Taitaia o se Talanoaga Anoa Faalevaega

Saunia e Dustin West

Seminare ma Inisitituti

O talanoaga anoa o le talalelei e mafai ona pei o le taitaia o musika matagofie. O se tasi o tiute autu a le faiaoga o le faatautaia lea o le talanoaga, ina ia maua e tagata aoga le avanoa e lagona ai le Agaga ma iloa e i latou lava ia upumoni.

Pe a e taitaia se talanoaga o le talalelei, atonu e aoga le mafaufau o oe o se taitai o se au faili. O i latou o loo e aoaoina e le o le au maimoa e faalogologo i le koneseti. O loo i ai i latou i le au faili, e ta a latou vaega e fatu ai le musika. O le taitai e faamaopoopoa le au musika, e aumai i fafo le mea e sili ia i latou taitoatasi, ma fesoasoani i la latou musika ia avea ma se galuega faatufugaga musuia.

O talanoaga anoa o le talalelei e mafai ona pei o musika matagofie. O se talanoaga lelei e iu i se malamalama loloto atu o aoaoga faavae o le talalelei o loo talanoaina, faapea foi ma se manao faamaoni e faaaoga upumoni o le talalelei.

O nisi nei o ni nai mataupu faavae o le a faaleleia atili ai le talanoaga e te taitaia:

Aoao tagata, ae le o lesona. O i latou e te aoaoa o le a sili atu ona naunau e auai i talanoaga pe a latou lagona, e sili atu ona e manatu ia i latou nai lo le faaumaina o le lesona. E mananao tagata aoao e lagona ua e saunia oe lava e faamalosia ma faateleina lo latou faatuatua i le Alii, nai lo na o le tuuina atu o ni mea moni. O tagata aoao o e lagona e alofagia i latou e faiaoga ma isi tagata o le vasega, o le a sili atu le naunau e faasoa malamalamaaga ma aafiaga.

Valaaulia musumusuga. O le taimi e faatasitasi ai, o se avanoa lea mo oe ma i latou e te aoaoa e maua ai faaaliga, ae e le na o se avanoa e te faasoa atu ai mea ua e iloa. O se tasi o tiute autu a le faiaoga o le faatautaia lea o le talanoaga, ina ia maua e tagata aoga le avanoa e lagona ai le Agaga ma iloa e i latou lava ia upumoni. Pe a solo mai faaaliga, e faamalamalamaina ai tagata uma—le faiaoga ma tagata aoao—ma olioli faatasi ai (tagai i le MF&F 50:22). E mafai ona e iloa o loo faagaeetia a outou talanoaga pe a e aoao mai i le Agaga faapea foi ma le aoao atu e ala i le Agaga.

Valaaulia tagata uma e auai. O le auai e le o le faapea, e tatau lava ona tali leotele mai tagata uma i se fesili. O nisi e mananao e auai e ala i le na o le faalogo po o le tusitusi o faamatalaga. O isi e naunau e faasoa mai o latou manatu pe a faapea e i ai se taimi e mafaufau loloto ma saunia ai. Atonu e te mafaufau e logo nisi o i latou o loo e aoaoa a’o le’i faia le lesona, ma fai i ai e o mai saunia e faasoa mai o latou manatu i se autu patino.

O loo i ai ni isi auala e fesoasoani ai i tagata aoao ia auai i le talanoaga. Mo se faataitaiga, e mafai ona e:

• Fai atu ia i latou e mafaufau loloto pe faapefea ona latou talia se fesili a o lei e talosaga atu mo ni tali.

• Fai atu ia i latou e tusi a latou tali i luga o se fasi pepa. Ona e fai atu lea i nisi o i latou e faasoa atu a latou tali i isi.

• Valaaulia i latou e tali i fesili ma se tasi o saofai i o latou autafa po o i ni vaega toalaiti.

O nisi taimi atonu e i ai se tagata o le vaega e fuaaoina le talanoaga. Afai e tupu lenei mea, e mafai ona e fai atu, “Sei o tatou faalogologo atu i se tasi e le’i faasoa mai.” O nisi o tulaga, atonu e tatau ai ona talanoa faalilolilo i lenei tagata e faafetai ia te ia mo le faasoa, ma faamalamalama i ai le taua o le uunaia o isi tagata auai e faasoa mai.

Aua le fefe i le filemu. O le filemu atonu e pei o se sāō i la outou talanoaga, ae mo tagata aoao e mafai ona avea o se taimi taua o le mafaufau loloto.

Fai atu ni fesili anoa. Fai atu fesili e uunaia ai tagata aoao ia mafaufau loloto i le uiga o fuaitau o mau ma mataupu faavae o le talalelei. A o sauni lau lesona, mafaufau i fesili o le a fesoasoani ia i latou o loo e aoaoa ia malamalama ai ma faaaoga upumoni o loo latou aoaoina. O ni nai fesili e lelei ona faaupuina e mafai ona faia ai se eseesega tele.

Faalogo ma le toto’a. O le tele o taimi e popole ai faiaoga po o le a le isi mea o le a tau atu, ma latou le faalogo totoa ai i manatu faaalia. Afai e te faalogologo ma le faamaoni ia i latou e te aoaoa, o le a latou lagona le faatauaina ma e tele se avanoa e ono auai ai. Na saunoa mai Peresitene Thomas S. Monson: “O [tagata] uma lava o loo tofu ma se tala e faamatalaina. O le faalogo o se elemene taua a o tatou aoao atu ma a o tatou aoao mai” (“O Faataitaiga o Faiaoga Maoae,” Liahona, Iuni 2007, 76).

