Unsaon nga Magmaalamon

Ni Elder Neil L. Andersen

Sa Korum sa Napulog Duha ka mga Apostoles

Gikan sa pakigpulong sa gradwasyon sa Brigham Young University–Idaho nga gihatag niadtong Abril 10, 2009.

Sa kadaghan kaayong impormasyon nga anaa kanato karon, kita nagkinahanglan gyud og kaalam—kaalam sa paghunahuna og maayo ug pag-ila sa unsang paagi atong magamit unsay atong nakat-unan.

Atong hinumduman:

1. Kita kinahanglang magtinguha og kaalam.

2. Daghan og mga aspeto ang kaalam ug magamit kini sa lain-laing mga sitwasyon.

3. Ang sayo nga pagbaton og kaalam makadala og daghang panalangin.

4. Ang kaalam kabahin sa usa ka hilisgutan mahimong dili magamit sa laing hilisgutan.

5. Ang kaalam sa kalibutan, nga sa daghang paagi bililhon kaayo, mahimong pinakabililhon kon kini nahiuyon sa kaalam sa Dios.

Ang kasulatan naghulagway og duha ka matang sa kaalam: ang kaalam sa kalibutan ug ang kaalam sa Dios. Ang kaalam sa kalibutan adunay positibo ug negatibo nga bahin. Sa paghulagway niini sa negatibong paagi, kini mahulagway isip dili kompleto nga kamatuoran, gisagulan og kahibalo ug pagmanipular, aron makaangkon sa hinakog ug dautang mga katuyoan.

Adunay lain nga matang sa kaalam sa kalibutan nga ang motibo layo ra sa kadautan. Gani kini positibo kaayo. Kini nga kaalam maangkon pinaagi sa pagtuon, pagpamalandong, pag-obserbar, ug pagkugi. Kini bililhon ug makatabang sa mga butang nga atong buhaton. Para sa maayo ug desenting mga tawo, kini moabut samtang kita nagsinati sa atong pagka-mortal.

Mas importante, ang kaalam nga nakahatag og kalampusan dinhi sa kalibutan kinahanglang ikaduha lang sa kaalam sa Dios ug dili hunahunaon nga mas labaw niini.

Dili tanang kaalam managsama kaimportante. Kita kinahanglang makat-on nga kon adunay panagsumpaki tali sa kaalam sa kalibutan ug sa kaalam sa Dios, kita kinahanglan nga mosunod sa kaalam sa Dios.

Mosugyot ko nga hunahunaa ang pipila sa mga isyu nga inyong giatubang. Linyahi ang tunga-tunga sa papel. Ilista ang kaalam sa kalibutan diha sa wala ug ang kaalam sa Dios sa tuo. Isulat ang mga isyu nga nagkasumpaki.

Unsa man ang inyong pilion?

Sa seksyon 45 sa Doktrina ug mga Pakigsaad, nga naghisgot sa mga hitabo sa hapit na ang Ikaduhang Pag-anhi sa Manluluwas, ang Ginoo nagsaysay pag-usab sa istorya sa napulo ka mga birhen ug dayon mibilin kanato niining mga pulonga: “Kay sila mga maalamon ug nakadawat sa kamatuoran, ug nakadawat sa Balaan nga Espiritu Santo alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw” (tan-awa sa D&P 45:57).

Kita magtinguha og kaalam sa Dios. Adunay daghan nga atong makat-unan karon kabahin sa kaalam. Ako magsaad kaninyo nga ang mga panalangin sa Ginoo maanaa kaninyo samtang kamo magtinguha og kaalam, ang kaalam sa Dios. Siya naghinam-hinam sa pagpapakigbahin sa Iyang kaalam ngari kanato. Ug kon kita magmasulundon ug mag-ampo ug magtinguha niini, kini moabut.

Giunsa Ninyo Kini Paggamit?

“Kanunayng adunay duha ka posibilidad nga pilian. Makapili kamo kon unsay inyong gusto. Apan kinahanglang modesisyon kamo sa maalamong paagi. Makasulti ko nga ang pagpili sa Ginoo makatabang kaninyo kada adlaw ug ang pagbaton sa Espiritu Santo sa inyong kiliran makatabang kaninyo sa kada sitwasyon. Ang pagpili sa sayop mosangput sa dili malipayong pagbati, pagbati nga ingon og kalipay sulod sa mubong panahon apan human niini inyong makita ang mga sangputanan ug pait ninyong mahayan ang desisyon nga inyong gibuhat. Pagpabiling anaa sa habig sa Ginoo! Dili kini kanunay sayon, apan angay lang kini!”

Samuel J., Austria