Mensahe sa Unang Kapangulohan
Si Presidente Monson Nanawagan alang sa Kaisug
Ni Presidente Thomas S. Monson
Paghulagway pinaagi sa iStock/Thinkstock
Hapit kanunay, gihatagan og gibug-aton ni Presidente Monson, nga kita mohimo og mga pagpili sa bisan unsa nga matang.
Sa paghimo og maalamong pagpili, mitambag siya, kita nagkinahanglan og kaisug—“ang kaisug nga mosulti og dili, ang kaisug nga mosulti og oo. Ang mga desisyon mao ang motino sa kapalaran.”1
Sa mosunod nga mga kinutlo, si Presidente Monson nagpahinumdom sa mga Santos sa Ulahing mga Adlaw nga sila nagkinahanglan og kaisug sa pagbarug alang sa kamatuoran ug pagkamatarung, sa pagpanalipod sa ilang gituohan, ug sa pagsagubang sa kalibutan nga nagsalikway sa mahangturong mga hiyas ug baruganan.
“Ang tawag alang sa kaisug moabut kanunay sa kada usa nato,” siya miingon. “Mao gyud ni kaniadto pa, ug magpabilin gyud ni nga mao ra gihapon.”2
Ang Kaisug Mopanalangin og Pagtugot sa Ginoo
“Kitang tanan mag-atubang og kahadlok, makasinati og pagbiay-biay, ug makasugat og pagsupak. Himoon nato—kitang tanan—nga magbaton og kaisug sa pagpakigbatok sa panan-aw sa katilingban, kaisug sa pagbarug alang sa prinsipyo. Ang kaisug, dili kompromiso, ang mopanalangin nato og pagtugot sa Dios. Ang kaisug mamahimong kusganon ug madanihong hiyas kon isipon kini dili lang ang kaandam nga mamatay nga may dungog, apan isip determinasyon sa tinarung nga pagpakabuhi. Samtang kita magpadayon, maningkamot sa pagpakabuhi kon unsay gikinahanglan natong buhaton, sigurado kitang makadawat og tabang gikan sa Ginoo ug makakaplag og kahupayan sa Iyang mga pulong.”3
Mosagubang uban sa Kaisug
“Unsay buot ipasabut sa paglahutay? Ganahan ko sa gipasabut niini: sa pagbarug uban sa kaisug. Ang kaisug imong gikinahanglan aron motuo; usahay gikinahanglan kini samtang kamo mosunod. Tataw nga gikinahanglan kini samtang maglahutay kamo hangtud sa adlaw nga kamo mobiya niining pagka-mortal.”4
Pagbaton og Kaisug sa Pagbarug alang sa Kamatuoran
“[Unta] kamo adunay kaisug sa pagbarug nga lig-on alang sa kamatuoran ug pagkamatarung. Tungod kay ang dagan karon sa katilingban layo kaayo sa mga mithi ug mga baruganan nga gihatag sa Ginoo nato, hapit na gayud kamo tawagon sa pagpanalipod nianang unsay inyong gituohan. Gawas kon ang mga gamot sa inyong pagpamatuod lig-on nga natisok, malisud alang kaninyo nga makabarug sa pagbiay-biay niadtong kinsa mohagit sa inyong hugot nga pagtuo. Kon lig-on nga natisok, ang inyong pagpamatuod sa ebanghelyo, sa Manluluwas, ug sa atong Langitnong Amahan moimpluwensya sa tanan nga inyong gibuhat sa tibuok ninyong kinabuhi.”5
Kita Nagkinahanglan og Espirituhanon ug Moral nga Kaisug
“Ang mga mensahe nga gipakita sa telebisyon, sa mga sinehan ug sa ubang medya sa kasagaran supak nianang atong gusto nga dawaton ug ampingan sa atong mga anak. Kini atong responsibilidad dili lamang ang pagtudlo kanila nga magmaayo diha sa pagtuo ug sa doktrina, apan sa pagtabang usab kanila nga magpabilin nga lig-on, bisan pa sa mga pagtintal nga ilang masugatan. Kini nagkinahanglan og daghang panahon ug paningkamot sa atong bahin—ug aron makatabang sa uban, kita sa atong mga kaugalingon nagkinahanglan og espirituhanon ug moral nga kaisug sa pagpakigbatok sa dautan nga atong nakita sa palibut.”6
Unta Kita Magmaisugon
“Sa atong pagpakabuhi matag adlaw, dili kapugngan nga ang atong pagtuo hagiton. Tingali usahay makita nato ang atong kaugalingon nga gilibutan sa uban ug sa gihapon nagbarug nga gamay ra o gani nagbarug nga nag-inusara kabahin sa unsay mahimong dawaton ug unsay dili. …
“Hinaut nga magmaisugon kita ug andam sa pagbarug sa unsay atong gituohan, ug kon kinahanglan kitang magbarug nga mag-inusara diha sa proseso, hinaut nga maisugon nato kanang buhaton, gilig-on sa kahibalo nga sa pagkatinuod wala kita mag-inusara kon magbarug uban sa atong Amahan sa Langit.”7