Ang Espirituhanong Impluwensya sa mgaBabaye
Ang tagsulat nagpuyo sa Utah, USA.
Nakahibalo ba kita sa gahum sa atong espirituhanong kalig-on?
MGA ANAK NGA BABAYE SA DIOS, ni Kathleen Peterson; dili mahimong pakopyahan
Daghan nga talagsaon, mapainubsanong kababayen-an sa Simbahan mapahinungurong nagserbisyo nga wala makaamgo sa dakong impluwensya nga anaa sa ilang kinabuhi—sa ilang tahas isip mga ehemplo sa temporal nga pagserbisyo, ingon man mga kabilin sa espirituhanong kalig-on. Usa niining mga babaye mao ang akong lola, si Cherie Petersen. Siya matinud-anung nagserbisyo sa mga calling nga dili kaayo mabantayan sa uban sa tibuok niyang kinabuhi. Kon inyo siyang pangutan-on, siya moangkon nga siya walay mga talento nga ikahatag sa kalibutan. Apan, sa dihang gisugdan nako pagkasayud ang iyang kinabuhi, akong nasayran nga ang iyang espirituhanong kalig-on nakaapekto og maayo sa akong kinabuhi.
Ang mga ginikanan ni Cherie mihunong sa pagsimba ug nagdiborsyo sa dihang bata pa siya, busa nagtubo siya sa usa ka inahan, si Florence, nga kanunay nagtrabaho. Si Florence mas pinasagdaan sa dihang bata pa siya, kay siya nagtubo sa usa ka boarding school samtang ang iyang mama, si Georgia, nagkinabuhi nga kalibutanon. Bisan pa sa mga hagit sa iyang pagtubo, si Cherie nagpabiling aktibo sa ebanghelyo, matinud-anong nagsimba uban sa pamilya sa apohan sa tuhod ni Emily o uban sa mga higala. Iyang nakita sa ilang pamilya kon unsay iyang gusto para sa iyang kaugalingon nga pamilya. Wala siya masayud kon unsa gayud ang angay sa usa ka pamilya, apan siya nasayud kon unsay dili angay, ug siya determinado nga mahimong lahi ang iyang umaabot nga pamilya.
Ang bana ni Cherie—akong lolo Dell—makausa misulti nako, “Aron makabaton og pagpamatuod kinahanglan nga imo kining gustuhon. Si Cherie gusto gyud nga makabaton og pagpamatuod.” Bisan ang sayo nga katuigan sa ilang kaminyoon puno sa mga kalisud, sila determinado nga magpabiling lig-on isip pamilya. Sila dili kaayo aktibo sa Simbahan sa unang tuig sa ilang kaminyoon tungod sa eskedyul sa trabaho ni Dell, apan ang calling sa pagserbisyo diha sa Primary nakadasig ni Cherie nga mosugod sa pagsimba, ug si Dell misimba uban kaniya sa simbahan isip advisor sa deacons quorum. Sila nagpabiling aktibo ug lig-on sa Simbahan. Ang kaandam sa pagserbisyo ug determinasyon sa pagpadako og lig-ong pamilya ni Cherie nakatabang sa akong inahan nga mahimong lig-on nga babaye, ug ang ehemplo sa akong inahan nakatabang sa paghulma sa akong kinabuhi, ilabi na karon nga nasugod ko og akong kaugalingon nga pamilya.
Isip mga babaye kita adunay dakong espirituhanong impluwensya sa kinabuhi niadtong nagpalibut kanato. Gani, si Joseph Smith mitudlo nga ang atong tahas “dili lamang sa paghupay sa kabus, apan sa pagluwas sa mga kalag.”1 Si Jesukristo nanawagan sa mga babaye sa Iyang Simbahan nga mahimo Niyang disipulo ug magmalig-on sa espirituhanong paagi. Ang atong espirituhanong kalig-on ug impluwensya mahinungdanon sa kalamboan sa buhat sa kaluwasan, ug kita kinahanglang mangita og mga oportunidad sa paglig-on sa espirituhanong paagi niadtong naglibut kanato. Samtang ato kining buhaton, ang impluwensya sa atong pagtuo ug pagkamatarung molungtad sobra pa kaysa atong makita.
