Ataata
O le Lesona i le Laau o le Sanitolo [Santol]
E alala le tusitala i San Jose, Filipaina.
E pei uma lava i tatou o le fualaauaina o le sanitolo i se afa.
I le aso 23 o Iuni, 2009, sa aafia ai le Atu Filipaina i se afa fulifao. I lena aoauli, sa tuu mai ai se lapataiga i la matou eria mo se matagi matua malosi. O le taimi atoa na totoe o lena aso seia oo lava i le po, sa matou faalogoina ai se mea o sasa mai i le tumutumu o le matou fale. Ina ua fesili mai lou atalii po o le a lea mea, sa ou fai atu ia te ia, o le matou laau sanitolo o loo sasa e le savili.
Sa ou salamo i lou le tauina o fua suamalie o le sanitolo i se aso na muamua atu, e pei ona sa ou fuafuaina. Ae na fai mai lou tina ia te au, e lei pula ia fua ma ia tuu ai pea.
I le 5:00 i le vaveao, sa ou alu ai i fafo e vaai i le laau, ma le popole i ou vaai i fua uma o le laau i luga o le eleele. Sa le mafai ona ou vaai i totonu o le laau—sa pogisa lava fafo—ae na ou vaai i ni fua laiti se fa o paepae solo i lo matou tuafale.
O se itula mulimuli ane, sa ou toe asiasia ai le laau. Sa ou vaaia ma le fiafia le tele o fua lapopoa, sasama-meamata o loo tautau pea i lala. O le taeina mai o fua na toulu, na ou matauina ai o le lua o ia fua, sa i ai ni vaega eena mamai i le pito i lalo. O le isi sa i ai ni togitogi uliuli na suia ai lona lanu, ae o le fua mulimuli sa ese lava ona foliga ma tonatonā.
Sa ou faapea ua toulu fua lapopoa atu, ma mamafa; sa faaluaina lo latou lapopoa nai lo fua sa ou taeina. Ae sa i ai lava latou iina: sa tautau pea ma le saogalemu i le laau.
Ata na tusia e Allen Garns
A o ou mafaufau e uiga i le mea na tupu, na ou faapea ai, e tai pei uma lava i tatou o ituaiga fua e lua o le fualaauaina o le sanitolo—o fua na toulu ma fua sa tautau ai pea. E mafai foi ona tatou pauu pe a featofai i tatou e tofotofoga matagia o le olaga, pe afai tatou te le o pipii mau i le laau o le ola, o lo tatou Faaola o Iesu Keriso (tagai i le 1 Nifae 8:10; 11:8–9, 20–23).
O fua ia na toulu mai le matou laau o le sanitolo sa vaivai i faamai, sa le mafai ai ona tatalia le savili. O fua na tumau pea i luga o le laau, sa faasaoina ona sa maloloina ma malolosi. Afai tatou te le tausia i tatou lava ia malolosi faaleagaga ma maloloina lelei—aoao mai tusitusiga paia ma perofeta soifua, tausia o poloaiga, auauna atu i isi—tatou te ono pauu foi pe a aumai e le fili ana au e faasagatau ia i tatou.
O le taimi lava na le toe faaaoga ai e fualaauaina mu’amu’a le malosiaga o le laau o le sanitolo, na gata ai foi ma lo latou tuputupu a’e. E faapena foi i le taimi tatou te o ese ai mai ia Keriso, o le vine moni, e gata ai foi lo tatou alualu i luma faaleagaga (tagai i le Ioane 15:1; 1 Nifae 15:15).
O nisi foi taimi e tatau ai ona tatou lolo atu i le savili. O tofotofoga o vaega o le olaga faitino, ma o se agaga lotomaulalo e fesoasoani tatou te talia ai le finagalo o le Atua i taimi faigata. O le lotomaualalo e fesoasoani tatou te salamo ai i a tatou agasala, faamagalo atu i isi, ma galo ai tiga [o le loto].
E au faatasi ma le lotomaualalo ia le onosai. Afai tatou te onosai i o tatou tofotofoga, afai tatou te taofi pea mo sina taimi umi atu i lo tatou faatuatua, o le a mafai ona oo mai tali o loo tatou sailia. Mulimuli ane, o le a vavao ai e le Faaola le matagi. O le a oo mai le toafilemu ma le laveaiga. Afai e tumau lo tatou usiusitai ma le faamaoni, e leai se mea e mafai ona tuueseeseina i tatou mai le alofa o le Atua (tagai i le Roma 8:38–39).