O Lou Potu Faamalolo
E alala le tusitala i Iuta, ISA.
O lou tina o le tagata lea na gasegase, ae sa ou manaomia foi le faamaloloina.
Ata na pueina o le pito i tua e le hxdbzyxy/iStock/Thinkstock
Ina ua 17 ou tausaga, sa iloa e lou tina na maua o ia i le kanesa o le susu. O le tetei na lofituina ai lou aiga, ma na ou alu ifo ai i ou tulivae i le tatalo loloto. Na toeitiiti atoa le itula o ou tagi, ma fesili atu i le Atua pe aisea o le a Ia faataga ai lenei mea e tupu, ma pe o le a Ia faamalolo i lou tina. Na amata ona oo mai le toomaga i ni nai aso mulimuli ane, ina ua logo tala i ai tagata o le uarota, aiga lautele, uo, ma tuaoi. Sa latou faanatinati mai e fesoasoani ia i matou. Na aumai ni taumafataga, fai mai ni upu agalelei ma ni galuega alofa, ma faailoa mai le popole ma le tigaalofa. Sa loloto le alofa sa matou lagonaina mai ia te i latou.
Ae e ui ina sa matou maua le tele o le fesoasoani, ae sa ou oo i se tulaga o le matuai le fiafia lava. Sa ou le popole i mea na tutupu ia te au. Sa ou le toe faia mea sa ou fiafia i ai. Sa oo ina ou paie ma faatalale i feau, meaaoga, ma lou valaauga o le Ekalesia. Sa ou vaai i lou tulaga ma le tiutetauave faaopoopo na tuu mai ia te au o se avega mamafa tele. Sa ou manatu e mafai ona ou faia na o au ia mea uma, ma sa le manaomia se fesoasoani a se tasi.
Sa faapitoa ona galue malosi Satani ia te au, ma fai mai e tatau ona ou lagona le mamafatu, sa finagalo le Atua ia ou faanoanoa, ma e le o au o se tagata faapitoa. O le mea e faanoanoa ai, sa ou talitonu i ai mo se taimi. Sa le mafai ona ou vaai i le itu lelei o soo se mea. Ou te lei vaai ia te au lava o se afafine o le Atua. Sa faatauasoina au e le le mautonu, ma sa le mafai ona ou vaai i ou faamanuiaga e tele. Sa le mafai foi ona ou tilotilo i le faata. Sa ou lagonaina le matuitui ma le lototiga.
O le mea e faafetai ai, sa faaalu e se uo mamae le tele o taimi e fesoasoani mai ai ia te au, ma sa lagolagoina foi au e nai ou tei. Sa amata ona faamaoni ona ou talanoa atu i ou matua, o e na amata foi ona faamaoni le talanoa mai ia te au. Ae sa ou tauivi pea lava.
E masani ona faamafanafana au e lou tina pe a ou faanoanoa. Pe a ou lagonaina na pei ua leai se faamoemoe, sa manaia le i ai o se tasi e talanoa i ai ma fesoasoani mai ia te au. E sau o ia i le fale i le va o ana togafitiga ma auli o matou lavalava, saunia ni taumafataga, ma aumai faamafanafanaga ma fautuaga ia i matou. Sa ou ofo i le ala na te onosaia ai ni tofotofoga faapena, ae leai ma se manatu faapito.
Ina ua ou talanoa atu i ai i se tasi aso e uiga i lou faanoanoa tele, sa ia fai mai ia te au, e le faapea na ou tagi ma ioe sa ou manaomia le fesoasoani, ona faapea ai lea ou te vaivai. Sa ia vaaia au ae sa tatau ona ou vaaia o ia.
Ina ua mavae se tasi o ona mau taotoga, sa i ai lou tina i le potu e faamalolo ai ia toe maua se faasiligamalosi. I le taimi lea, sa le mafai ona taofiofi lou mafaufau faapea, e manaomia sou lava potu faamalolo. Sa ou le iloa po o fea e amata ai le faagasologa o le faamalologa, ae sa tatau ona ou faia se mea.
O lea sa amata ai ona toe faafou au taleni ma tomai, faapea foi ma le atiina ae o ni taleni ma tomai fou. Sa ou kuka ma fai tagamea. E tele ni au savaliga sa alu e mafaufau ai. Sa ou usuina ni pese taitoatasi. Sa faateleina lou iliina o le pu [clarinet] ma le taina o le piano ma sa amata ona lelei atili. Sa tele ni tusi sa ou faitauina. Sa amata ona ou faalogologo i musika e sili atu le musuia. Sa ou siomia au lava i fautuaga mai taitai o le Ekalesia ma isi punaoa taua. Sa oo ina ou latalata atili atu ai i le Atua ma lou Faaola, e ala i tatalo patino, anapogi, ma le suesueina o tusitusiga paia.
Ae sa ou lagonaina lava le pei na fai ma mou atu lou toafilemu. Sa faigata i nisi o aso pe a ou manao ia ou maua le toafilemu, nai lo lena, ou te lagona lava le faanoanoa. Sa oo ina atili faigata le suisui soo o faalogona. Sa foliga mai na faatoa amata lau malaga mo le toafilemu.
Ona ou alu lea i le malumalu e faia papatisoga mo e ua maliliu faatasi ma lau vasega o Tamaitai Talavou. Sa ou mafaufau i ou faafitauli ao ou i ai i le malumalu, ma ao ou susueina itulau o au tusitusiga paia. Sa faapea ona ou faitau ai e uiga i le Faaola i le Isaia 53:4, “E moni, ua na tauave o tatou tiga, ma na tauave o tatou faanoanoa.”
I ni nai minute mulimuli ane, na mou ese atoa ai le fenumiai lea na faatauasoina ai au, ma mafua ai lou tiga tele. Na aveese e le Alii le pouliuli ma le atuatuvale o lou loto, ae tuua ai le filemu o le Agaga. Sa ou maua se lagona manino ma le fiafia lea na umi se taimi ou te lei toe lagonaina. Sa ou vaaia le anoano o faamanuiaga na ou mauaina, ma le tele o mea na faia e tagata uma mo au ma lou aiga. Sa ou vaai i le vavalalata na matou oo i ai ma lou aiga, ma uo. Sa ou vaaia au lava o se afafine lalelei moni o le Atua.
O iina i le malumalu na ou maua ai lou potu faamalolo.
O le toe tepa i tua i lenei aafiaga, ua ou iloa ai, i le taimi nei ua tele atu lou agaga malamalama ma le agaalofa mo i latou o e e sili atu ona limavaivai nai lo o au. Ua ou iloa le mea e faamalolo ai. O le tausaga sili ona faigata o lou olaga, sa avea ma tausaga sili ona lelei o lou olaga.