Atong mga Panimalay, Atong mga Pamilya
Family Home Evening—Inyo Kining Mahimo!
Bisan unsa pa nga matang ang inyong pamilya, ang family home evening makapanalangin ug makalig-on kaninyo.
Mga litrato sa kasaysayan sa maayong kabubut-on sa Brigham Young University; litrato sa pintal pinaagi sa iStock/Thinkstock
Ang usa ka amahan miuli nga gikapoy human sa tibuok adlaw nga trabaho ug nakakita nga ang ubang sakop sa iyang pamilya nanlimbasug sa samang saputon nga pagbati. Lunes sa gabii kadto, ug ang pag-family home evening ingon og imposible. Human sa pag-ampo og panabang, ang amahan ug inahan mihukom nga himoong yano ang mga butang. Ilang gitawag ang tanang sakop sa pamilya, nanganta og himno, ug nag-ampo. Ilang gihatagan ang matag sakop sa pamilya og gamayng kandila samtang sila naghisgot kabahin sa butang nga bag-ohay lang nakadasig kanila. Sa ngitngit nga kwarto, ang kahayag sa kandila nagrepresentar og inspirasyon ug nakatutok ang atensyon sa mga bata. Samtang ang mga pagpamatuod gipakigbahin, ang kalinaw ug gugma nabati diha sa panimalay. Gitapos sa pamilya ang gabii nga mapasalamaton nga sila nakahimo og home evening.
Kahibalo ba mo nga ang family home evening programa na sa Simbahan sulod sa 100 ka tuig? Niadtong Abril 1915, ang Unang Kapangulohan misugo sa mga miyembro nga mogahin og usa ka gabii matag semana para mag-ampo ang pamilya, manganta, magkat-on sa ebanghelyo, magsaysay og istorya, ug para sa mga kalihokan. (Tan-awa sa pahina 80 para sa kinutlo gikan sa sulat sa Unang Kapangulohan.) Ang mga propeta nagpadayon sa pagpahinumdom kanato sa kaimportante sa family home evening. “Dili kita makatugot nga ibaliwala kining dinasig sa langit nga programa,” miingon si Presidente Thomas S. Monson. “Makahatag kini og espirituhanon nga kalamboan sa kada miyembro sa pamilya, makatabang sa lalaki ug babaye nga makalikay sa mga tintasyon nga anaa bisan asa.”1
Ania ang pipila sa mga kinaiya nga angayang hunahunaon samtang himoon ninyo ang family home evening nga kabahin sa inyong semana:
Kini para usab kanako. “Ang mga family home evening para sa tanan,” miingon si Elder L. Tom Perry sa Korum sa Napulog Duha ka mga Apostoles.2 Kitang tanan—minyo o dili, may mga anak o wala—makagahin og panahon sa paglig-on sa pamilya ug magkat-on sa ebanghelyo.
Makagahin ko og panahon. Ang Simbahan nagpakita sa ehemplo pinaagi sa paggahin sa Lunes sa gabii nga walay mga kalihokan sa Simbahan. Inyong mapakita sa Ginoo ug sa inyong pamilya nga kamo andam sa paggahin og panahon alang niadtong labing mahinungdanon.
Makakaplag ko kon unsay epektibo para sa akong pamilya. Kon ang inyong pamilya nagkabulag og lugar, sulayi ang “family online evening” aron makig-istorya sa mga sakop sa pamilya online o sa telepono. Aduna bay usa ka sakop sa pamilya nga kinahanglang magtrabaho og dugay? Paghimo og “family park evening” duol sa trabahuan atol sa break. Ang nadiborsyo nga amahan mipahigayon og “family letter evening” kada Lunes, nagsulat sa iyang mga anak kinsa nagpuyo sa layo.3 Himoon ang mga babag nga oportunidad para sa mas maayong pagkamamugnaon.
Makasugod ko karong semanaha. Ang family home evening mahimong i-organisar sumala sa mga panginahanglan ug sirkumstanya sa inyong panimalay. Ania ang pipila sa kinatibuk-ang mga sugyot:
-
Magsugod ug tapuson sa pag-ampo.
-
Maggamit og musika, lakip na ang himno ug mga kanta sa Primary.
-
Magkat-on gikan sa kasulatan ug modernong mga propeta.
-
Maglakip og lain-laing pisikal nga mga kalihokan, mga proyekto sa pagserbisyo, ug mga kalihokan nga nakasentro sa ebanghelyo matag semana.
-
Maglingaw-lingaw! Magdula o mag-andam og meryenda.
-
Magmakanunayon. Kon dili ninyo mabuhat sa Lunes, pangita og laing adlaw nga inyong mabuhat.
Gusto nako ang mga panalangin. Ang mga propeta misaad nga kon kita moapil sa family home evening, dagkong mga panalangin ang moresulta: Gugma ug pagkamasulondon diha sa panimalay mas molambo. Ang pagtuo molambo diha sa mga kasingkasing sa kabatan-onan. Ang mga pamilya “makaangkon og gahum sa pagbuntog sa mga impluwensya ug tintasyon sa yawa” nga nagpalibut kanila.4
Samtang ang inyong mga family home evening mahimong dili kanunay hingpit nga mga kasinatian, ang inyong pamilya malig-on ug mapanalanginan sa inyong mga paningkamot. “Ang matag family home evening usa ka badlis diha sa hulagway sa atong mga kalag,” mitudlo si Elder David A. Bednar sa Korum sa Napulog Duha ka mga Apostoles. “Walay usa ka panghitabo nga makita nga madanihon kaayo o halandumon. Apan sama sa … mga linya sa pintal nagtinabangay sa usag usa ug nimugna og usa ka makadani kaayo nga buhat sa kahanas, mao nga ang atong pagkamakanunayon sa paghimo og daw gagmayng mga butang modala ngadto sa mahinungdanong mga sangputanan.”5