadto, apan niining higayona ako nakaamgo niana tungod kay ako wala makabasa sa Basahon ni Mormon, ako wala masayud kon tinuod ba kini.
Dili Ikalimod nga Kamatuoran
Ako dili na makalikay sa dili ikalimod nga kamatuoran: ang katinuod sa ebanghelyo ni Jesukristo ug ang katinuod sa Basahon ni Mormon konektado. Kon ang ebanghelyo tinuod, nan ang Basahon ni Mormon tinuod. Tungod kay wala ako masayud kon ang Basahon ni Mormon tinuod ba, dili na ko sigurado sa tanang butang nga akong gituohan. Ang kalibug mipuno sa akong hunahuna, ug ang pangutana—“Tinuod ba ang Basahon ni Mormon?”—nagpabilin sa akong kasingkasing.
Ang akong naglambo nga relasyon sa Manluluwas, nga si Jesukristo, migiya usab nako ngadto sa tinguha alang sa kamatuoran. Sa adlaw nga ako nakaamgo nga dili igo ang akong makat-unan mahitungod ni Jesukristo kon dili seryosong mobasa sa Basahon ni Mormon mao ang adlaw nga gitinguha nako og maayo nga masayud kon kini tinuod ba.
Gitawag isip usa ka Magtutudlo
Ako nag-ampo alang sa giya. Niining panahona, ang akong presidente sa branch mitawag kanako sa pagtudlo kabahin sa Basahon ni Mormon diha sa klase sa Doktrina sa Ebanghelyo. Gidawat nako ang calling tungod kay mibati ko nga kini mao tingali ang tubag sa Ginoo sa pagtabang kanako nga masayud sa kamatuoran sa Basahon ni Mormon ug mas mapaduol ngadto sa Manluluwas.
Ang pagtudlo lisud. Human sa unang pipila ka mga Dominggo, ako nasayud nga ako dili gayud mahimong epektibo hangtud nga ako motuo sa Basahon ni Mormon.
Ang mga Istorya Nasabtan sa Hinay-Hinay
Nagsugod ko sa pagtuon sa Basahon ni Mormon matag semana ug sa wala madugay nakakaplag og kalipay sa akong pagbasa. Ang mga istorya sa Basahon ni Mormon nasabtan sa hinay-hinay ug nakapaduol nako ngadto ni Jesukristo.
Akong nabasa ang pagkatawo ni Kristo, nga nakita ni Nephi sa usa ka panan-awon:
“Ug ako nakakita sa dakbayan sa Nazaret; ug diha sa dakbayan sa Nazaret ako nakakita sa usa ka birhen, ug siya hilabihan ka matahum ug kaputi. …
“Ug [ang anghel] miingon ngari kanako: Tan-awa, ang birhen nga imong nakita mao ang inahan sa Anak sa Dios, sumala sa kahimtang sa unod” (1 Nephi 11:13, 18).
Akong gibasa ang plano sa kalipay ug nakat-unan nga ang hugot nga pagtuo diha ni Jesukristo gikinahanglan alang sa atong kaluwasan. Si Amulek mitudlo:
“Ako nasayud nga si Kristo moanhi taliwala sa mga katawhan, aron sa pagdala diha kaniya sa mga kalapasan sa iyang mga katawhan, ug nga siya moula sa iyang dugo alang sa mga sala sa kalibutan; kay ang Ginoong Dios namulong niini.
“… Kay sumala sa mahinungdanon nga laraw sa Dios sa Kahangturan kinahanglan gayud nga adunay pag-ula nga pagahimoon, o kon dili ang tanan nga mga katawhan dili makalikay nga mamatay” (Alma 34:8–9).
Nabasa nako ang kabahin sa pagpangalagad ni Jesukristo sa Iyang laing mga karnero sa karaang Amerika, ug ako nasayud nga Siya mao ang Dios sa tanang nasud. Iyang gisultihan ang mga Nephite: “Kamo mao sila kinsa Ako miingon: Ako adunay lain nga karnero nga wala niini nga pundok; kanila usab Ako kinahanglan modala, ug sila maminaw sa akong tingog; ug adunay usa ka pundok, ug usa ka magbalantay” (3 Nephi 15:21).
Ang Akong Pagpamatuod Miabut sa Hinay-Hinay
Samtang ako nagbasa sa Basahon ni Mormon, ang akong hugot nga pagtuo kang Jesukristo misanag ug ang akong pagsabut sa Iyang plano milapad (tan-awa sa Alma 32:28).
Ako mopamatuod nga ang Basahon ni Mormon mao ang sukaranang bato sa atong relihiyon. Ang Espiritu Santo mipadayag kanako nga si Joseph Smith tinuod nga propeta kinsa mipahiuli sa Simbahan sa Dios dinhi sa yuta ug kinsa mihubad sa Basahon ni Mormon gikan sa mga palid nga bulawan. Ang Basahon ni Mormon nagpamatuod kang Jesukristo ug katimbang sa Biblia. Magkauban kini nga nagpamatuod nga si Jesukristo mao gayud ang Anak sa Dios ug nga Siya mao ang Dios sa tanang nasud, dili lamang sa usa.