Misyonaryo, Family History ug Buhat sa Templo
Ni Elder David A. Bednar
Sa Korum sa Napulog Duha ka mga Apostoles
Gikan sa usa ka pakigpulong nga gihatag sa seminar para sa bag-ong mga presidente sa misyon niadtong Hunyo 25, 2013.
Sa usa ka maligdong nga panagtigom nga gihimo sa Kirtland Temple niadtong Abril 6, 1837, si Propeta Joseph Smith miingon, “Human sa tanan nga nasulti, ang pinakadako ug pinakaimportante nga katungdanan mao ang pagsangyaw sa Ebanghelyo.”1
Paglabay sa pito gyud ka tuig, niadtong Abril 7, 1844, siya mipahayag: “Ang pinakadakong responsibilidad niini nga kalibutan nga gibutang sa Dios kanato mao ang pagsiksik sa atong mga patay. Ang apostol nag-ingon, ‘Sila nga wala kanato dili mahimong hingpit’ [tan-awa sa Mga Hebreohanon 11:40]; tungod kay kini gikinahanglan nga ang gahum sa pag-seal maanaa sa atong mga kamot aron sa pag-seal sa atong mga anak ug sa atong mga patay alang sa kahingpitan sa dispensasyon sa mga panahon—usa ka dispensasyon aron sa pagtagbaw sa mga saad nga gihimo ni Jesukristo sa wala pa ang katukuran sa kalibutan alang sa kaluwasan sa tawo.”2
Pipila ka mga indibidwal tingali naghunahuna kon sa unsang paagi ang pagsangyaw sa ebanghelyo ug ang pagsiksik sa atong mga patay mahimong dungan nga labing mahinungdanon nga mga katungdanan ug responsibilidad nga gisangon sa Dios ngadto sa Iyang mga anak. Ang akong tuyo mao ang pagsugyot nga kining mga pagtulun-an naghatag og gibug-aton sa panaghiusa ug panag-uyon sa buhat sa kaluwasan sa ulahing mga adlaw. Ang misyonaryo nga buhat ug family history ug buhat sa templo nagsuporta ug konektado nga mga aspeto sa usa ka mahinungdanon nga buhat, nga “Iyang gipadayag ang maong tuyo ingon nga usa ka laraw nga pagatumanon inig-abut sa tukma nga panahon, laraw sa paghiusa diha kang Kristo sa tanang mga butang, mga butang diha sa langit, ug mga butang dinhi sa yuta” (Mga Taga-Efeso 1:10).
Ako nag-ampo nga ang gahum sa Espiritu Santo motabang kaninyo ug kanako samtang kita dungan nga mokonsiderar sa kahibulongan nga buhat sa kaluwasan sa ulahing mga adlaw.
Mga Kasingkasing ug mga Ordinansa sa Priesthood
Ang pagsangyaw sa ebanghelyo ug pagsiksik sa atong mga patay duha ka balaang gitudlo nga mga responsibilidad nga may kalabutan sa atong mga kasingkasing ug mga ordinansa sa priesthood. Ang kahulugan sa buhat sa Ginoo mao ang pag-usab, pagpabati, ug pagpaputli sa mga kasingkasing pinaagi sa mga pakigsaad ug mga ordinansa nga gipahigayon sa tukma nga awtoridad sa priesthood.
Ang pulong kasingkasing gigamit kapin sa 1,000 ka mga higayon diha sa sumbanan nga mga kasulatan ug nagsimbolo sa kinahiladman nga pagbati sa indibidwal. Sa ingon, ang atong kasingkasing—ang suma total sa tanan natong mga tinguha, pagbati, intensyon, motibo, ug kinaiya—motino si kinsa kita ug unsa kita nga mamahimo.
