Kinahanglang Moadto Kita sa Templo Karon!
Mary Holmes Ewen, California, USA
Mga paghulagway pinaagi ni Bradley H. Clark
Usa ka Dominggo sa buntag usa ka bag-ohay nga nabunyagan nga miyembro gipaila-ila sa ward. Ang iyang ngalan mao si Lydia. Nalooy mi niya diha-diha dayon.
Si Lydia tigulang ug nabuta gumikan sa mga katuigan sa pakigbisog sa diabetes. Dali niyang maila ang mga miyembro sa ward pinaagi sa ilang mga tingog ug mga lakang. Iyang isulti ang among ngalan ug makiglamano kanamo, ug wala gyud mi magpasabut nga siya sa tinuoray buta.
Human sa gikinahanglang usa ka tuig sa pagpaabut, si Lydia nakigkita sa bishop ug sa presidente sa stake aron magkuha og rekomend sa templo. Usa ka Dominggo diha sa Relief Society, iya ko nga gibira tupad niya ug misulti, “Ang presidente sa stake misulti nako nga kinahanglang moadto ko sa templo sa labing madali nga panahon. Imo ba kong ubanan didto?”
Unang semana kadto sa Disyembre—busy gyud kaayo mi niadtong higayona. Mihimo ko sa sagad nga mga pasangil ug miingon, “Dili ba makapaabut ta hangtud Enero?”
“Dili, kinahanglang mangadto ta karon!”
Usa ka grupo sa mga babaye sa among ward mag-adtoan sa templo kada bulan, busa ako silang giduol aron paubanon si Lydia kanila. Busy usab kaayo sila. Apan si Lydia, nga naghilak, misulti na usab kanamo nga ang presidente sa stake miingon kaniya nga moadto sa labing madali nga panahon.
Tungod niini kami nagkauyon nga mobiyahe sa 150-ka milya (241 km) nga biyahe sa sunod semana. Sa pagpadulong didto, among gipuno ang van uban sa panag-istoryahanay ug panaghigalaay sa walo ka babaye. Si Lydia nalipay kaayo tungod sa iyang kasinatian sa templo ug sa panalangin nga iyang nadawat ang iyang endowment.
Sa unang semana sa Enero, misamot ang sakit ni Lydia ug gidala siya sa ospital aron matambalan. Usa ka semana ang milabay siya namatay. Apan si Lydia mitaliwan uban sa mahangturong mga panalangin nga iyang nadawat sa templo mga pipila lang ka semana ang milabay.
Sa wala madugay, akong gisaysay ngadto sa presidente sa stake ang nahitabo sa among pagbiyahe ug misulti kaniya sa akong pagdayeg kaniya nga siya nadasig sa pagsulti kang Lydia nga kinahanglan niyang moadto sa templo diha-diha dayon.
“Wala gyud ko magpasabut nga siya moadto diha-diha dayon,” siya mitubag. “Kanunay nakong sultian ang mga bag-ong nagkupot og mga rekomend sa templo sa pag-adto sa templo sa labing madali nga panahon. Ang Espiritu namulong kang Lydia, dili ako!”
Si Lydia mitudlo kanatong tanan sa pagpaminaw sa Espiritu ug mosunod niini diha-diha dayon. Mapasalamaton ko sa iyang pahinumdom nga maminaw sa ligdong, hinay nga tingog.