Savali a le Au Peresitene Sili
Tulaueleele Saogalemu i Taimi o Faafitauli
Ata © iStock/Thinkstock
E lei leva atu na ma i ai ma lou toalua o Harriet, i se malae vaalele e matamata i le tulaueleele o vaalele matagofie. Sa o se aso savili, ma sa malosi le tofaatautau o savili matamataita faasaga i vaalele na agai mai, lea sa mafua ai ona tifatifa ma gatete ia vaalele taitasi i le taimi e latalata mai ai.
A o ma matauina le tauiviga i le va o le natura ma masini, sa toe foi lou mafaufau i au lava aoaoga avevaalele ma mataupu faavae sa ou aoaoina iina—ma mulimuli ane, aoaoina atu i isi pailate aooga.
Sa masani ona ou tau atu ia i latou, “E aua le taumafai e ivi ma mea faatonutonu o le vaalele i le taimi o faafitauli. “Ia to’a pea; aua le faavevesia. Ia taulai atu lau vaai i le laina ogatotonu o le auala o vaalele. Afai e te aluese mai lou auala manaomia ua oo mai, ia vave fai faasa’oga ae ia faaeteete. Faalagolago i le gafatia o lau vaalele. Lele pea seia uma le faafitauli.”
Ua malamalama pailate ua i ai le potomasani, e le o taimi uma e mafai ai ona latou pulea mea e tutupu e siomia ai i latou. E le mafai lava ona latou tapeina le faafitauli. E le mafai ona latou faanimoa le timu po o le kiona. E le mafai ona latou taofia le agi a le savili pe suia lona alasavili.
Ae ua latou malamalama foi o se mea sese le fefe i le faafitauli po o savili malolosi—ae maise lava o le le mafai ona faia o se mea. O le auala e tulaueleele saogalemu ai pe afai e oo i ni tulaga le lelei, o le tumau i le ala sa’o ma le auala e sesee ai i le atoatoa e mafai ai.
A o ou vaavaai atu i le faiga mulimuli o le taunuu mai o lea vaalele ma lea vaalele, ma toe manatua ai mataupu faavae na aoaoina mai tausaga na avea ai a’u o se pailate, sa ou manatunatu pe le o i ai se lesona i lenei mea mo o tatou olaga i aso taitasi.
E le o taimi uma e mafai ai ona tatou pulea afā e tuu mai e le olaga i o tatou ala. O nisi taimi e le ogatasi ai fuafuaga e pei ona tatou mananao ai. Atonu tatou te lagonaina le luluina ma le lelea solo i faafitauli o le le fiafia, masalosalo, fefe, faanoanoa po o mamafatu o le mafaufau.
I le aluga o na taimi, e faigofie lava ona lofituina i mea uma ua sese, ma fai ai o tatou faafitauli ma totonugalemu o o tatou mafaufauga. O le faaosoosoga o le, ia taulai atu i tofotofoga o loo tatou feagai, nai lo o le Faaola ma la tatou molimau o le upumoni.
Ae peitai, e le o le auala sili ona lelei lena e uia i o tatou luitau i le olaga.
E pei ona le tausisi le tulimatai atu a se pailate ua potomasani i le matagi, ae i le ogatotonu o le auala o le vaalele ma le vaega tonu e tulaueleele ai, e faapena foi ona tatau ona tausisi lo tatou tulimatai atu i le ogatotonu o lo tatou faatuatua—o lo tatou Faaola, Lana talalelei, ma le fuafuaga a lo tatou Tama Faalelagi—ma i la tatou sini aupito taua—ia toe foi atu ma le saogalemu i lo tatou taunuuga faalelagi. E tatau ona tatou faalagolago i le Atua ma ia avea le tumau i le ala o le avea ma soo o le taulaiga o a tatou taumafaiga. E tatau ona tumau le taulai atu o o tatou mata, loto, ma mafaufau i le ola ai i le ala ua tatou iloa e tatau ona tatou [ola ai].
O le faaali atu o lo tatou faatuatua ma le faalagolago i le Tama Faalelagi e ala i le tausia ma le fiafia o Ana poloaiga, o le a aumaia ai ia i tatou le fiafia ma le mamalu. Ma afai tatou te tumau i le ala, o le a tatou sao mai soo se faafitauli—e tusa lava po o le a le malosi e foliga mai ai—ma toe foi atu ma le saogalemu i lo tatou aiga faalelagi.
E tusa lava pe lagilelei ia lagi e siomia ai i tatou, pe tumu foi i ao taufaamata’u, ae i le avea ai ma soo o Iesu Keriso, tatou te saili muamua i le malo o le Atua ma Lana amiotonu, ma le iloa afai tatou te faia faapea, o isi mea uma tatou te manaomia, o le a iu lava ina maua (tagai i le Mataio 6:33).
Se lesona o le olaga ina a taua!
O le tele o lo tatou taulai atu i o tatou faafitauli, o tatou tauiviga, o tatou masalosaloga, ma mea tatou te matatau ai, o le a atili faigata ai ia mea. Ae o le tele o lo tatou taulai atu i lo tatou taunuuga mulimuli faalelagi ma i olioliga o le mulimuli i le ala o le [avea ma] soo—o le alofa i le Atua, auauna atu i lo tatou tuaoi—o le sili atu foi lea ona lelei o le tatou tumau i taimi o fatiatama’i ma faafitauli.
Uo pele, e tusa lava pe o le a le saua o le uu o savili e siomia ai i tatou i lo tatou olaga i le tino, o le a ofoina mai e le talalelei a Iesu Keriso i taimi uma le ala e sili ona lelei i se tulaueleelega saogalemu i le malo o lo tatou Tama Faalelagi.