Ang katuyoan sa Ginoo alang sa misyonaryo nga buhat mao ang pagdapit sa tanan sa pagduol ngadto kang Kristo, modawat sa mga panalangin sa gipahiuli nga ebanghelyo, ug molahutay hangtud sa katapusan pinaagi sa hugot nga pagtuo diha kang Kristo.3 Wala kita mopakigbahin sa ebanghelyo aron lang mosaka ang gidaghanon sa mga miyembro ug ang kalig-on sa Simbahan sa ulahing mga adlaw. Hinoon, kita nagtinguha sa pagtuman sa balaang gisangun nga responsibilidad sa pagsangyaw sa reyalidad sa plano sa Amahan sa kalipay, ang kabalaan sa Iyang Bugtong Anak, si Jesukristo, ug ang epekto sa maulaong sakripisyo sa Manluluwas. Ang pagdapit sa tanan nga “moduol ngadto ni Kristo” (tan-awa sa Moroni 10:30–33), makasinati og “dako nga kausaban” sa kasingkasing (tan-awa sa Alma 5:12–14), ug paghalad sa mga ordinansa sa kaluwasan ngadto sa mga mortal nga indibidwal nga wala pa mohimo og pakigsaad mao ang nag-una nga mga tumong sa pagsangyaw sa ebanghelyo.
Ang pagpahinabo sa kahimayaan sa mga buhi ug sa mga patay mao ang tuyo sa Ginoo sa pagtukod og mga templo ug sa pagpahigayon sa gitugyan [vicarious] nga mga ordinansa. Wala kita magsimba diha sa balaan nga mga templo aron lang makabaton og maanindot nga indibidwal o pamilya nga kasinatian. Hinoon, kita nagtinguha nga matuman ang balaanong gitakda nga responsibilidad nga mapahigayon ang mga ordinansa sa kaluwasan ug kahimayaan sa tibuok tawhanong pamilya. Ang pagtanom diha sa kasingkasing sa mga anak sa saad nga gihimo ngadto sa mga amahan, gani sila si Abraham, Isaac ug Jacob; pagpabati sa kasingkasing sa mga anak ngadto sa ilang mga amahan; ug pagsisik sa family history ug pagpahigayon sa gitugyan nga mga ordinansa ngadto sa templo mao ang mga paningkamot nga makapanalangin sa mga indibidwal nga anaa sa kalibutan sa espiritu nga wala pay pakigsaad.
Ang mga ordinansa sa priesthood mao ang dalan padulong sa gahum sa pagkadiosnon:
“Ug kining labaw nga pagkapari nangalagad sa ebanghelyo ug naghupot sa yawe sa mga misteryo sa gingharian, gani ang yawe sa kahibalo sa Dios.
“Busa, diha sa mga ordinansa niana, ang gahum sa pagka-diosnon gipakita.
“Ug kon walay mga ordinansa niana, ang pagtugot sa pagkapari, ang gahum sa pagka-diosnon dili mapakita ngadto sa mga tawo diha sa unod” (D&P 84:19–21).
Palihug ikonsiderar ang seryusong kahulugan niining mga bersikulo. Ang indibidwal kinahanglan moagi una sa ganghaan nga mao ang bunyag ug modawat sa gasa sa Espiritu Santo—ug dayon magpadayon sa unahan subay sa dalan sa mga pakigsaad ug mga ordinansa padulong sa Manluluwas ug sa mga panalangin sa Iyang Pag-ula (2 Nephi 31). Ang mga ordinansa sa priesthood mahinungdanon aron hingpit nga “[mo]duol ngadto kang Kristo, ug paghingpit diha kaniya” (tan-awa sa Moroni 10:30–33). Kon wala ang mga ordinansa, ang indibidwal dili makadawat sa tanang mga panalangin nga nahimong posible pinaagi sa walay kinutuban ug mahangturong pag-ula sa Ginoo (tan-awa sa Alma 34:10–14)—gani ang gahum sa pagka-diosnon.
Ang buhat sa Ginoo halangdon nga buhat nga naka-focus sa mga kasingkasing, mga pakigsaad, ug ordinansa sa priesthood.
Pagpasabut
Kining balaang doktrina nagsugyot og duha ka importante nga mga pagpasabut sa atong buhat diha sa Simbahan.
Una, tingali kasagaran atong gihatagan og sobra ra nga gibug-aton ang lain-laing mga kategoriya sa buhat sa kaluwasan ug ang nahilakip niini nga mga polisiya ug pamaagi. Nahadlok ko nga daghan kanato nag-focus lang og maayo sa partikular nga mga aspeto sa buhat sa Ginoo nga kita napakyas sa pagdawat sa hingpit nga gahum niining komprehensibo nga buhat sa kaluwasan.