Gitawag nga Mahimong mga Disipulo
Si Elder James E. Talmage (1862–1933) sa Korum sa Napulog Duha ka mga Apostoles misulat, “Ang pinakamaayo sa tibuok kalibutan nga tigsuporta sa babaye ug pagkababaye mao si Jesus ang Kristo.”2 Hunahunaa, sama pananglit, unsay Iyang gitudlo sa duha Niya ka disipulo nga mga babaye diha sa Bag-ong Tugon, ang managsuong Maria ug Marta. Gipasabut diha sa Anak nga mga Babaye sa Akong Gingharian: “Ang Lucas 10 naglangkob sa asoy ni Marta nga naghimong bukas sa iyang panimalay ngadto kang Jesus. Giserbisyuhan niya ang Ginoo pinaagi sa pag-atiman sa temporal Niya nga mga panginahanglan, ug si Maria milingkod dapit sa tiilan sa Manluluwas ug midawat sa Iyang mga pagtulun-an.
“Sa kapanahunan diin ang mga babaye sa kasagaran gilauman nga mosangkap lamang sa temporal nga pag-alagad, gitudlo sa Manluluwas kang Marta ug Maria nga ang mga babaye makaapil usab sa espirituhanong paagi sa Iyang buhat. Siya midapit kanila nga mamahimo nga Iyang mga disipulo ug makaambit sa kaluwasan, kana nga ‘maayo nga bahin’ nga dili gayud kuhaon gikan kanila.”3
Sama ni Marta, usahay kita masayop sa paghunahuna nga ang nag-unang tahas sa mga babaye mao ang paghatag og temporal nga pagserbisyo, sama sa pag-andam og pagkaon, pagpanahi, ug paglimpyo para sa uban. Kini nga pagserbisyo bililhon ug gihambin nga pagserbisyo; apan, labaw pa sa mga sister nga makatahi ug makaluto, ang Ginoo nagkinahanglan og mga babaye nga may espirituhanong gahum kansang pagtuo, pagkamatarung, ug gugmang putli mosanag sa ilang kinabuhi. Siya nasayud nga kita adunay daghang ikatanyag. Si Jesukristo nanawagan kanatong tanan nga palambuon nato ang atong espirituhanong kalig-on ug abilidad sa pagdawat ug pagsunod sa pagpadayag aron makatabang sa pagpadayon sa Iyang buhat. Si Linda K. Burton, kinatibuk-ang presidente sa Relief Society, miingon ngadto sa mga sister, “Gipadala kamo dinhi sa yuta niini nga dispensasyon tungod kon si kinsa kamo ug kon sa unsa nga buhat kamo giandam! Bisan unsa pa ang pagpanglingla ni Satanas kanato sa paghunahuna kon kinsa kita, ang atong tinuod nga pagkatawo mao nga usa ka disipulo ni Jesukristo!”4
Ang Ginoo nakaila kanato ug nasayud sa atong sitwasyon, ug Siya adunay buhat kanatong tanan dinhi sa yuta. Walay sister nga gamay ra og nahibaloan o wala kaayoy talento para mahimong espirituhanon nga gahum alang sa kaayohan ug pagdala sa uban ngadto kang Kristo. Uban niining balaanong potensyal kita adunay responsibilidad nga mahimong espirituhanong mga lider sa atong mga panimalay ug komunidad. Si Elder M . Russell Ballard sa Korum sa Napulog Duha ka mga Apostoles mipahayag: “Ang matag sister niini nga Simbahan kinsa nakahimo og mga pakigsaad uban sa Ginoo adunay balaan nga sugo sa pagtabang sa pagluwas og mga kalag, sa paggiya sa mga babaye sa kalibutan, sa paglig-on sa mga panimalay sa Zion, ug sa pagtukod sa gingharian sa Dios.”5
Dili kinahanglan nga kita anaa sa taas nga posisyon o mobuhat og dili sagad nga mga butang aron pagtabang niadtong naglibut kanato nga mohimo ang mga pagpili nga mas makapaduol nila kang Jesukristo—ang atong pinakaimportante nga buluhaton. Ang pinakadako ug pinakagamay nga butang nga atong buhaton sa kinabuhi sa usa o duha ka tawo, bisan sa ato mismong pamilya, adunay dakong epekto.