Fai atu fesili tulitatao. A faasoa mai e tagata aoao malamalamaaga ma aafiaga, atonu e te lagona e tele atu ni mea latou te fia faasoa mai. Mafaufau e fai atu fesili tulitatao e pei o nei: O le a se mea e taua ia te oe? O le a se taimi na e vaaia ai lenei mea i lou olaga? O le a le uiga o lenei mea ia i tatou i aso nei? O ai se isi tagata e i ai se manatu e uiga i lenei mea? O ai e i ai se manatu e faatatau i ai latou te fia faasoa mai? O a nisi fuaitau o tusitusiga paia o loo aoao mai i lenei upumoni?

Faailoa atu tali. Pe a tuu mai e se tasi se tali, e tatau ona i ai ni auala e faaali atu ai. E mafai ona fai lenei mea i le faia o se faamatalaga faafetai e uiga i le tali, po o le fai atu o se fesili tulitatao.

Tausia le mama o le aoaoga faavae. Ia manatua o le sini autu o le aoaoina atu o le talalelei, e le na o le faia o se talanoaga lelei. Ae, ia aoao ai le aoaoga faavae ina ia mafai ona suia o tatou loto, ma mafai ona tatou liua. I le taimi o le talanoaga, o se vaega o lou tiutetauave o le, ia mautinoa o loo aoao atu aoaoga faavae moni.

Afai e faasoa mai e se tagata se mea e le sa’o faaleaoaoga faavae, o loo ia te oe le tiutetauave e ta’u atu ai le aoaoga faavae sa’o. E mafai ona e faaopoopo atu i se vaega sa’o o le tali, faasoa atu se mau po o se aoaoga mai le konafesi aoao, pe faasoa atu lau molimau.

O le faaaogaina o nei manatu, e mafai ona e maua ai nisi o talanoaga maoae o le talalelei. O le a e le faaaogaina talanoaga ia tau lava e faapasi ai le taimi. E mafai ona e taitaia ni talanoaga faamanuiaina, ina ia mafai e tagata aoao ona maua faaaliga patino, atina e le lotogatasi o le tasi ma le isi, ma faateleina o latou malamalama o le talalelei a Iesu Keriso.

I le Faiaoga: “Mata e Lava le Taimi e Fai Uma Ai?”

O anomea o lesona, o mataupu o mau, o malamalamaaga na e mauaina a o e suesue—o mea lelei uma lava, peitai, o itula na e suesue ai, e masani lava e le mafai ona toe faia i se taimi ua atofaina. O lau galuega e le o le faasoa atu o mea uma na e aoaoina, ae ia taitai le taimi o le vasega i se faiga e iloa ai e tagata aoao ia upumoni mo i latou lava—e pei ona sa e faia i lau lava sauniuniga. Tatalo mo se fesoasoani, ma o le a aoao oe e le Agaga Paia i mea e [te] taulai i ai. A o e taulai atu i ni nai upumoni, e mafai ona tuu atu le avanoa mo se talanoaga e sili atu ona anoa e ati loloto i loto o i latou e te aoaoa.

I le Tagata Aoao: E Taua Lou Manatu

O le mauaina o se talanoaga lelei e uiga i le talalelei o se tiutetauave e te lua faia faatasi ma le faiaoga. O nisi neio tulaga atonu sa e mafaufau e uiga i ai:

E i ai sa’u tala e fai atu, ae e le’i fesili mai le faiaoga mo ni manatu faaalia. Pe tatau ona ou faalavelave?

Atonu e te faatali mo se taimi talafeagai e tilotilo mai ai le faiaoga ma faailo atu i ai lou manao e fia faaali atu lou manatu. Afai e te lagona le musuia e faasoa atu, fai le mea sili e te faia ai loa lena uunaiga.

Ou te le mautinoa pe taua ou manatu, pe tatau la ona sii lou lima?

O loo i ai sou manatu ma ni aafiaga atonu e le o i ai i isi. A o e saunia mo le vasega, e te maua malamalamaaga patino e mafai ona avea ma se faamanuiaga i isi tagata aoao.

Na aoao mai Elder Richard G. Scott (1928–2015) o le Korama a Aposetolo e Toasefululua e faapea, pe a sii o tatou lima i le taimi o se talanoaga o le talalelei, ua tatou “faailoa atu i le Agaga Paia [lo tatou] naunau e aoao.” O lea la, afai e talafeagai ou manatu faaalia i le autu ma lava le taimi, e mafai ona e faasoaina atu. Ua faamatala mai e Elder Scott, “O le auai e mafai ai e tagata taitoatasi ona oo i le taitaiina e le Agaga” (“To Learn and to Teach More Effectively” [faigalotu Brigham Young University Education Week, 21 Aok., 2007], 5, speeches.byu.edu).

Ou te fefe e tautala i luma o ni tagata se toatele. O le a se mea e tatau ona ou faia?

A o e galue e faatoilalo lenei matau, atonu e te amata i se mea itiiti. Taumafai e ofo atu e faitau se mau po o se upusii. Ona vaai lea mo ni avanoa e tali ai fesili pe faasoa atu ni malamalamaaga. A o e faaalia ai lou naunautai e auai, o le a faamanuiaina oe i le lototoa e tautala ai ma upu e fai atu. Pe a tatou “tatala o [tatou] gutu,” tatou te iloa ai “o le a faatutumuina” (MF&F 33:10).

Afai e te iloa e faigofie ona faasoa atu lou manatu, atonu e te manao e fesili ifo ia te oe lava pe, nai lo le toe faasoa atu o ou lava manatu, o loo i ai se auala e te uunaia ai se tasi o ou uso-a-tagata aoao e faaali lona manatu.