Samtang ang Ginoo nagtinguha nga hiusahon ang tanang butang diha kang Kristo, mahimong atong gibahin-bahin ug gi-focusan ang pipila ka paagi nga mo-limit sa atong panabut ug panan-awon. Kon masobrahan, ang prayoridad mao na ang pagdumala sa mga programa ug pagpataas sa statistics kaysa pagdapit sa mga indibidwal nga takus nga mohimo og mga pakigsaad ug modawat sa mga ordinansa. Ang ingon niini nga paagi makapugong sa pagpaputli, sa hingpit nga kalipay, sa padayon nga pagkakabig, ug sa espirituhanong gahum ug proteksyon nga moabut tungod sa “pagtugyan sa [atong] kasingkasing ngadto sa Dios” (Helaman 3:35). Ang yanong pagbuhat ug makugihong pagtuman sa atong taas nga lista sa “buluhaton” sa ebanghelyo wala magpasabut nga kita nakadawat sa Iyang hitsura diha sa atong panagway o nakahimo og dakong kausaban sa kasingkasing (tan-awa sa Alma 5:14).
Ikaduha, ang espiritu ni Elijah mahinungdanon sa buhat sa pagsangyaw sa ebanghelyo. Tingali ang Ginoo naghatag og gibug-aton niining kamatuoran sumala sa han-ay sa mga panghitabo sa dihang ang kahingpitan sa ebanghelyo gipahiuli niining ulahing mga adlaw.
Sa Sagradong Kakahoyan, si Joseph Smith nakakita ug nakig-istorya sa Mahangturong Amahan ug ni Jesukristo. Kini nga panan-awon nagsugod sa “tukma nga panahon [dispensasyon sa kahingpitan sa panahon] (Mga Taga-Efeso 1:10) ug nakapasayud ni Joseph sa tinuod nga kinaiya sa Dios nga Kapangulohan ug sa nagpadayon nga pagpadayag.
Paglabay sa mga tulo ka tuig, agi’g tubag sa kinasingkasing nga pag-ampo sa gabii sa Septyembre 21, 1823, ang kwarto ni Joseph napuno sa kahayag hangtud nga kini “sama na sa udtong tutok” (Joseph Smith—Kasaysayan 1:30). Usa ka personahe mitungha sa kiliran sa iyang higdaanan, mitawag sa batang lalaki sumala sa ngalan, ug mideklarar nga “siya usa ka sinugo nga gipadala gikan sa atubangan sa Dios … ug ang iyang ngalan mao si Moroni (Joseph Smith—Kasaysayan 1:33). Siya mihatag og intruksyon ni Joseph kabahin sa pagtungha sa Basahon ni Mormon. Ug dayon mikutlo si Moroni gikan sa basahon ni Malaquias diha sa Daang Tugon, nga may gamayng kausaban sumala sa pinulongan nga gigamit sa King James Version:
“Tan-awa, Ako mopadayag nganha kaninyo sa Pagkapari, pinaagi sa kamot ni Elijah ang propeta, sa dili pa moabut ang mahinungdanon ug makalilisang nga adlaw sa Ginoo. … Ug siya motanom sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati ngadto sa ilang mga amahan. Kon dili pa ingon niini, ang tibuok kalibutan pagalaglagon sa hingpit sa iyang pag-abut” (Joseph Smith—Kasaysayan 1:38–39).
Sa katapusan ang mga instruksyon ni Moroni ngadto sa batan-ong propeta naglakip sa duha ka nag-unang tema: (1) ang Basahon ni Mormon ug (2) ang mga pulong ni Malaquias nga nanagna sa tahas ni Elijah sa pagpahiuli “sa tanang gisulti sa Dios pinaagi sa baba sa iyang balaang mga propeta sukad pa sa karaang kapanahonan” (Mga Buhat 3:21). Sa ingon, ang nag-una nga mga panghitabo sa Pagpahiuli mipadayag sa husto nga pagsabut sa Dios nga Kapangulohan, mi-establisar sa kamatuoran sa padayon nga pagpadayag, mihatag og gibug-aton sa kaimportante sa Basahon ni Mormon, ug nagpaabut sa buhat sa kaluwasan ug kahimayaan alang sa mga buhi ug sa mga patay.
