Tausi ni Atalii Agavaa

Janness Johnson, Kalefonia, ISA

Ata na tusia e Stan Fellows

I ni tausaga ua mavae, ao avea au ma se tina nofofua, ma lofituina i le vaaiga ma le tausiga o lau fanau e toafa, o se meaalofa tele mai lou tina ma lou tuagane na mafai ai ona ou toe foi i le kolisi. I taimi ou te tietie atu ai i le aoga, ou te mafaufau i ou faamoemoega ma miti mo lau fanau. O au o se tagata liliu mai i le Ekalesia. O lou manaoga faavalea o le, ia latou maua le avanoa e aoao atu ai le talalelei i isi ma aumai ia i latou le fiafia na ou lagonaina.

I se tasi taeao, a o tietie atu i le aoga, sa ou mafaufau i lau fanau tama matutua e toalua, o e e 22 masina e va a’i. Afai la te auauna atu, e uma mai le misiona a le matua ae faatoa amata [le misiona] a lona uso. Sa ou popole tele i lenei mea ma mafaufau pe o le a mafai faapefea ona ou fesoasoani ia i laua e totogi a la misiona. Sa ou le mautinoa e mafai ona ou maua ni tupe e auina atu ai le muamua, a’o le lona lua foi ia.

Sa faaauau pea lenei fesouaiga mo aso e fa, a’o ou tatalo mo se tali. I le aso lona lima na oo mai ai le tali: “Tausi ni atalii agavaa. E faigofie ona maua tupe; ae e le faigofie ona maua ni atalii agavaa.”

Sa faatumulia lo’u loto i le toafilemu. Sa mamao lava le tali mai o’u atugaluga tautupe ma sa faapea ona faateia ai a’u. O la’u galuega o le tausi o ni fanau agavaa. E mafai ona ou faia afiafi faaleaiga, auai i le lotu, ave la’u fanau i le seminare, ma fesoasoani i o’u atalii i gaoioiga a Alii Talavou. E mafai ona ou faia le tatalo, anapogi, ma le faitauina o tusitusiga paia o se vaega o le olaga o le matou aiga. Sa ou iloaina afai e fai lau vaega, atonu e maua e la’u fanau se avanoa e fai ai ni misiona.

E faaopoopo atu i le matou faiga masani, sa i ai sa matou faiaoga maoae o aiga o lē sa alofa i lo’u aiga. Sa faamaoni o ia ma lona faletua e o mai i masina taitasi. Sa ia aoaoina la’u fanau i lesona, tuuina atu ia i latou ni faamanuiaga, ma auai i a latou taaloga. Sa avea e uo o’u atalii i fonotaga a le au perisitua a le siteki ma tolauapiga e alu ai ma le po. Sa i ai tagata o le siteki na tuuina mai ia i latou ni avanoa e faigaluega ai ma maua ni tupe, o ni tuaoi o e sa pei o ni matua faaopoopo, ma faiaoga i aoga o e sa aoaoina i latou i le amio pulea ma ia tutusa le lelei i aoaoga, musika, ma taaloga.

Ina ua atoa le 19 o lo’u atalii matua, ua i ai le tupe iina mo lana misiona. Na ou iloa mulimuli ane, sa i ai lava iina le tupe mo la’u fanau uma e toafa e auauna atu ai. Sa latou auauna atu i Mekisiko ma Pasila ma i Carolina i Saute ma Virginia, ISA. O le toalua laiti sa iu ina auauna atu i le taimi e tasi!

O lena aafiaga e masani lava ona ou mafaufau ai i fetalaiga a le Alii i le Isaia: “Aua o o’u manatu e le o outou manatu, o o’u ala e le o outou ala, ua fetalai mai ai Ieova” (Isaia 55:8).

E taliina mai tatalo pe a tatou mulimuli i le fautuaga tatou te maua, ma e masani lava ona sosoo mai ai ma faamanuiaga. Ou te iloa o le auaunaga na tuuina atu e la’u fanau i le Alii, na suia ai o latou olaga ma olaga o i latou na latou aoaoina. O a latou auaunaga ua faamanuiaina ai lo matou aiga, ma o le a faaauau ona faia ai faapea mo le tele o augatupulaga.