Mga Babaye diha sa Buhat sa Kaluwasan
Ang kinaham nga himno namahayag, “Buhat sa anghel naa sa kababayen-an; Kini ang gasa nga atong tukuron.”6 Kita adunay daghang ikahalad sa kinabuhi niadtong atong gihigugma. Si Elder Richard G. Scott sa Korum sa Napulog Duha ka mga Apostoles mipakigbahin og mga istorya kon sa unsang paagi ang espirituhang kalig-on sa duha ka babaye nakaapekto sa iyang kinabuhi:
“Sa bata pa ako, ang akong amahan dili miyembro sa Simbahan ug ang akong inahan nahimong dili aktibo. … Pipila ka bulan human sa akong ikawalong adlaw nga natawhan, si Lola Whittle milatas sa nasud sa pagbisita namo. Si Lola nabalaka nga ako ni ang akong magulang nga lalaki wala mabunyagi. Wala ako mahibalo unsay iyang gisulti ngadto sa akong mga ginikanan mahitungod niini, apan ako nasayud nga usa ka buntag gidala niya ang akong igsoong lalaki ug ako ngadto sa parke ug mipakigbahin kanamo sa iyang mga pagbati mahitungod sa importansya nga mabunyagan ug sa pagsimba kanunay. Wala ko makahinumdom sa partikular nga mga pulong nga iyang gisulti, apan kini nakatandog sa akong kasingkasing, ug sa wala madugay ang akong igsoong lalaki ug ako gibunyagan. …
“Si Lola migamit og igo lang kaisug ug pagtahud aron pagtabang sa among amahan nga makaila sa importansya sa paghatud namo sa simbahan para sa among mga miting. Sa tukma kaayong paagi, mitabang siya namo nga among mabati ang kaimportante sa ebanghelyo sa among kinabuhi.”7
Ang ikaduhang tinubdan sa espirituhanong kalig-on mao ang asawa ni Elder Scott, si Jeanene. Sa dihang sila nag-date naghisgot sila sa ilang kaugmaon. Si Jeanene, kinsa nagtubo sa panimalay nga lig-on ang tradisyon sa pagmisyon, mipahayag sa iyang tinguha nga maminyo sa usa ka returned missionary ngadto sa templo. Si Elder Scott, kinsa wala pa kaayo maghunahuna kabahin sa pag-misyon, natandog og maayo. “Miuli ko sa balay, ug ako walay nay laing mahunahuna pa. Wala ko makatulog sa tibuok gabii. … Human sa daghang mga pag-ampo mihukom ko nga makigkita sa akong bishop ug gisugdan akong pag-apply og misyon.”8 Bisan tuod si Jeanene mihatag kaniya sa giya ug pagdasig nga iyang gikinahanglan, si Elder Scott miingon, “Si Jeanene wala gayud misugo nako nga mag-misyon para niya. Gihigugma ko niya igo nga gipakigbahin ang iyang konbiksyon ug dayon gihatagan ko og oportunidad sa pagpili sa direksyon sa akong kinabuhi. Kaming duha miserbisyo og misyon ug sa wala madugay kami na-sealed sa templo. Ang kaisug ug pasalig ni Jeanene ngadto sa iyang tinuohan nakahimo sa tanang kalainan sa among kinabuhi. Ako nakasiguro nga dili unta namo makaplagan ang kalipay nga among natagamtam kon wala ang iyang lig-on nga pagtuo sa baruganan sa pagserbisyo og una sa Ginoo. Siya maayo kaayo, matarung nga panig-ingnan!”9
Ang espirituhanon nga impluwensya niining mga babaye sa iyang kinabuhi nakatabang niining batan-ong lalaki—Elder Scott—sa paghimo sa pipila ka labing importante nga desisyon sa iyang kinabuhi: mabunyagan, magmisyon, ug maminyo sa templo.
Kita makatabang sa uban sa paghimo og matarung nga mga desisyon pinaagi sa atong ehemplo, mga lihok, mga pulong, ug personal nga pagkamatarung. Si Sister Carole M. Stephens, unang magtatambag sa kinatibuk-ang kapangulohan sa Relief Society, mipahayag, “Kita anak nga mga babaye sa pakigsaad diha sa gingharian sa Ginoo, ug kita adunay oportunidad nga mahimong mga instrumento sa Iyang mga kamot. … Sa atong pag-apil sa buhat sa kaluwasan kada adlaw sa gagmay ug yano nga mga paagi—pagbantay, paglig-on, ug pagtudlo sa usag usa.”10 Samtang kita mosalig sa Espiritu ug mopadayon sa unahan sa matinuoron ug mapainubsanong mga paningkamot sa pagtabang niadtong naglibut kanato nga mas maduol kang Kristo, kita magiyahan sa atong gibuhat ug malig-on sa pagbuhat niini, ug atong mabati ang hingpit nga kalipay sa pagdala sa mga anak sa Ginoo ngadto Kaniya.
