Mensahe sa Visiting Teaching
Ang mga Kinaiya ni Jesukristo: Walay Pagpanglimbong o Pagpakaaron-ingnon
Tun-i sa mainampuong paagi kini nga materyal ug tinguhaa nga masayud unsa ang angay nga ipakigbahin. Sa unsang paagi nga ang pagsabut sa kinabuhi ug tahas sa Manluluwas makapalambo sa inyong hugot nga pagtuo diha Kaniya ug mopanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang pagsabut nga si Jesukristo walay pagpanglimbong ug pagpakaaron-ingnon makatabang nato nga magmatinud-anon nga maningkamot sa pagsunod sa Iyang ehemplo. Si Elder Joseph B. Wirthlin (1917–2008) sa Korum sa Napulog Duha ka mga Apostoles miingon: “Ang pagpanglimbong mao ang pag-ilad o pagsaag. … Ang usa ka tawo nga walay pagpanglimbong mao ang usa ka tawo nga walay sala, matinuoron og tuyo, ug putli ang mga motibo, kansang kinabuhi nagpakita sa yanong mga buhat nga nagpahiangay sa [iyang] inadlaw nga mga aksyon sa mga baruganan sa kaligdong. … Ako nagtuo sa panginahanglan alang sa mga miyembro sa Simbahan nga dili manglimbong tingali mas dinalian karon kay sa ubang panahon tungod kay daghan sa kalibutan wala makasabut sa kaimportante niini nga hiyas.”1
Sa pagpakaaron-ingnon, si Presidente Dieter F. Uchtdorf, Ikaduhang Magtatambag sa Unang Kapangulohan, miingon: “Walay usa nato ang ingon ka sama kang Kristo nga mao unta ang angay. Apan tinguha nato nga mabuntog ang atong mga sayop ug ang kalagmitan sa pagpakasala. Sa atong kasingkasing ug kalag nangandoy kita nga mas momaayo pinaagi sa tabang sa Pag-ula ni Jesukristo.”2
Kita nasayud nga “kita pagahukman sumala sa atong mga lihok, sa tinguha sa atong mga kasingkasing, ug sa matang sa mga tawo nga kita mahimo.”3 Apan kita naningkamot sa paghinulsol, kita mahimong mas putli — ug “bulahan ang mga putli og kasingkasing: kay sila makakita sa Dios” (Mateo 5:8).
Dugang nga mga Kasulatan
Gikan sa mga Kasulatan
Ang mga bata walay pagpanglimbong. Si Jesukristo miingon: “Paduola kanako ang gagmayng kabataan, ug ayaw ninyo sila pagpugngi, kay ang gingharian sa Dios ila sa mga sama kanila.” … Ug gikugos niya sila ug sa gipandungan niya sila sa iyang mga kamot, iyang gipanalanginan sila” (Marcos 10:14, 16).
Si Kristo nangalagad usab sa mga bata didto sa Amerika human sa Iyang Pagkalansang. Siya misugo nga ang mga tawo modala sa ilang gagmay nga mga bata ngadto Kaniya ug “gipalingkod sila sa yuta libut kaniya, ug si Jesus nagbarug sa taliwala; …
“… [Ug] siya mihilak, ug ang pundok sa mga katawhan nakasaksi niini, ug siya mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila. …
“Ug samtang sila mipunting sa ilang mga mata paingon sa langit, ug sila nakakita sa langit nga naabli, ug sila nakakita sa mga anghel nanaog gikan sa langit nga ingon og diha sa taliwala sa kalayo; ug sila nanaog ug gialirongan kadtong gagmay nga mga bata, … ug ang mga anghel nangalagad ngadto kanila” (3 Nephi 17:12, 21, 24).