Atong Luna

Ang mga Bombero ug ang Taming sa Dios

Mga paghulagway pinaagi ni Julia Yellow

Kalma ra ang adlaw sa akong pagtrabaho isip boluntaryo nga bombero, mao nga nakahukom ko nga mobasa sa Basahon ni Mormon. Sa dihang usa sa akong kauban sa trabaho nakakita nako nga nagbasa, nangutana siya kon nakahibalo ba ko unsaon nato sa pagsul-ob sa taming sa Dios niining moderno nga panahon. Samtang kami nag-istorya, mitingog ang alarma. Dihay sunog sa duol nga tindahan.

Nagdali kaming misul-ob sa among saput sa bombero ug midiretso pag-adto sa nasunugan. Dako ang kalayo, ug sa among pagduol sa tindahan, dihay mibuto sa among direksyon. Ang kalayo milibut namo. Ang pagbuto nakabungog sa akong kauban ug nako sa pipila ka segundo. Apan salamat sa among ekipo ug panalipod nga saput, wala kami maunsa.

Sa among pagbalik sa estasyunan human makigbugno sa kalayo, akong gipangutana ang akong kauban kon nakahinumdom pa ba siya sa iyang pangutana mahitungod sa taming sa Dios. Miingon siya nga oo, ug akong gipasabut nga ang taming sa Dios sama sa panalipod nga saput sa pakigbugno sa kalayo. Kinahanglang isul-ob nato kini kanunay aron kita makasugakod sa gamhanang pag-ataki sa kaaway. Kon kita mosunod sa mga sugo, mapanalanginan kita sa panalipod nga gahum sa taming sa Dios, ug ang Espiritu Santo mao ang atong giya.

Fernando de la Rosa Marrón, Mexico

Ang Akong Paborito nga Kasulatan

1 Samuel 16:7. “Ang Ginoo nagatan-aw dili ingon sa makita sa tawo; kay ang tawo nagatan-aw sa panagway sa gawas, apan ang Ginoo nagatan-aw sa kasingkasing.”

Sa wala pa ako magpasakop sa Simbahan, kanunay nakong gitan-aw ang akong kaugalingon nga usa ka ordinaryo nga tawo uban sa ordinaryo nga mga abilidad. Gibati nako nga ako walay butang nga bililhon nga ikatanyag. Nahadlok ko sa pagpakita sa mga tawo kon kinsa ko tungod sa kahadlok nga isalikway ug masakitan. Nagtuo ko nga ang tanan nga naglibut nako mas lig-on, mas maalamon, ug mas maayo pa kanako.

Apan kining tanan nga panglantaw nausab sa dihang nahimo kong miyembro sa Ang Simbahan ni Jesukristo sa mga Santos sa Ulahing mga Adlaw. Nakat-unan nako nga kitang tanan mga anak sa Dios ug nakapanunod kita og balaan nga mga hiyas. Nakasabut ako karon nga walay bisan unsa nga kompetisyon kon kinsa ang mas maalamon, mas datu, o mas maayo og hitsura. Sa mga mata sa Ginoo, pareha kitang tanan, ug Siya mao ang mohukom—dili base sa atong pisikal nga mga hiyas apan sa atong pagkamasulundon ug tinguha sa pagsunod sa dalan nga Iyang gipakita.

Joan Azucena, Philippines

Motrabaho ba Kamo sa Dominggo?

Mga paghulagway pinaagi ni Julia Yellow

Sa dihang 15 anyos ang akong edad nakaangkon ko og lig-ong pagpamatuod sa ebanghelyo ni Jesukristo ug nalipay pag-ayo nga nagpasakop sa Simbahan. Nianang higayona, nagtrabaho ko aron motabang sa pagsuporta sa akong pamilya. Wala madugay human ako mabunyagi, nawad-an ko og trabaho.

Kinahanglan ko nga makakita dayon og bag-ong trabaho tungod kay ang akong pamilya nagsalig nako, apan ang kada trabaho nga akong giaplayan nagkinahanglan nga ako motrabaho og Dominggo. Akong gibalibaran ang daghang mga tanyag sa trabaho tungod kay ako nasayud nga kinahanglan kong anaa sa simbahan sa mga Dominggo (tan-awa sa D&P 59:9–10).

Human sa duha ka bulan nga pagpangita, wala gihapon ko makakita og trabaho. Ang akong mama dili miyembro sa Simbahan ug bisan og siya nagtuo sa Dios, nasuko kaayo siya nga akong gibalibaran ang daghan kaayong mga trabaho.

Usa ka gabii mitan-aw siya nako nga nagluha ang mga mata ug nangutana, “Nganong mitugot ang Dios nga mahitabo kini kanato nga ikaw matinud-anon man kaayo sa pagbuhat unsa ang matarung?”

Mitubag ko, “Ma, wala ko kahibalo nganong nahitabo kini nato, apan ako nasayud nga ako nagbuhat sa sakto nga butang, ug ako nasayud nga ang Dios mopanalangin nato alang niini.”

Pagsunod buntag dihay mitanyag nako og dakong kantidad sa kwarta alang sa duha ka adlaw nga pagbalhin sa bug-at nga kargamento gikan sa usa ka balay ngadto sa lain. Kapoy kaayo ang trabaho, apan sa dihang akong nadawat ang kwarta, miuli dayon ko ug mihalad og pag-ampo sa pasalamat. Sa wala madugay nakakita ko og maayong trabaho nga walay Dominggo, ug sukad niana wala na ko kawad-i og trabaho.

Nalipay ko nga mipili ko sa pagbalaan sa adlaw nga Igpapahulay. Dunay daghang mga hagit sa kinabuhi, apan nasayud ko nga kon kita maningkamot nga magmalig-on bisan pa nianang mga hagit, ang Ginoo mopanalangin nato.

Sahil Sharma, India