Usa ka Panon ug Usa ka Magbalantay
Ang koral alang sa pundok sa karnero nagtudlo nato mahitungod sa pagpakabana sa Manluluwas sa Iyang mga katawhan.
Karaang Turil sa Karnero
Sungkod
Puthaw
Magbalantay
Paril nga Bato
Pultahan
Karnero
Saplong
Unsa kini: Usa ka yanong tangkal, usa ka koral nga dunay bong-bong.
Katuyoan: Sa pagpanalipod sa panon sa karnero batok sa mga manunukob ug mga kawatan, ilabi na sa kagabhion.
Materyal ug kontruksyon: Mga bato, sa kasagaran, nga dunay tunok-tunok nga sa kasagaran ibutang sa ibabaw sa mga bong-bong. Tunokon nga mga tanom sa kasagaran gamiton usab sa paghimo og koral alang sa temporaryong hinimo-himo nga tangkal. Usahay ang mga langob maoy himoong tangkal, mga bato ug tunok-tunok nga ibutang sa atubangan niini.
Unsay Atong Makat-unan
Ang mga toril mao ang:
Pundukanan sa panon. Isip mga miyembro sa Simbahan, kita dunay relasyon sa panaghiusa pinaagi sa atong pagtuo ug sa atong mga pakigsaad, ingon man usab pinaagi sa literal nga panagpundok. Si Presidente Henry B. Eyring, Unang Magtatambag sa Unang Kapangulohan, mitudlo: “Ang hingpit nga kalipay sa panaghiusa nga gusto Niya nga ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini uban sa lain. Dili ikatingala nga ang Dios miawhag kanato sa pagpundok aron Siya makapanalangin kanato. Iyang gusto nga kita magpundok diha sa mga pamilya. Siya mi-establisar og mga klase, mga ward, ug mga branch ug misugo kanato sa pagtigum kanunay. Diha niana nga mga panagpundok, … kita mahimong mag-ampo ug sa pagbuhat alang sa panaghiusa nga maghatag kanato og hingpit nga kalipay ug mopadako sa atong gahum sa pagserbisyo” (“Ang Atong Kasingkasing Nabugkos diha sa Panaghiusa,” Liahona, Nob. 2008, 69).
Usa ka dapit sa kasiguroan ug kapahulayan. Diha ni Jesukristo “makakaplag [kita og] pahulay alang sa [atong] mga kalag” (Mateo 11:29). Ang Iyang Simbahan mao ang “usa ka panalipod, ug … usa ka dangpanan” (D&P 115:6). Ug sama sa gitudlo ni Presidente Boyd K. Packer, Presidente sa Korum sa Napulog Duha ka mga Apostoles, “Atong makaplagan ang luwas ug ang seguridad para nato … sa pagtahud sa atong mga pakigsaad ug sa yanong pagkamasulundon nga gikinahanglan sa mga sumusunod ni Kristo” (“Niini nga mga Butang Ako Nasayud,” Liahona, Mayo 2013, 7).
Gibantayan sa magbalantay. Si Jesukristo mao ang Maayong Magbalantay sa Karnero kinsa miluwas kanato. Nag-antus Siya ug namatay aron nga kita makabuntog sa sala ug kamatayon ug mobalik ngadto sa atong Langitnong Amahan. Samtang kita moduol ngadto ni Kristo ug magmasulundon sa Iyang mga sugo, Siya mopanalangin, mogiya, ug manalipod kanato isip indibidwal ug isip Iyang katawhan sa pakigsaad.