Sa Ia Faitauina La’u Molimau

Faith Watson, Iuta, ISA

Ata na tusia e Allen Garns

O le taliina o la’u telefoni, sa ou faalogo ai i le leo fiafia o se tasi o faifeautalai i le lotoifale o ta’u mai ia te a’u se papatisoga o le a faia i ni nai aso. Ioe, o papatisoga, e masani lava o se mafuaaga lea o le fiafia o faifeautalai, ae peitai, o le igoa o le uso o le a papatisoina sa ou le iloaina. Ae sa tausisi mai lava le alii faifeautalai ia ou auai atu i le papatisoga ona sa faatalitali mai se mea ou te te’i ai. Sa le mafai ona ia ta’u mai ia te a’u nisi faamatalaga.

I le aso o le papatisoga, sa ou vave taunuu ai i le falelotu e vaai po o le a lea mea e faate’ia ai. Ae sa ou le iloa le uso talavou—o Alesi—o le sa papatisoina, ma na te le’i tuuina mai se faailo e faapea na te iloaina a’u.

Ina ua mavae le papatisoga matagofie sa faatumulia i le Agaga, sa uu e Alesi se Tusi a Mamona a o ia molimau mai i lona moni, ma faailoa mai lona agaga faafetai mo ona aoaoga, ae maise lava i lana molimau i le Faaola. I lana molimau, sa ia faamatala ai le auala na oo atu ai le tusi ia te ia. Sa faigaluega o ia [i se pisinisi] sa faia i se poloka laitiiti i se faletele mo faatauga i le lotoifale. I se tasi aso na alu atu ai se tamaitai ma tuu atu le tusi i lona pule. Sa le manao i ai le pule ma [ia] tuua ai i luga o le fata.

I se taimi puupuu mulimuli ane, ina ua siitia ese le pisinisi mai le poloka laitiiti, sa faatonu ai e le pule ia Alesi e tiai le tusi. Ae sa fia iloa Alesi, ma autilo vave i le tusi, ma fesili pe mafai ona ave ma ia.

Sa ave e Alesi le Tusi a Mamona i le fale, faitau i ai mo ni nai vaiaso, ma sa faatalitonuina i lona moni. Ae na te le’i iloa le mea e fai. O ni nai masina mulimuli ane, sa maua ai se isi ana galuega, lea sa la faigaluega faatasi ai ma se tagata o le Au Paia o Aso e Gata Ai. Sa ia fesili atu ia te ia e uiga i le Tusi a Mamona ma le Ekalesia, ma sa la valaaulia ma lona toalua ia [Alesi] e feiloai ma faifeautalai.

Ona fai mai lea o lenei uso, na te fia faitauina le molimau o loo tusia i luma o lana Tusi a Mamona. O la’u molimau. Sa ou tuua i ai a’o le’i tuuina atu i le pule a Alesi i le poloka laitiiti.

Sa amata ona ataata fiafia ia alii faifeautalai. O le faate’i aupito manaia lenei na ou oo i ai i lo’u olaga! Ina ua maea le sauniga o le papatisoga, na telea’i mai lo’u uso fou i le talalelei e fusi a’u.

Sa ou fiafia e molimauina le papatisoga o Alesi ma faalogo i lana molimau faatauvaa, na maua e ala i le faitauina o le Tusi a Mamona ma tatalo e pei ona fautua mai ai Moronae: “Ma afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou” (Moronae 10:4).

O loo faatumulia pea a’u i se agaga faafetai loloto ona na mafai ona ou faia se vaega itiiti e fesoasoani ai i se tasi o fanau a le Atua ia maua faamanuiaga o le talalelei a Iesu Keriso.