Pe A Tuua e se Tamaitiiti le Ekalesia
E alala le tusitala i Massachusetts, ISA.
E mafai ona tatou opoina le mataupu faavae e faapea, ua faamanuiaina a tatou fanau i le faitalia, e tusa lava pe a latou faaaogaina e agai atu ai i itu tatou te le malilie i ai.
Ata na tusia e Iker Ayestaran
Ua mavae ni vaiaso talu ona siitia atu lau tama teine matua i se aai fou, ma o Aso Sa taitasi sa ia misia ai le lotu sa aumaia ai ia te au ni atugaluga masani. Mata e toe foi mai ea o ia i le lotu? Sa ou taumafaia mea uma sa mafai ona ou mafaufau i ai e ave ai o ia iina: faamalosiauga, finau, faatauanau, fai ma ana uati faailo patino, tatalo, anapogi, e oo lava i le valaau atu i lona epikopo. Talu ai e 2,000 maila (3,220 km) sa ma nonofo valavala ai, o lea sa faigata ai ona ou auai faatasi ma ia, ae sa ou taumafaia foi lena mea!
Sa faaauau pea ona ou mafaufau e faapea, a mafai lava ona ou suia laitiiti le tulaga, o le a faapea ona toe faatulaga e lau tama teina lona auala faaleagaga. Sa ou manatu na pau lava le mea o lou manaomia o le tagata sao—o lona faiaoga asiasi, lona epikopo, o se uo po o se tagata o le aiga—e tuu i lona ala e tau atu pe na o le fai o le mea e mafai ona toe foi mai ai o ia. Ae sa leai se mea na aoga. Sa taavilivili lou ulu i le popole, ma sa tumu lou loto i le tausalaga ma le ita ona sa le manuia [au taumafaiga] ia te ia i le avea ai ma se matua.
E toatele isi e tutusa o matou aafiaga. Pe a tuua e tamaiti le ala o le talalelei, o se mea faigata tele i matua o e tumau faamaoni ona taulimaina. O se tasi tina sa matuai le fiafia lava i filifiliga a lana tama teine lea sa ia fai mai ai, e lagona le tiga pe a manava. Sa faasoa mai e se tama e faapea, sa pei na teena o ia ma lona ituaiga olaga e lana fanau. Sa popole se tina talavou ina nei fesiligia e lana lava fanau laiti le Ekalesia ma filifili e o ese mai ai.
E faapefea ona tatou taulimaina ia nei lagona tiga, pe a filifili tagata o le aiga e o ese mai le Ekalesia? E i ai ni mea e mafai ona tatou faia.
Aoao mai i Isi o E Sa Tauivi
O nisi o aiga e sili ona amiotonu i tusitusiga paia sa tauivi ma ni fanau faalogogatata. O Sarai ma Liae sa i ai ni fanau o e na lafoaia aoaoga a o latou matua (tagai i le 1 Nifae 2:8–12). Na faapena foi ia Atamu ma Eva (tagai i le Kenese 4:8). Sa faanoanoa foi o tatou matua faalelagi ina ua filifili e le tasi vaetolu o le la fanau agaga ia se isi ala (tagai i le MF&F 29:36). O le fuafuaga o le fiafia ua aofia ai le faitalia. Ma o lona uiga, e oo lava i tagata o aiga amiotonu, e mafai ona filifili e teena mataupu faavae o le talalelei. E mafai ona tatou maua le faamafanafanaga mai tala e uiga i aiga o loo tauivi o loo i tusitusiga paia. Tatou te maua ai se malamalamaaga sili atu i le faitalia ma le agaga malamalama, ma o lena malamalama e mafai ona fesoasoani ia i tatou ia faamalolo ma agai ai i luma.
Ia Iloa o a Tatou Fanau o Fanau Foi Ia a le Atua
Ina ua amata ona fesiligia e lana tama tama talavou ia ona talitonuga, sa oo ina lofituina se tasi o tina i lagona o le tausalaina ma le toilalo. A o mafaufau po o le a se mea na ono mafai ona ese lona faiga i le avea ma se matua, sa faapea ona ia maua se uunaiga alofa mutimutivale: “E le na o oe e ana le tama. E sili atu lou alofa ia te ia nai lo o oe, ae ou te le o lagona se tausalaina e uiga ia te ia po o soo se tasi o isi au fanau ua se.” Mai lava i lena taimi, sa mafai e le tina ona faamamulu ese le [lagona] tausalaina, ae taulai atu i se atalii lelei o le Atua sa avea ai lona atalii.