Mamahimong usa ka Espirituhanon nga Impluwensya
Aron masayud sa atong responsibilidad, mangutana kita sa mga disipulo sa una, “Unsa may among pagabuhaton” (Mga Buhat 2:37) aron mahimong impluwensya sa espirituhanong paagi? Sa bag-ohay nga kinatibuk-ang komperensya, si Sister Burton midapit sa mga sister sa paghunahuna og “pipila ka posibling mga karatula sa ‘tabang nga gikinahanglan’ sa espirituhanong paagi kalabut sa buhat sa kaluwasan:
-
Tabang nga gikinahanglan: mga ginikanan nga mopadako sa ilang mga anak diha sa kahayag ug kamatuoran
-
Tabang nga gikinahanglan: mga anak nga babaye … , mga igsoong babaye . … mga iyaan … , mga ig-agaw, mga apohan, ug tinuod nga mga higala nga moserbisyo isip tigtudlo ug motabang diha sa dalan sa pakigsaad
-
Tabang nga gikinahanglan: kadtong maminaw sa mga pag-aghat sa Espiritu Santo ug molihok base sa mga panghunahuna nga nadawat
-
Tabang nga gikinahanglan: kadtong mosunod sa ebanghelyo matag adlaw sa ginagmay ug yano nga mga paagi
-
Tabang nga gikinahanglan: mga family history ug temple worker nga mosumpay sa mga pamilya sa hangtud
-
Tabang nga gikinahanglan: mga misyonaryo ug mga miyembro nga mosangyaw sa “maayong mga balita”—ang ebanghelyo ni Jesukristo
-
Tabang nga gikinahanglan: mga tigluwas nga mangita sa mga nahisalaag
-
Tabang nga gikinahanglan: mga motuman sa pakigsaad nga lig-ong mobarug alang sa kamatuoran ug matarung
-
Tabang nga gikinahanglan: tinuod nga mga disipulo ni Ginoong Jesukristo.”11
Dili kini bag-ong mga butang, apan kon kita mangita og mga oportunidad sa pag-apil sa buhat sa kaluwasan, atong mapalambo ang atong abilidad sa pagtabang sa atong palibut. Si Elder Ballard miingon, “Walay lain dinhi niining kalibutan nga ingon ka personal, ingon ka maamumahon, o makausab sa atong kinabuhi sama sa impluwensya sa usa ka matarung nga babaye.”12 Samtang atong gipalambo ang atong espirituhanong gahum pinaagi sa personal nga pag-ampo ug pagtuon sa kasulatan, hingpit nga pagkamasulundon, ug matinud-anong motuman sa atong mga pakigsaad, kita mamahimo niana nga impluwensya.
Lapas pa sa Unsay Atong Makita
Si Presidente Brigham Young (1801–1877) miingon, “Kahibalo ba mo sa kadako sa kaayohan nga mahimo sa mga inahan ug anak nga mga babaye sa Israel? Wala, imposible kana. Ug ang kaayohan nga ilang mahimo magauban kanila ngadto sa kahangturan.”13
Ang matarung nga desisyon sa akong lola nakaapekto og maayo sa iyang pamilya lapas pa sa iyang nakita isip batan-ong babaye. Hinoon, ang espirituhanong impluwensya sa mga babaye sa akong pamilya mas nahiuna pa. Si Cherie nakaangkon sa iyang espirituhanong kalig-on gikan sa pag-obserbar sa iyang apohan sa tuhod (akong ikatulo nga apohan sa tuhod) si Elizabeth. Ang ehemplo ni Elizabeth sa hugot nga pagtuo ug pagpamatuod milahutay lapas sa duha ka henerasyon nga pagkadili aktibo aron sa pagtabang sa iyang apo sa tuhod nga si Cherie nga mausab ang naandang pagkabungkag sa pamilya ug aron mabalik sa Simbahan.
Samtang kita mahimong espirituhanong kalig-on niadtong naglibut kanato, ang atong impluwensya molapas pa sa atong nakita. Si Presidente Gordon B. Hinckley (1910–2008) miingon, “Gitawag nato ang mga babaye sa Simbahan sa pagbarug alang sa pagkamatarung. Kinahanglang sugdan nila sa ilang kaugalingong mga panimalay. Matudlo nila kini sa ilang mga klase. Masulti nila kini sa ilang mga komunidad. …
“Akong nakita kini nga usa ka mahayag nga paglaum sa usa ka kalibutan nga paingon ngadto sa kaugalingong kalaglagan.”14
Samtang atong gituman kining sugo, ang buhat sa Ginoo magpadayon sa atong palibut ug, labing importante, sa atong mga pamilya ug sa kinabuhi niadtong atong gihigugma.