Unsa ka dako ang impluwensya ni Satanas sa akong hunahuna?

Ang atong Langitnong Amahan nagsiguro nga kita adunay moral nga kabubut-on, ang abilidad sa pagpili sa maayo o dautan. Dili kita Niya pugson sa pagbuhat og maayo, ug ang yawa dili makapugos kanato sa pagbuhat og dautan (tan-awa sa mga Mga Pagtulun-an sa mga Presidente sa Simbahan: Joseph Smith [2007], 255).

Busa, kabahin sa imong hunahuna, ang yawa makaimpluwensya lamang kutob sa imong ihatag kaniya. Si Propeta Joseph Smith miingon, “Si Satanas dili makatintal kanato pinaagi sa iyang mga pagdani gawas kon kita motugot ug monunot diha sa atong mga kasingkasing” (Mga Pagtulun-an: Joseph Smith, 255). Miingon usab siya, “Ang yawa walay gahum ibabaw kanato gawas lamang kon ato siyang tugutan” (255).

Dugang pa, ang kasulatan nagtudlo kanato nga “walay lain gawas sa Dios nga nasayud sa imong mga hunahuna ug sa mga katuyoan sa imong kasingkasing” (D&P 6:16), mao nga si Satanas wala gyud masayud unsay inyong gihunahuna. Siya motintal ug modani lamang. Apan kon ikaw mosunod niini, siya makaangkon og gahum nimo ug magkagrabe ang mga pagtintal. Sa samang paagi, kon ikaw mobuntog sa dautan ug mopili sa maayo, ikaw malig-on ug mapanalanginan.