Savali a Faiaoga Asiasi
O Le Faaipoipoga ua Faauuina e le Atua
Ia suesue ma le agaga tatalo lenei savali ma saili ia iloa mea e faasoa atu. E faapefea ona faateleina e le “O Le Aiga: O Se Folafolaga i le Lalolagi” lou faatuatua i le Atua, ma faamanuia ai i latou e te puipuia e ala i faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O loo faaauau pea e perofeta, aposetolo, ma taitai ona “tautino [mai] ma le faamaoni, o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o le fuafuaga a Lē Foafoa.”1
Ua saunoa mai Elder D. Todd Christofferson o le Korama a Aposetolo e Toasefululua: “O se aiga e fausia i luga o le faaipoipoga o se alii ma se tamaitai e maua ai se faatulagaga sili mo le fuafuaga a le Atua ia lauusiusi. …
“… E leai se tasi o i tatou po o se isi lava e mafai ona suia lenei faatulagaga paia o le faaipoipoga.”2
Na saunoa Bonnie L. Oscarson, peresitene aoao o Tamaitai Talavou, fai mai: “O tagata uma, e tusa lava po o a o latou tulaga faaleulugalii pe fia le aofai o le fanau, e mafai ona avea ma e puipuia le fuafuaga a le Alii o loo faamatala mai i le folafolaga o le aiga. Afai o le fuafuaga lea a le Alii, e tatau foi ona avea ma a tatou fuafuaga!”3
Sa faaauau le saunoaga a Elder Christofferson: “O nisi o outou e le o maua faamanuiaga o le faaipoipoga ona o ni mafuaaga e aofia ai le leai o ni tagata e mafai ona [faaipoipo i ai], tosina atu i le itupa e tasi, faaletonu o le tino po o le mafaufau, pe na o le fefe foi lava nei toilalo. … Pe atonu foi sa e faaipoipo, ae ua faamutaina lena faaipoipoga. … O nisi o outou o e ua faaipoipo e le mafai ona fanauina ni fanau. …
“Ae peitai, … e mafai e tagata uma ona saofaga i le faataunuuina o le fuafuaga paia i augatupulaga taitasi.”4
Mau Faaopoopo
Kenese 2:18–24; 1 Korinito 11:11; Mataupu Faavae ma Feagaiga 49:15–17.
Tala Mai E o Soifua
Sa manatua e uso Larry M. Gibson, o le sa avea ma fesoasoani muamua i le au peresitene aoao o Alii Talavou, le taimi na fai atu ai Shirley, o le ua avea ma ana ava i le taimi nei, e faapea:
“‘Ou te alofa ia te oe aua ou te iloa e sili atu lou alofa i le Alii nai lo o au.’ …
“O lena tali na taia ai lou fatu. …
“… [Ma] sa ou manao ia ona lagona i taimi uma, e sili atu lou alofa i le Alii nai lo o isi lava mea uma.”5
Na aoao mai Elder David A. Bednar o le Korama a Aposetolo e Toasefululua e faapea: “O le Alii o Iesu Keriso o le vaega aupito taua i se sootaga o le feagaiga i le faaipoipoga. … [Vaai faalemafaufau e faapea], ua tuu le Faaola i le tumutumu o [se] tafatolu, ma se tamaitai i le tasi tulimanu o le faavae ae o se alii i le isi tulimanu o le faavae. Ia mafaufau lea po o le a le mea e tupu i le sootaga i le va o le alii ma le tamaitai ao laua agai malie atu taitoatasi ma ‘o mai ia Keriso’ ma taumafai ina ia ‘faaatoatoaina ia te Ia’ (Moronae 10:32). Ona o le Togiola ma e ala mai i le Togiola, e vavalalata ai le o mai faatasi o le alii ma le tamaitai.”6