Seia Tatou Toe Feiloai

Faiga Taufaasese

Saunia e Elder M. Russell Ballard

O Le Korama a Aposetolo e Toasefululua

Mai le “E! O Le Togafiti Poto a Le ua Leaga,” Liahona, Nov. 2010, 108–110.

Ata na tusia e J. Ken Spencer

O le tautoulu o se taimi fiafia faapitoa lea mo le au faifaiva i ‘ofe tā aua o le taimi lea e faaosofia ai i’avai i le fiaaai tele ma le faaloloto ina ia faamalolosia ai o latou tino mo le oge o meaai i le taumalulu.

O le sini a le faifaiva i ‘ofe tā o le maua lea o le i’a i se auala atamai taufaasese. E suesue e le faifaiva atamai ia amioga a i’avai, o le tau, o le tatafe o le vai, ma le ituaiga o iniseti e ’ai e i’a ma le taimi e fofoa ai na iniseti. E masani lava ona ia gaosia ia maunu na te faaaogaina. Na te iloa o nei iniseti fai o loo faamau i matau iti e manaomia ona atoatoa lona faafoliga taufaasese aua o le a iloa e le i’a e oo lava i sina sasi laitiiti, ona ia le ‘aina lea o le maunu.

O se mea mata’ina le matamata i se i’a o puna a’e mai le vai, ma u atu le maunu ma autafiti se’ia oo lava ina vaivai ma faaleleva ai. O le tauvaga, o le fetosoa’iga lea o le iloa ma le tomai o le faifaiva e feagai ai ma le i’a tautupu.

O le faaaogaina o maunu pa’u e faavalea ma pu’e ai se i’a, o se faataitaiga lea o le auala a Lusifelo e tele ina faaosooso ai, faaseseina ma taumafai e maileia ai i tatou.

E pei lava o le faifaiva i ‘ofe tā lea na te iloaina e ta’a’ina ia i’avai i le fiaai, o loo iloa foi e Lusifelo lo tatou “matelaina” po o vaivaiga ma tofotofoina i tatou i maunu taufaasese ia, afai e faaaogaina, e mafai ona faalavelaveina ai le filemu o o tatou olaga i ana faatosinaga lē alofa. Ma e le pei la o le tagata faifaiva lea na te pueina ma toe faasola le i’a i le vai e aunoa ma se manu’a, o le a lē manao lava Lusifelo e faamamulu. O lana sini ia malaia ē ua ia faaaafiaina ia pei lava o ia.

O se tasi o metotia autu o loo ia faaaogaina ia i tatou, o lona tomai e pepelo ai ma olegia ina ia faatalitonu ai i tatou e faapea e lelei le leaga ma e leaga le lelei. Talu mai lava le amataga i le Fono Sili i le Lagi, “na saili [Satani] e faaumatia le faitalia a le tagata, lea na tuu atu e A’u, o le Alii le Atua ia te ia” (Mose 4:3).

O le taua i le faitalia a le tagata na tuuina mai e le Atua o loo faaauau pea i le taimi nei. Ua i ai ia Satani ma ana au a latou maunu o loo siomia ai i tatou, ma le faamoemoe o le a tatou faavaivai ma ave ana maunu ina ia mafai ona ia pu’eina i tatou i auala taufaasese.

Uso e ma tuafafine, ia tatou faaeteete uma i maunu faafoliga ua tuuina mai ia i tatou e le faifaiva taufaasese o tagata, o Lusifelo lea. Ia tatou maua le poto ma le malamalamaaga faaleagaga e iloagofie ai ma teena le tele o ana mea matautia e tuuina mai.

Ma, mo outou ua faapologaina e soo se ituaiga o mea ua fai ma vaisu, o loo i ai se faamoemoe auā e alofa le Atua i Ana fanau uma lava, ma ona o le Togiola a le Alii o Iesu Keriso ua mafai ai mea uma.