Tungod ni Joseph
Pagdiskobre og unom ka mga paagi nga ang inyong kinabuhi nahimong (o mamahimong) lahi tungod ni Propetang Joseph Smith.
Si Joseph Smith namatay sobra sa 170 ka tuig ang milabay. Nagpakabuhi siya sulod lamang sa 38 ka tuig, naggahin sa kadaghanan nianang panahon sa mga dapit nga wala mailhi nga tingali dili ninyo makita sa bisan unsang detalyado nga mga mapa. Ug tingali pamilyar kamo sa daghang mga butang nga iyang gihimo sa iyang kinabuhi. Apan nakahunahuna ba kamo sa unsa nga paagi kini personal nga nakaapekto kaninyo? Samtang kadto nga mga paagi daghan kaayo nga iphon, tingali makasugod kamo sa unom.
Tungod ni Joseph Smith:
1. Nakasabut kamo kinsa gayud ang Dios ug si Jesukristo.
Bisan kon dili tungod ni Joseph Smith, tingali motuo gihapon kamo sa Dios nga Amahan ug ni Jesukristo. Kamo makabaton og mga pagpamatuod sa Biblia. Apan hunahunaa kon unsa ka lawom ug kaabunda ang inyong pagsabut tungod sa unsay gipahiuli ni Joseph Smith—ang maisugon, nagkumpirmar nga saksi sa Basahon ni Mormon, Doktrina ug mga Pakigsaad, ug Perlas nga Labing Bililhon. Sama pananglit, nakahibalo kamo og butang nga wala mahibaloi sa kadaghan sa kalibutan: nga ang nabanhaw nga Manluluwas nagpakita sa Amerika—nagmatuod, sa Iyang mga pulong, nga Siya dili lamang “ang Dios sa Israel, [apan usab] ang Dios sa tibuok yuta” (3 Nephi 11:14).
Hunahunaa kon sa unsa nga paagi nga ang inyong pagpamatuod sa Langitnong Amahan ug ni Jesukristo nalig-on pinaagi sa gamhanang saksi sa mga propeta sama nila ni Nephi, Alma, ug Moroni—dili na lang hisgutan si Joseph Smith mismo, kinsa mipahayag nga: “Siya buhi! Kay kami nakakita kaniya, gani diha sa tuo nga kilid sa Dios.” (D&P 76:22–23). Sa adlaw nga ang hugot nga pagtuo diha sa Dios ug ni Jesukristo hagiton ug sa kasagaran isalikway, usa gayud ka panalangin nga aduna niining dugang nga kahayag!
2. Nasayud kamo nga kamo anak sa Dios—ug ingon man usab ang tanan.
Tingali ang labing importante nga kamatuoran nga gipahiuli ni Joseph Smith mao ang kamatuoran mahitungod sa atong relasyon uban sa Dios.1 Siya literal gayud nga atong Amahan. Mihunong ba kamo aron sa paghunahuna mahitungod sa mga butang nga resulta niana nga kamatuoran? Nakausab kini sa paagi nga inyong makita ang inyong kaugalingon: bisan pa unsay gihunahuna sa kalibutan kaninyo, nasayud kamo nga kamo hinigugma nga anak sa Dios, nga anaa kaninyo ang Iyang mga hiyas. Makapausab kini sa paagi sa inyong pagtan-aw sa uban: sa kalit ang tanan—ang tanan—inyong mga igsoon. Nakausab kini sa paagi sa inyong pagtan-aw sa kinabuhi mismo: ang tanan niini nga mga kalipay ug mga pagsulay kabahin sa plano sa Langitnong Amahan sa pagtabang ninyo nga mahimong sama Kaniya. Dili dautan ang butang nga inyong gikanta sa Primary!2
3. Ang inyong pamilya mahangturon
Nganong daghan kaayong mga tawo naglibug mahitungod sa kaimportante sa kaminyoon ug pamilya? Tingali tungod kay wala sila masayud sa doktrina, nga gipahiuli pinaagi ni Joseph Smith, nga ang kaminyoon ug pamilya gi-orden sa Dios ug gikatakda nga magmahangturon (tan-awa sa D&P 49:15; 132:7). Dili lang kini tradisyon nga hinimo sa mga tawo nga wala na kinahanglana sa katilingban—kabahin kini sa mahangturon nga kapunongan sa langit. Ug salamat sa mga yawe sa priesthood ug sa mga ordinansa sa templo nga gipahiuli pinaagi ni Joseph Smith, ang inyong mahangturong pamilya makasugod dinhi sa yuta.
4. Kamo makagamit sa priesthood ug sa mga panalangin niini.
Tungod kay ang Dios mipahiuli sa Iyang priesthood pinaagi ni Joseph Smith, mahimo kamong bunyagan, ug makadawat sa gasa sa Espiritu Santo. Makapangayo kamo sa makaayo, makahupay ug makagiya nga mga panalangin sa priesthood. Makahimo kamo og sagrado nga mga pakigsaad nga nagbugkos ninyo ngadto sa Dios. Ug kamo makabag-o sa inyong mga pakigsaad kada semana sa inyong pag-ambit sa sakrament. Pinaagi sa mga ordinansa sa priesthood, ang gahum sa Dios maanaa sa inyong kinabuhi (tan-awa sa D&P 84:20–21). Walay usa niini nga posible kon wala ang buhat nga natuman pinaagi ni Joseph Smith.
5. Gawasnon kamo gikan sa pagkaadik sa makadaot nga mga butang.
O labing minus kamo gawasnon kon kamo mosunod sa pagpadayag nga nadawat ni Joseph niadtong 1833—sa wala pa mapamatud-i sa klinikal nga paagi nga ang tabako maoy hinungdan sa kanser sa baga ug ang alkohol maoy hinungdan sa sakit sa atay. Kon kamo dunay propeta nga nagpadayag sa kaalam sa Dios, nganong maghulat pa sa kaalam sa kalibutan nga makaapas. Ang Pulong sa Kaalam nagpakita nga ang Dios wala lamang magpakabana sa atong mga espiritu apan usab sa atong mga lawas (tan-awa sa D&P 89). Human sa tanan, sama sa gipakita sa mga pagpadayag ngadto ni Joseph Smith, ang pagbaton og lawas makahimo nato nga mas—dili ubos—mahisama sa atong Amahan sa Langit, kinsa dunay lawas usab sa unod ug mga bukog (D&P 130:22).
6. Makahibalo kamo sa kamatuoran alang sa inyong kaugalingon pinaagi sa Espiritu Santo.
Sa dihang ang batan-ong si Joseph miadto sa Sagrado nga Kakahoyan niadtong 1820, ang komon nga pagtuo sa daghang mga simbahan mao nga wala nay madawat nga pagpadayag. Ang Panan-awon ni Joseph Smith maoy nakaprobar niana nga sayop. Ang kalangitan bukas—ug dili lang ngadto sa mga propeta. Si bisan kinsa nga dunay pangutana makadawat og tubag pinaagi sa mapainubsanon, makugihong pagtinguha (tan-awa sa D&P 42:61; 88:63). Sama pananglit, inyong masusi sa inyong kaugalingon nga si Joseph Smith mao ang propeta sa Dios sa samang paagi nga nahibaloan ni Joseph: pinaagi sa pagpangutana sa Dios Mismo.
Kini nga lista usa ra ka sinugdanan. Unsay inyong ikadugang? Sa unsang paagi nga ang inyong kinabuhi lahi karon tungod ni Joseph Smith?