Ang Ehemplo sa Manluluwas sa Pagkamasulundon

Ang Iyang ehempo nahimong sumbanan nga angayang sundon natong tanan.

“Sa tanang leksyon nga atong nakat-unan gikan sa kinabuhi sa Manluluwas, walay laing mas tin-aw ug gamhanan kay sa leksyon sa pagkamasulundon,” miingon si Elder Robert D. Hales sa Korum sa Napulog Duha ka mga Apostoles niadtong Abril 2014 nga kinatibuk-ang komperensya. Ang ehemplo sa Manluluwas wala lang magtudlo kanato ngano ang pagkamasulundon sa Langitnong Amahan importante apan nagtudlo usab kon sa unsang paagi kita magmasulundon. Samtang kamo magribyu sa mosunod nga mga ehemplo gikan sa Iyang pagpangalagad, hunahunaa kon sa unsang paagi kini makagiya kaninyo sa inyong kinabuhi.

1. Bisan tuod si Jesus walay sala, iyang gisumiter iyang kaugalingon nga magpabunyag “sa pagtuman sa tibuok pagkamatarung” (Mateo 3:13–17; tan-awa usab sa 2 Nephi 31:4–7; Juan 3:5).

2. Sa edad nga 12, dihang si Jose ug Maria nakakita ni Jesus nga nagtudlo diha sa templo, Siya “masinugtanon kanila,” ug masulundong miuli uban kanila (tan-awa sa Lucas 2:42–51).

3. Bisan tuod Siya mihangyo kon iya ba nga mapasa ang kupa, Siya mituman sa pag-antus diha sa Tanaman sa Getsemani (tan-awa sa Mateo 26:36–44; Lucas 22:39–54).

4. Siya mibalaan sa adlawng Igpapahulay ug mitambong diha sa sinagoga (tan-awa sa Lucas 4:16–44).

5. Si Jesus miuyon nga pagahukman sa mga tawo aron ang buhat ug himaya sa Amahan matuman (tan-awa sa Isaias 53:7; Mateo 26:53; Moises 1:39).

6. Iyang gitapos ang Iyang buhat pinaagi sa pagtugot sa dautang mga tawo sa paglansang Niya (tan-awa sa Mateo 27:35; Juan 10:17–18; Mga Taga-Galacia 1:3–5).

7. Kanunay nga masulundon ngadto sa Iyang Amahan, si Jesus miadto sa kalibutan sa espiritu ug miorganisar sa misyonaryo nga buhat didto (tan-awa sa 1 Pedro 3:18–20; 4:6).

8. Si Jesus gitintal ni Satanas, apan wala Siya magpadala (tan-awa sa Mateo 4:1–11; D&P 20:22).

9. Siya nagpadayon sa pagsunod sa kabubut-on sa Amahan ug migiya sa Simbahan (tan-awa sa Joseph Smith—Kasaysayan 1:16–17; D&P 19:2, 24).

Unsay inyong mahimo?

Si Elder Hales miingon, “Si Jesus mitudlo nato gamit ang yanong pulong nga sayon sabton: ‘Kon kamo nahigugma kanako, inyong pagatumanon ang akong mga sugo’ [Juan 14:15], ug ‘Umanhi ka, sumunod kanako’ [Lucas 18:22].”Unsay inyong buhaton karon aron mas magmasulundon?

Tungod ang Atong Manluluwas Masulundon

“Tungod kay masulundon ang atong Manluluwas, gitubos Niya ang atong mga sala, nakapahimong posible nga kita mabanhaw ug nag-andam sa agianan aron kita makabalik sa atong Langitnong Amahan, kinsa nahibalo nga masayop kita samtang nagkat-on sa pagsunod dinhi sa mortalidad. Kon mosunod kita, atong gidawat ang Iyang sakripisyo, kay kita nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod, mga ordinansa, ug mga sugo diha sa ebanghelyo.”

Elder Robert D. Hales sa Korum sa Napulog Duha ka mga Apostoles, “‘Kon Nahigugma Kamo Kanako, Inyong Pagatumanon ang Akong mga Sugo,’” Liahona, Mayo 2014, 35.