Taulai Atu i le Manuia
O nisi taimi e faataupepe ai matua ona latou te le malamalama atoatoa i le aoaoga “e leai se isi lava manuia e mafai ona suitulaga i le toilalo i le aiga.”1 O le manuia ma le toilalo e le faigofie ona faamatalaina. E pei ona faamatala mai e Elder John K. Carmack, o se tasi sa avea ma Fitugafulu, “Ona o le faamatalaga lenei sa faamoemoe e musuia ai matua ina ia avea, pe ia tumau ona aafia i [olaga] o o latou fanau, [o lea] e le tatau ai ona faauigaina faapea, ua toilalo matua o e ua tuu atu se taimi tele, taumafaiga, ma osigataulaga i le tulaga faamatua, ae peitai e le o selesele lava i taui manaomia.”2 E tatau ona tatou patipatia uiga lelei o o tatou fanau ma taimi fiafia sa tatou mauaina. E tatau ona tatou opogi le mataupu faavae, ua faamanuiaina tagata o o tatou aiga i le faitalia, e tusa lava pe o faapefea ona latou faaaogaina.
Fetuunaia o Tatou Faamoemoega
E ui tatou te faamoemoe o le a mulimuli tagata o le aiga i auala ua tatou filifilia, e ao ona latou filifili mo i latou lava ia maua faamanuiaga o le talalelei. Na fautua mai Elder Carmack, nai lo o le faasagatau atu i lenei mea moni, atonu e manaomia e matua ona “fetuunai o latou faamoemoega ma metotia, talia ia mea e pei ona i ai nai lo o le faaauau ai pea i faigata.”3
Sa lagona e se tina le loto vaivai ma le faanoanoa ina ua ia iloaina o le a le alu se misiona a lana tama tama. Na iu lava ina ia iloaina, sa manaomia ona ia faagalo le manatu e faapea, e tatau lava ona alu lana tama tama i se misiona ina ia ona maua ai le fiafia. “Sa iu ina mafai ona ou iloa, o lenei mea e le faatatau ia te au,” o lana tala lea. “O olaga o tamaiti taitoatasi o o latou a olaga ia. O au ua na o so latou tina. E le o ni au meatotino i latou.”
Maua le Malamalamaaga
E tele matua ua maua le faamafanafanaga ma faatumau se vaaiga mamao e ala i le tatalo, suesue i tusitusiga paia, ma le auai i le malumalu. Sa faasoa mai e se tasi o matua e faapea, o lana aafiaga i le tatalo, na aoaoina ai o ia ia manatua e pele tele lana tama i le Tama Faalelagi, lea sa fesoasoani i le aveeseina o lona tiga. O le tatalo e aumaia ai malamalamaaga aoga i le mea e fai ma tautala atu ai. E fesoasoani foi ia i tatou e maua ai le faamafanafanaga.
O loo faamatala mai i tusitusiga paia tala i tagata sa faia ni filifiliga le lelei ma auala na mafai e tagata o le aiga ona taulimaina ai. “O le mea e lelei ai e le o tumu tusitusiga paia i tala e uiga i aiga atoatoa, o lona uiga atonu o le a tatou matuai lotovaivai ai e taumafai!” o le faasoa mai lea a se tasi o matua. O le tala ia Alema le Itiiti ua faamautinoa mai ai ia i tatou, e faafofogaina mai tatalo a matua amiotonu (tagai i le Mosaea 27:14). O le faataoto i le atalii faamaumau oa, ua aoao mai ia i tatou i le olioli tatou te lagonaina pe a toe foi mai se tasi sa leiloa (Luka 15:20–24).
O le auai atu i le malumalu e mafai foi ona fesoasoani ia i tatou e maua ai se malamalamaaga aoga e taulima ai faafitauli o le aiga. “Ou te talitonu o le tagata pisi … e mafai … ona sili atu le lelei ma vave atu lona fofoina o faafitauli i totonu o le maota o le Alii nai lo o se isi lava nofoaga,” na saunoa mai ai Elder John A. Widtsoe (1872–1952) o le Korama a Aposetolo e Toasefululua. “I taimi e sili ona lei mafaufauina, i totonu po o fafo o le malumalu, o le a oo mai ai … o se faaaliga, le fofo [i] faafitauli e faatiga ai [o tatou olaga].”4 A o auai atu matua i le malumalu, e mafai ona sili atu ona nofouta o latou loto ma mafaufau i le filemu o loo latou sailia.
Faaauau Pea ona Faaali Atu le Alofa
Sa le taumateina lava le alolofa o Liae ma Sarai ia Lamana ma Lemuelu e pei lava ona la alolofa ia Sama, Nifae, Iakopo, ma Iosefa. E ui e mafai ona sili atu ona faigofie le fegalegaleai ma tagata o le aiga e tutusa o tatou talitonuga ma sitaili o le olaga, ae e taua tele ia i tatou le aoao e faaali atu le alofa mo isi o e [e le tutusa o tatou talitonuga ma sitaili o le olaga].
Na faasoa mai e se tasi o tamaitai sa le toe alu i le lotu ao talavou, ia le aafiaga lenei o le auala na faaauau ai e lona aiga ona alolofa ia te ia. I lona aiga toatele o le AAG, sa patipatia ai misiona i se auala e iloagofie. O ata o faifeautalai uma o le aiga sa teuteuina ai puipui o le potu malolo o lona tinamatua. Fai mai o ia, o le “ogatotonu lea o le lalolagi o le matou aiga.” Sa ia iloaina e le alu lava sana misiona, ma sa ia lagonaina e tusa lava po o a mea lelei sa ia faia i le lalolagi, o le a le maua lava sona nofoaga i luga o le puipui a lona tinamatua.
