Koha e Shkrimit të Shenjtë

Jezusi Shëron një Lebros

Nga Erin Sanderson

Autorja jeton në Juta, SHBA.

Mësoni së bashku rreth Dhiatës së Re këtë vit!

Mendoni për një rast kur ju ishit i sëmurë. A bëri dikush diçka të mirë për t’ju ndihmuar të ndiheni më mirë?

Në Dhiatën e Re ne lexojmë për mënyrën se si Jezusi tregoi dashamirësi ndaj njerëzve që ishin të sëmurë. Një ditë, një burrë me një sëmundje të dhimbshme të lëkurës të quajtur lebër, shkoi te Jezusi. Ai e dinte se Jezusi kishte fuqinë që të shëronte këdo që ishte i sëmurë. Ai besonte se Jezusi mund ta shëronte atë. Jezusi e preku lebrosin dhe tha: “Qofsh pastruar” (Marku 1:41). Sapo Jezusi pati folur, burri u shërua.

Ne mund t’i ndjekim gjurmët e Jezusit duke qenë të mirë dhe të dashur ndaj të tjerëve që janë të sëmurë ose të pikëlluar.

Mësoni më Shumë: Ungjijtë

Dhiata e Re ka katër libra të veçantë të quajtur Ungjij, të cilët u shkruan nga disa prej dishepujve të Jezusit. Ungjijtë tregojnë rreth kohës kur Jezu Krishti jetoi në tokë. Historia e shërimit të lebrosit është në tre prej Ungjijve. Ajo është te Marku 1:40–42 dhe gjithashtu te Mateu 8:2–4 dhe Lluka 5:12–14.

Ide për Bisedë Familjare

Ju mund të përdorni figurat nga shkrimet e shenjta në faqen 74 për të treguar historinë nga Marku 1:40–42. Pastaj ju mund të lexoni te Judë 1:22 dhe të planifikoni se si të bëni diçka si familje, për të bërë një ndryshim në jetën e dikujt. Ndoshta ju mund t’i shërbeni dikujt në fshehtësi!

Kënga: “Tell Me the Stories of Jesus” [“Historitë e Jezusit m’Trego”] (Children’s Songbook, nr. 57)

Shkrimi i Shenjtë: Marku 1:40–42

Videot: Shkoni te Biblevideos.org për të parë “Jesus Heals a Lame Man on the Sabbath” [“Jezusi Shëron një Burrë të Çalë në Shabat”] dhe “Jesus Heals a Man Born Blind” [“Jezusi Shëron një Njeri të Lindur të Verbër”].

Ndjekja e Gjurmëve të Jezusit

Me familjen tuaj, interpretoni me role mënyrën se si ju mund të tregoni dashuri për të tjerët në këto situata. Improvizoni disa nga vetë situatat tuaja.

• Një familje e re ka ardhur në lagjen tuaj.

• Disa fëmijë po tregohen të këqij me një fëmijë tjetër në shkollë.

• Një vizitor që nuk njeh askënd në kishë, vjen në Fillore.

• Vëllai ose motra juaj më e vogël nuk ka asnjë njeri me kë të luaj.

• Foshnja po qan dhe nëna juaj po përpiqet të bëjë darkën.

• Një njeri në lagjen ose degën tuaj është i sëmurë dhe nuk mund të lëvizë nga shtëpia.

Këshillë për Shkrimin e Shenjtë: Kërkim për fjalë

Te Marku 1:41 përdoret fjala mëshiruar. Ndonjëherë në Bibël ka fjalë të mëdha që mund të mos i kuptoni. Kur gjeni një fjalë që nuk e dini, ju mund të përdorni Udhëzuesin për Shkrimet e Shenjta që t’ju ndihmojë! Për shembull, ju mund të kërkoni fjalën “Mëshirë” për të zbuluar se çfarë kuptimi ka dhe për të gjetur shkrime të tjera të shenjta që e përdorin atë. Çfarë fjalësh të tjera mund të kërkoni te historia e Jezusit që shëroi burrin me lebër?