Palihug ikonsiderar karon ang tahas sa Basahon ni Mormon sa pag-usab sa mga kasingkasing—ug sa espiritu ni Elijah sa pagpabati sa mga kasingkasing.
Ang Basahon ni Mormon inubanan sa Espiritu sa Ginoo mao “ang pinakamahinungdanong himan nga gihatag sa Dios ngari kanato sa pagkabig sa kalibutan.”4 Kining volume sa kasulatan sa Pagpahiuli mao ang sukaranang bato sa atong tinuohan ug mahinungdanon sa pagdala sa mga kalag ngadto sa Manluluwas. Ang Basahon ni Mormon mao ang lain nga tugon ni Jesukristo—mahinungdanon nga nagpamatuod nga saksi sa kabalaan sa Manunubos sa mga tawo nga nagkaanam ka kalibutanon ug kamatahapon. Ang mga kasingkasing mausab samtang ang mga indibidwal mobasa ug magtuon sa Basahon ni Mormon ug mag-ampo uban sa tinuod nga katuyoan nga magkat-on sa katinuod sa basahon.
Ang espiritu ni Elijah mao ang “pagpadayag sa Espiritu Santo nga nagsaksi sa balaanong kinaiyahan sa pamilya.”5 Kining walay sama nga impluwensya sa Espiritu Santo naghatag og gamhanang pagsaksi sa plano sa Amahan sa kalipay ug nagdasig sa mga tawo sa pagsiksik ug paghinumdom sa ilang mga katigulangan ug mga sakop sa pamilya—kaniadto ug karon. Ang espiritu ni Elijah makatandog sa mga miyembro ug dili miyembro sa Simbahan ug makapahimo sa mga kasingkasing nga mobati ngadto sa mga amahan.
Miabut na ang panahon para nato nga mas epektibong mopahimulos sa epektibong kombinasyon sa dakong kausaban sa kasingkasing, nahimong posible pinaagi sa espirituhanon nga gahum sa Basahon ni Mormon, ug ang pagpabati sa mga kasingkasing ngadto sa mga amahan, natuman pinaagi sa espiritu ni Elijah. Usa ka tinguha nga masumpay sa atong katigulangan makaandam sa indibidwal nga makadawat sa hiyas sa pulong sa Dios ug molig-on sa iyang pagtuo. Ang kasingkasing nga mobati ngadto sa mga amahan makatabang sa indibidwal nga makabuntog sa impluwensya sa kaaway ug makalig-on sa pagkakabig.
Tan-awa ang ikaduha nga video aron makita ang istorya nga naghulagway niining baruganan.
Mga Baruganan
Gusto ko karon nga mo-ila sa upat ka mga baruganan kabahin sa espirituhanong gahum nga miresulta sa pag-usab ug pagpabati sa mga kasingkasing.
-
Mga kasingkasing ug pagkakabig. Ang pagbati ngadto sa mga amahan makapukaw ug makaandam sa kasingkasing alang sa dako nga kausaban. Sa ingon, ang espiritu ni Elijah makatabang sa pagkakabig.
Tan-awa ang ikatulo nga video aron makita ang istorya nga naghulagway niining baruganan
4:33 -
Mga kasingkasing ug retensyon. Ang pagbati ngadto sa mga amahan makatabang ug makalig-on sa mga kasingkasing nga nakasinati og dakong kausaban. Sa ingon, ang espiritu ni Elijah nagtabang nga magpabiling aktibo ang bag-ong mga kinabig.
Tan-awa ang ikaupat nga video aron makita ang istorya nga naghulagway niining baruganan.
1:58 -
Mga kasingkasing ug pagpaaktibo og balik. Ang pagbati ngadto sa mga amahan makapahumok sa kasingkasing nga natig-a human makasinati og dako nga kausaban. Sa ingon, ang espiritu ni Elijah mao ang yawe sa pagpaaktibo og balik.
Tan-awa ang ikalima nga video aron makita ang istorya nga naghulagway niining baruganan.
3:59 -
Mga kasingkasing ug maisug nga mga misyonaryo. Usa ka misyonaryo kinsa nakasinati og dako nga kausaban ug pagbati sa kasingkasing mahimong mas nakabig, mapahinunguron, ug maisug nga sulugoon.