I le 30 o ona tausaga, sa tonu ia te ia e auauna atu i le Au Pisikoa a le Iunaite Setete. Sa malaga atu o ia i Matakasa, ma tuuto atu lona malosi atoa e auauna atu ai iina. O se vaitaimi o lona aafiaga, sa ia iloa ai, na faaaofia e lona tinamatua lona ata i luga o le puipui. Ina ua uma le taimi faatulagaina o le avea ma se Pisikoa, sa fusifusi le tinamatua ma le tama teine a lana tama ma le maligi o loimata. “O le auaunaga o le auaunaga,” o le faamalamalama mai lea a lona tinamatua. Pe i ai pe leai se puipui o faifeautalai i totonu o o tatou fale, o loo tele lava auala e mafai ona tatou faaali atu ai i tagata uma o lo tatou aiga e alofaina ma faatauaina i latou.
Pipiimau Pea i le Faamoemoe
A o faaauau pea ona tatou alolofa i e e pele ia i tatou e pei ona latou i ai i le taimi nei, e mafai lava ona tatou pipiimau pea i le faamoemoe o le a latou toe foi mai i se olaga e tutotonu ai le talalelei. E masani lava ona toe foi mai tagata o le aiga pe a mavae se vaitaimi o le feosofai solo. E pei o le atalii faamaumau oa, latou te iloa o o latou olaga sa i ai muamua na aumai ai ia i latou ni savali ma ni mataupu faavae lelei, ma faapea ona latou toe opogiina ai na tulaga faatauaina. O le mea moni, ua folafola mai e perofeta e faapea, o tagata o aiga o e ua faamauina i matua, o le a lagonaina le tosoina atu e o latou tausiga amiotonu ma o le a i ai se aso e toe foi mai ai.5 O folafolaga faapena e aumaia ai ia i tatou le faamoemoe tele mo i latou e pele ia i tatou.
Faatumau se Vaaiga e Faavavau.
E ao ona tatou manatua, tatou te matuai le iloa mea o le a tutupu i e pele ia i tatou. Sa faasoa mai e se tamā o ni talavou fouvale e faapea, ua ia aoaoina e ui lava e le o ola amiotonu ona atalii i le taimi nei, ae e le tatau ona ia faapea o loo folifoli mai ni faalavelave. Ua fautua mai Peresitene Dieter F. Uchtdorf, Fesoasoani Lua i le Au Peresitene Sili, o nisi taimi tatou te talitonu ai ua uma ona tusia le iuga o le tala, ae o le mea moni, faatoa tatou oo i mataupu i le ogatotonu.6 O le fuafuaga a le Atua e matuai eseese lava mai a tatou fuafuaga, ma tatou te le iloa po o a faaiuga o tala a tagata taitoatasi.
A na tatou iloa o le a iu ina toe foi mai tagata o o tatou aiga, mata e suia e lena mea le ala e faatino ai a tatou tala i le taimi nei? Ou te talitonu atonu tatou te ola i se tulaga sili atu o le filemu, alofa, ma le taliaina. A o tatou galulue ia lelei faaiuga o a tatou tala, e fesoasoani le manatua e mafai ona tatou filifili e talanoa atu i e pele ia i tatou mai se tulaga o le filemu ma le alofa ae le o le ita ma le matau. E pei ona tusia e Paulo, “Aua ua le foaiina mai e le Atua ia te i tatou le Agaga e matau ai, a o le Agaga e faamalosi ai, ma alofa ai, ma mafaufau tonu ai” (2 Timoteo 1:7). E pei ona taunapa mai Elder Carmack: “Aua lava nei fiu. Afai e foliga mai ua le mafai ona e aapa atu i lou afafine po o lou atalii i le taimi nei, o le mea taulia ia e taumafai pea ma alofa pea ia i latou. … Aua nei e gauai atu i lagona gase o le tausalaina ma le leai o se faamoemoe. Saili se fesoasoani faaleagaga ma le toafilemu. Ia faamalosi ma lototoa. O le a mafai ona e onosaia ou tofotofoga.”7
E lei foi mai lava lau tama teine i le lotu. Ae ua manino lava a maua sini; o loo ma galulue uma ia ma vavalalata pea. E ma te talanoa soo, ma ou te iloa o lona tausiga o se tagata o le AAG, ua fesoasoani e avea ai o ia ma se [tagata] agalelei, amio pulea, ma magafagafa. E ui e le mafai ona ou manao ia te ia e ui i le ala o loo malaga ai nei, ae ou te faafetai mo lesona o loo ma aoaoina i le ala. Ma ua ou maua le toafilemu a o ou taliaina o maua tulaga faapitoa i a maua malaga toe foi atu i le aiga.