Oa o le Molimau
E alala le tusitala i Amazonas, Pasila.
O a ituaiga o oa e faateleina pe a e faasoaina atu?
“Ma o lenei ua ou iloa mo au lava ia … ona o le Alii le Atua na ia faailoa mai nei mea ia te au e ala mai i lona Agaga Paia” (Alema 5:46).
Sa vaavaai atu Sabrina a o savavali atu Tina i le faitotoa ma o latou tuaoi. “Faafetai lava mo le tusi lenei,” o le tala lea a le tamā. Sa ia uuina se Tusi a Mamona.
“Tina, aisea e te talanoa ai i tagata uma e uiga i le Ekalesia?” Na fesili ai Sabrina mulimuli ane, a o la fufulu ipu faatasi.
“Ona o lau molimau i le Ekalesia e pei o se oa taua,” o le tala lea a Tina. “Ou te maua ai le fiafia. Ma ou te manao e faasoa atu i isi ina ia mafai foi ona latou fiafia!”
Sa vaai faalemafaufau Sabrina i le asoa iila a Tina o loo i lana pusa o teuga mea feilafi. “O le a le uiga o lau tala e pei o se oa taua?”
“Ia, o se molimau e taua tele,” o le tala lea a Tina. “O se meaalofa mai le Tama Faalelagi e fesoasoani tatou te iloa ai po o le a le mea moni.”
“Na faapefea ona e mauaina?” Sa manao ai Sabrina ia iloa.
Sa tuu atu e tina ia Sabrina se ipu mama manaia e solo faamago. “Sa ou mauaina sina mea itiiti i lea taimi ma lea taimi. Pe a ou tatalo pe faitau i tusitusiga paia, ou te lagona le toafilemu ma le mafanafana i totonu. E pei lava o loo ou faaopoopo atu i oa o lau molimau.”
Sa luelue lemu le ulu o Sabrina. Mata e mafai ona ia maua se oa o le molimau?
I le Aso Sa, sa faamatala ai e le faiaoga o Sabrina se tala e uiga ia Iesu Keriso. Sa faalogologo ma le totoa Sabrina. Na fai mai Uso Lopez sa valaaulia e Iesu ia tamaiti laiti uma e o mai ia te Ia. Sa ia faamanuiaina ma aoao i latou. Ina ua mafaufau Sabrina e uiga ia Iesu, sa amata ona ia lagona le mafanafana i lona loto.
Sa faatopetope atu Sabrina e sue Tina ina ua tuua le Peraimeri. “Tina, mate mai la?” Sa ia faamatala atu ia Tina e uiga i le lagona mafanafana.
“Tai manaia,” na fai mai ai Tina. “O le lagona lena, o le taimi lea e pai mai ai le Agaga Paia i o tatou loto ma faailoa mai ia i tatou e moni le talalelei.”
Sa ataata atu Sabrina ia Tina. “O le mea lena na tupu! Sa fiafia lou loto.” Sa matuai filemu le Agaga Paia o lea na iloa ai e Sabrina, semanu na te le iloaina o Ia pe ana faapea e le faaaloalo.
Sa fusi mau o ia e Tina. “O lena ua maua la oe lava oa o le molimau.” Sa fusi mai foi e Sabrina ia Tina. Sa manao o ia e faasoa atu lana oa i tagata uma—e pei lava ona sa faia e Tina! Ae e faapefea ona ia faia lena mea?
O le po lena na maua ai e Sabrina se kata fepasiai o loo i ai i luma se ata o Iesu. Sa ia momonoina i totonu o lana ato faafafa.
O le aso na sosoo ai i le taimi o le malologa puupuu, na manatua ai e Sabrina le kata. Sa ia aumaia i fafo ma alu loa e sue lana uo o Carla. “Ia, Carla, o le mea lea mo oe,” na fai atu ai Sabrina.
Sa uumau e Carla le kata. “Faafetai! Ou te fiafia lava i ata o Iesu.”
Sa faasino e Sabrina ia Carla le uepisaite i le pito i tua. “E mafai ona e aoao atili e uiga i le Ekalesia a Iesu ii.”
“O le a le ekalesia lena?” Na fesili ai Carla.
“O Le Ekalesia a Iesu Keriso o le Au Paia o Aso e Gata Ai,” na fai atu ai Sabrina. “O le alu i le lotu ma le aoao e uiga ia Iesu ou te maua ai le fiafia.”
Sa tuu e Carla le kata i lana taga. “O le a ou tago nei e faaali atu le kata lea i lou tina.”
I ni nai vaiaso mulimuli ane, sa tamoe atu ai Carla ia Sabrina a o lei amataina le vasega. “E i ai se mea ou te fia tau atu ia te oe!” o lana tala lea. Sa i ai se ataata lapoa i ona foliga.
Sa fiafia lava Sabrina. O le a lea mea? Sa ataata Carla. “Na o lou aiga i le tou lotu! Ma sa pei lava ona e fai mai ai—sa ou lagona le fiafia iina.”
“Sa ou iloaina o le a e lagona le Agaga Paia!” O le tala lea a Sabrina.
“Ma ou te manatu o le a matou papatiso i se taimi e le o toe mamao!”
Sa osooso Sabrina ma fusi ia Carla. O lea la o le a mafai ona faasoa faatasi a la oa o le molimau!