Tan-awa ang ikaunom nga video aron makita ang istorya nga naghulagway niining baruganan.
3:14
Uban sa paspas nga paglambo ug mas andam nga pwersa sa misyonaryo, dili lang kita yanong mosalig sa nangaging mga kalampusan sa pag-proselyte aron modeterminar sa atong dalan ug pamaagi sa umaabut. Ang Ginoo adunay dinasig nga mga teknolohiya ug himan nga atong magamit gumikan sa nagkahiusa nga misyonaryo nga buhat ug buhat sa templo ug family history labaw pa kaysa bisan unsang panahon niini nga dispensasyon. Ug dili kini sulagma nga kining mga kalamboan tukma nga miabut sa panahon nga gikinahanglan kaayo kini sa pagpadayon sa misyonaryo nga buhat sa tibuok yuta. Ang buhat sa Ginoo mao ang halangdon nga buhat nga nag-focus sa kasingkasing nga ma-usab ug mobati, sa sagradong mga pakigsaad, ug sa gahum sa pagkadiosnon nga gipakita pinaagi sa mga ordinansa sa priesthood.
Summary ug Pagpamatuod
Ang Ginoo namahayag, “Ako makahimo sa pagbuhat sa akong kaugalingon nga buhaton” (2 Nephi 27: 21), ug “Ako modali sa akong buluhaton diha sa iyang angay nga panahon” (D&P 88:73). Kita mga saksi sa Iyang pagpadali sa Iyang buhat.
Kita nagpuyo ug nagserbisyo sa dispensasyon sa kahingpitan sa panahon. Ang pag-ila sa mahangturong importansya sa talagsaong dispensasyon diin kita nagkinabuhi karon kinahanglang moimpluwensya sa tanan natong buhat ug sa paningkamot nga mamahimo. Ang buhat sa kaluwasan nga pagatumanon niining katapusang mga adlaw dako, lapad, mahinungdanon, ug dinalian. Kinahanglan gayud kita nga magmapasalamaton para sa mga panalangin ug responsibilidad nga mabuhi niining piho nga panahon sa katapusang dispensasyon. Kinahanglan gayud kita nga magmapainubsanon sa pagkasayud nga “ngadto kinsa daghan ang gihatag daghan ang gikinahanglan” (D&P 82:3).
Ang pagsangyaw sa ebanghelyo ug ang pagsiksik sa atong mga patay kabahin sa usa ka mahinungdanon nga buhat—usa ka buhat sa gugma nga gituyo aron mo-usab, mopabati, ug molimpyo sa mga kasingkasing sa matinud-anong nangita sa kamatuoran. Ang artipisyal nga utlanan nga kanunay natong gibutang tali sa misyonaryo nga buhat ug sa buhat sa templo ug family history gipapas na; mao kini ang dako nga buhat sa kaluwasan.6
Mahimo ba natong sugdan sa pagsabut ang tahas sa buhat sa templo ug family history sa pagtabang sa investigator o sa dili kaayo aktibo nga miyembro nga makaangkon og mas lawom nga pagsabut sa plano sa kaluwasan? Ato bang naila nga usa sa makaimpluwensya pag-ayo nga magpabling aktibo ang kinabig mao ang espiritu ni Elijah? Mahimo ba nga mas magpasalamat ta sa kaimportante sa mga higayon sa pagpabati sa kasingkasing nga mamugna pinaagi sa pagpakigbahin sa mga istorya sa pamilya isip mga paagi sa pagpangita og mga tawo nga katudloan sa mga miyembro ug misyonaryo? Mahimo ba natong tabangan kadtong atong giserbisyuhan nga mas ma-access ang gahum sa pagkadiosnon pinaagi sa takus nga pag-apil sa mga ordinansa sama sa sakrament ug mga bunyag ug pagkumpirma alang sa mga patay?
Unta kamo klarong makakita, makadungog sa eksakto, ug kanunayng makahinumdom sa kaimportante sa inyong pagserbisyo diha sa buhat sa Ginoo sa pag-usab, pagpabati, ug pagpaputli sa mga kasingkasing.