Mga Pangutana ug mga Tubag
“Unsaon nako nga mahimong komportable nga makig-istorya sa akong bishop mahitungod sa mga isyu o mga problema?”
Tingali makulbaaan ka nga makig-istorya sa imong bishop mahitungod sa mga butang nga imong naproblemahan, ug normal ra kana. Sa kasagaran makulbaan gyud ta sa bag-ong mga kasinatian o makigsulti sa usa ka hamtong.
Apan ang imong bishop gitawag sa Dios. Gitawag siya tungod kay usa siya ka mapasaligon nga disipulo ni Jesukristo. Maningkamot siya nga magbination ug magmasinabtanon. Ang iyang tumong mao ang pagtabang nimo nga makaduol sa Manluluwas aron ikaw makakita og kalinaw. Sa sinugdanan, mahimong maulaw ka nga makigsulti kaniya mahitungod sa imong mga pangutana o mga sala, apan dili siya maghunahuna nga ubos ra ka. Gani, malipay siya nga ikaw adunay tinguha nga molambo. Ug siya mohimo nga kompidensyal ang inyong pag-istoryahanay.
Dili kinahanglan nga mag-inusara ka sa pagsagubang sa imong mga problema. Ang imong bishop makatabang nimo sa pagpangita og mga tubag sa imong mga pangutana ug, kon gikinahanglan, makatabang nimo sa paghinulsol ug pagbuntog, pinaagi sa Pag-ula ni Kristo, sa pagbati nga sad-an, kawalay paglaum, o pagkadili takus.
Sa imong pagpakigsulti sa imong bishop, imong mabati ang iyang gugma alang nimo. Bisan og siya responsable alang sa tibuok ward o branch, ang iyang unang tutukan mao ang kaayohan sa batan-ong mga lalaki ug mga babaye. Wala ka magsamok niya tungod sa pagpangayo og tabang.
Makaampo ka ngadto sa Langitnong Amahan alang sa kalig-on ug kaisug sa pagpakigsulti sa imong bishop. Iyang gitugutan ang imong bishop sa pagtabang nimo ug ang imong bishop madasigon sa pagbuhat sa ingon. Kon ikaw moadto uban sa bukas nga kasingkasing ug tinguha nga mahimong mas maayo, imong makaplagan nga inig biya nimo sa iyang opisina mobati ka og mas nindot kay sa wala pa ikaw moadto.
Dili Siya Maghunahuna nga Ikaw Ubos Ra
Ang bishop sa imong ward gihatagan og awtoridad sa paggiya nimo pinaagi sa proseso sa paghinulsol. Usahay ang pagduol sa imong bishop maoy bugtong paagi nga ikaw hingpit nga makahinulsol pinaagi sa Manluluwas. Sa dihang kinahanglan kong makigsulti sa akong bishop, mitabang siya nako nga makakaplag sa Manluluwas ug sa pagbuntog sa labing lawom nga samad nga sukad akong nasinati. Ang imong bishop gusto nga motabang nimo. Ang iyang calling mao ang pag-atiman nimo, ug siya dili maghunahuna nga ikaw ubos ra tungod kay dunay butang nga kinahanglan nimong makigkita kaniya.
Madison D., edad 18, Utah, USA
Ang Imong Bishop Andam nga Motabang
Mobati ko kaniadto nga dili komportable sa mga interbyu, apan nakaamgo ko sa katapusan nga ang akong bishop andam kanunay sa pagtabang nako sa pagsulbad sa akong mga problema. Salig sa imong bishop, siya ang magbalantay ug ang ward mao ang iyang panon.
Jaime R., edad 19, Cochabamba, Bolivia
Hinumdumi nga Siya Nahigugma Kanimo
Kon ikaw dunay gustong isulti sa bishop, mas sayon tingali nga makigsulti kaniya mahitungod sa eskwelahan ug laing daghang mga butang pag-una. Kon ikaw kulbaan tungod kay ikaw kinahanglang mosulti kaniya mahitungod sa mga isyu sa paghinulsol, hinumdumi lang nga siya nahigugma kanimo. Dili ka angay nga makulbaan unsay iyang mahunahuna nimo, tungod kay nganong ipakaubos man ang pagtan-aw niya sa imong gusto nga mahiduol ni Kristo?
Ashley D., edad 17, Arizona, USA
Dili Niya Budhian ang Imong Pagsalig
Nasayran nako nga ang bishop mao tingali ang labing kasaligan nga hamtong nga kapangayoan og tabang sa usa ka tin-edyer. Dili gayud niya budhian ang imong pagsalig—ang tanan nimong gisulti kaniya magpabilin sa iyang opisina. Usahay lisud ang pagsulti sa imong mga problema, apan ang pagsulti diha sa atubangan sa usa ka tawo nga nahigugma ug nagpakabana ug buot sa labing makaayo nimo nakapahimo niini nga mas sayon.
Nicole S., edad 18, Idaho, USA
Makasalig Ikaw Kaniya
Ang imong bishop o presidente sa branch usa ka tinuod nga sulugoon sa Ginoo. Makasalig ikaw kaniya alang sa giya samtang ikaw magtinguha og inspirasyon gikan sa Espiritu Santo ug sa mga kasulatan. Kinahanglang imong masabtan nga ang bishop anaa aron motabang ug nga siya gigiyahan sa Dios.
Stanislav R., edad 19, Donetsk, Ukraine
Pag-ampo aron Makahibalo
Pangutan-a ang imong kaugalingon nganong dili ka man komportable nga makig-istorya sa bishop. Nagtuo ka bang dili siya makatabang sa pagsulbad sa imong mga problema? Pag-ampo aron makahibalo nga ang bishop nagmahal kanimo ug gitawag aron sa pagtabang nimo.
Adam H., edad 13, California, USA
Bisan og Ikaw Nakahimo og Sayop
Mahimong lisud ug makaulaw sa pagkumpisal sa mga butang ngadto sa imong bishop, apan inig gawas nimo niana nga opisina, mahuwasan ka, ug ikaw makahibalo nga ang Langitnong Amahan nahigugma kanimo. Gusto siya nga ikaw magmalipayon, bisan og ikaw makahimo og sayop.
Amanda W., edad 16, Utah, USA
Ania Siya aron Motabang
Ang bishop mao ang magbalantay sa imong ward. Hinumdumi nga siya mobuhat kutob sa iyang mahimo sa pagtabang nimo ug anaa kaniya ang gahum sa Dios. Kon mobati ka og kahadlok, makaampo ka alang sa kalig-on aron makahimo sa pagpakigsulti sa imong bishop. Sa katapusan, ikaw malipay nga ikaw miduol kaniya—ug kini mahimong bililhon.
Samuel H., edad 14, Idaho, USA