Ang Sakto nga Dalan

Ni Elder Claudio D. Zivic

Sa Seventy

Gikan sa “Dili Kita Mosubay sa Sayop nga Dalan,” Liahona, Mayo 2014, 39–41.

“Paminaw sa mga pulong sa Dios kinsa nagbuhat kaninyo” (D&P 43:23).

Daghang tuig ang milabay ang akong pamilya ug ako mibisita sa Arches National Park sa Utah, USA. Usa sa labing nindot ug sikat nga mga arko sa parke mao ang Delicate Arch, ug mihukom mi sa pagsaka sa bukid aron adtuon kini.

Nagsugod mi nga madasigon, apan sa wala madugay ang uban gusto na nga mopahulay. Gusto nakong maabut didto dayon, busa miadto ko nga nag-inusara. Wala magtagad sa dalan nga angay nakong subayon, misunod ko sa tawo nga nag-una nako kinsa daw sigurado kaayo sa iyang gilaktan.

Ang dalan nagkalisud nga katkaton. Sigurado ko nga ang akong pamilya dili gyud makahimo niini. Sa kalit lang akong nakita ang Delicate Arch, apan nasurprisa ko, anaa kini sa dapit nga dili nako maadto. Ang dalan nga akong giagian dili padulong sa arko.

Nasagmuyo ko ug mibalik sa akong giagian. Wala koy pasensya nga naghulat hangtud nag-abut mi pag-usab. Mipasabut sila nga ilang gisunod ang mga timaan nga nagtudlo sa saktong agianan, ug uban sa pag-amping ug paningkamot, nakaabut sila sa Delicate Arch. Walay swerte, sayop ang akong gisubay nga agianan. Pagkadako sa leksyon nga akong nakat-unan!

Ayaw kawala sa dalan padulong sa kinabuhing dayon uban sa inyong Langitnong Amahan. Sunda ang mga baruganan sa ebanghelyo ug mga kasugoan nga inyong nakat-unan, ug kamo maanaa sa saktong dalan aron magpuyo uban Kaniya hangtud sa kahangturan.