100 Ka Tuig sa Family Home Evening

Karong bulana motimaan sa 100 ka tuig sukad ang Unang Kapangulohan miawhag sa mga miyembro nga mag-family home evening. Ang mosunod nga mga kinutlo gikan sa sulat sa Unang Kapangulohan nga nagpaila sa family home evening. Kini gipagawas niadtong Abril 1915 ug giimprinta sa Improvement Era niadtong Hunyo 1915 (tan-awa sa mga pahina 733–34). Ang pag-capital ug punctuation gi-moderno.

Litrato sa maayong kabubut-on sa Church History Library

Minahal nga mga Kaigsoonan:

Among tambagan ang mga Santos sa Ulahing mga Adlaw nga mas motuman sa sugo sa Ginoo nga gihatag diha sa ika-68 nga seksyon sa Doktrina ug mga Pakigsaad:

“Ug usab, tungod kay ang mga ginikanan adunay mga anak diha sa Zion, o diha sa bisan diin sa iyang mga istaka nga natukod, nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon, ang sala anaa diha sa mga ulo sa mga ginikanan; …

“Ug sila usab motudlo sa ilang mga anak sa pag-ampo, ug sa paglakaw nga matarung sa atubangan sa Ginoo” [tan-awa sa D&P 68:25–28].

Ang mga anak sa Zion kinahanglan usab nga mas hingpit nga magsunod sa sugo sa Ginoo nga gihatag sa karaang Israel, ug gibalikbalik ngadto sa mga Santos sa Ulahing mga Adlaw:

“Tahuron mo ang imong amahan ug ang imong inahan, aron magahataas ang imong mga adlaw nga gihatag kanimo sa Ginoo nga imong Dios” [Exodo 20:12].

Kini nga mga pinadayag hugtanon nga gipasunod ngadto sa mga Santos sa Ulahing mga Adlaw, ug mao kini ang gikinahanglan ngadto sa mga amahan ug inahan niini nga Simbahan nga kining kasugoan matudlo ug mapatuman diha sa ilang mga panimalay.

Tungod niini kami nagtambag ug nag-awhag nga sugdan ang “home evening” sa tibuok Simbahan, diin niining panahona ang mga amahan ug inahan mopundok sa ilang batang mga lalaki ug batang mga babaye diha sa panimalay, ug motudlo kanila sa pulong sa Ginoo. Sa ingon mas masayud sila sa mga panginahanglan ug mga kinahanglanon sa ilang pamilya, sa sama nga higayon mas mapamilyar ang ilang kaugalingon ug ang ilang mga anak sa mga baruganan sa ebanghelyo ni Jesukristo. Kini nga home evening kinahanglang igahin sa pag-ampo, pagkanta og mga himno, mga awit, instrumental nga musika, pagbasa sa kasulatan, mga hilisgutan sa pamilya, ug piho nga panudlo kalabut sa mga baruganan sa ebanghelyo, ug sa problema sa kinabuhi kalabut sa pamatasan, ingon man usab sa mga katungdanan ug mga obligasyon sa mga anak ngadto sa mga ginikanan, sa panimalay, sa Simbahan, sa katilingban, ug sa nasud. Para sa mas gagmay nga mga bata, tukma nga pag-recite, mga awit, mga istorya ug mga dula mahimo nga ipaila. Gamay nga meryenda [refreshment] mahimong andamon diha sa panimalay aron idalit.

Ang pagkapormal ug pagkahilom kinahanglan nga likayan, ug ang tanan nga pamilya moapil sa mga tulumanon.

Kini nga mga panagpundok makasangkap og mga kahigayunan alang sa pagsalig tali sa mga ginikanan ug mga anak, tali sa igsoong mga lalaki ug mga babaye, ingon man sa paghatag og kahigayunan alang sa mga pulong sa pagpasidaan, pagtambag, ug pahimangno sa mga ginikanan ngadto sa ilang anak nga mga lalaki ug mga babaye. Makahatag kini og kahigayunan alang sa batang mga lalaki ug mga babaye sa pagtahud sa amahan ug inahan ug sa pagpakita sa ilang pagpasalamat sa mga panalangin sa panimalay aron ang saad sa Ginoo kanila tinuod nga matuman ug ang ilang mga kinabuhi mapalungtad ug magmalipayon. …

Kami … nag-awhag sa mga batan-on nga maanaa sa panimalay nianang gabhiuna ug gamiton ang ilang mga kusog sa paghimo niini nga matulun-anon, makahuluganon ug makalingaw.

Kon ang mga Santos mosunod niini nga tambag, isaad namo nga dakong mga panalangin ang moresulta. Ang paghigugmaay diha sa panimalay ug pagkamasulundon ngadto sa mga ginikanan molambo. Ang hugot nga pagtuo mahimo nga mapalambo diha sa mga kasingkasing sa kabatan-onan sa Israel, ug makabaton sila og gahum sa pagpakigbatok sa dautan nga mga impluwensya ug mga tintasyon nga nagsamok kanila.

Inyong kaigsoonan,

Joseph F. Smith

Anthon H. Lund

Charles W. Penrose

Unang Kapangulohan