O Lou Lumanai: O Le Fuafuaga Lava Ia e Matagofie
E te manao i se galuega, aiga, ma se molimau maoae? E mafai ona e filifilia i le taimi nei le ala i le manuia!
Ata na tusia e Adam Record
O le faia o filifiliga i le taimi nei ina ia ausia au miti mo le lumanai e mafai ona foliga mai e faigata, ae o faaiuga lelei i ou tausaga o le talavou, o le a maua ai taunuuga manuia. O lenei auala e mulimuli i le fautuaga lenei mai se perofeta: “O a tatou amioga ma filifiliga i aso taitasi e tatau ona ogatusa ma a tatou sini” (Quentin L. Cook, “Filifili ma le Atamai,” Liahona, Nov. 2014, 49).
O tala nei e fa ua faaalia ai, po o a lava au sini faapitoa patino, e mafai ona e ausia le manuia i le lumanai e ala i sauniuniga tuuto i le taimi nei.
Faataitaia o Tagata Autu: Clint Taylor
O Clint sa ola a’e i Iuta ma o loo faigaluega i le taimi nei i Kalefonia, ISA, i le Nickelodeon Studios o se tagata e vaai e tositosia ata i luga o pepa.
O a nisi o ausiga ua e mitamita ai?
Sa avea a’u ma se faatonusili i le Warner Brothers Animation, ma sa ou faigaluega mo le Disney, Warner Bros., DreamWorks Studios, Marvel Comics, ma le Sony Pictures Entertainment. Sa ou galue i faaaliga o ata komi mai le Teenage Mutant Ninja Turtles ma le X-Men e oo i le Dora the Explorer.
Na faapefea ona e lelei i mea e te faia?
A o ou laitiiti, sa ou fiafia e tusi ata o mea sa ou fiafia i ai. Sa ou faaaluina ni taimi se tele i le tusiina o ata o fitafita po o tagata autu po o manuvaefa po o soo se mea lava sa ou fiafia i ai i lena aso. O le tele lava o lo’u faataitai soo, o le lelei foi lea o lau tusi ata. Sa ou iloa na tuputupu ae la’u taleni e ala i le maelega, maitau, ma le filiga. Sa ou lagonaina na tuuina mai e le Atua ia te au se meaalofa matagofie, ma sa ou manao ia sili ona ou lelei i ai.
Na faapefea ona fesoasoani lau misiona e saunia ai oe mo le manuia i le galuega?
O la’u misiona i Korea sa taua i lena mea, sa fesoasoani ou te aoao ai i le faatuatua, loto pulea, ma le tuuto i le tulaga aupito lelei silisili. Sa ou sau mai la’u misiona ma se lagona faateleina o le lototele. Sa ou faia se mea faigata ma sa faamanuiaina ai. E mautinoa lava na fesoasoani ia te au ia avea ma se tamaitiiti aoga sili atu i le kolisi.
O le a le vaega na faia e au aoaoga i lou tulaga faamanuiaina?
Ina ua uma la’u misiona ona ou aoga lea i le valiina ma le tusiga o ata i le Iunivesite o Iuta i le Kolisi o Faatufugaga. Ona ou faaaluina lea o se semesa i fafo i Farani i le suesueina o faatufugaga ma le aganuu i Europa, lea sa mafai ona vaai ma iloa ai le tele o isi galuega o faatufugaga.
Ona o nei aafiaga, sa faapea ona ou maua ai se faila tele o a’u lava faatufugaga. O le taimi lava na ou faauu ai mai le iunivesite, sa faafaigaluega a’u e se tamaloa sa sueina ni tagata tusiata e faigaluega i le Marvel Spider-Man and His Amazing Friends. [Tama-Apogaleveleve ma Ana Uo Maoae].
Avea ma se Tagata Atamai i Komepiuta: Ioana Schifirnet
Sa ola ae Ioana i Romania ma o loo aoga i faamatalaga o polokalama [komepiuta] i le Iunivesite o Polika Iaga.
O le a se mea sa e faia a’o e talavou na saunia ai oe mo lenei galuega?
Sa leai se taimi na faapea, na faafuasei lava ona ou ala a’e ua ou lelei i le faiga o le polokalamaina po o mamanu, lea ua tele ina ou faia i aso nei. Ou te iloa ua ou faia le galuega o loo ou faia ona o le anoanoai tele o faaiuga laiti i le ala.
Sa ou le fefe e ave vasega faigata, ma sa ou faaaluina le taimi e suesue ai mataupu eseese ma tagata e i ai. Sa ou aapa atu foi i tagata tomai faapitoa ma maua mai fautuaga ia i latou. Latou te iloa itu lelei ma itu leaga o le galuega, ma mafai ona fesoasoani e aumai ni taiala ia te oe.
O a mataupu faaleaoaoga sa sili ona aoga?
I lo’u aafiaga, o mataupu e sili ona aoga i le aoga maualuga, ae maise i le kolisi, sa i ai vaega e faatatau i le tekinolosi. O le aoaoina o se gagana ese (mo au, o le faa-Peretania) na fesoasoani foi, aua na aoaoina ai a’u ia malamalama atili ma faaaloalo i isi tagata ma aganuu. O le gagana ese atonu e le faatatau sa’o i se matata, ae e fiafia pule o galuega e iloa o loo i ai sau vaaiga lautele i le lalolagi.
O a ni ou atugaluga sa i ai?
A o ou laitiiti, sa ou popole ina ne’i o’u le maua tonu se mea o le a ou fiafia e fai. Ma a ou maua foi se mea, sa ou fefe ona sa le’i i ai ia te a’u agavaa manaomia e faamanuiaina ai.
O le mea masani lava le lagonaina o le lofituina a’o e taumafai e tau mafaufau i mea e te fiafia i ai, ae aua ne’i faatagaina e taofia ai oe.
Na faapefea ona e faatoilaloina ou popolega?
O le mea sili ona lelei sa fesoasoani ia te au, o le alu e fai ni gaoioiga anoa, e pei o le faia o vasega i luga o le initoneti ma auai i kalapu. O le auala lena e oo mai ai le manino, malamalama, ma le lototele. O se vaega o ni uo po o se kalapu o ona tagata auai e tutusa mea tou te fiafia i ai, e mafai ona avea o se punaoa mamana tele. E fesuisuiai lava le lalolagi i taimi uma, ma e i ai lava i taimi uma se mea fou e aoaoina, ae afai e i ai sau au lagolago mautu ma ni tomai maoae, o le a malie le taumafai e pipii atu pea i ai i [na suiga].
Atiina Ae o se Alofa mo le Talalelei: Jess McSweeney
Ua talanoa mai Jess, o se talavou matua mai Egelani, e uiga i ana taumafaiga i le avea ai ma se tagata talavou ia tumau malosi i le talalelei.
Na faapefea ona e faamalosia lau molimau?
I le avea ai ma se tagata talavou, sa ou suesueina tusitusiga paia ona sa fautuaina a’u e taitai e fai. A o ou suesue i le faatuatua, ma faamoemoe ia tuputupu ae la’u molimau, o le mea tonu lava lena na tupu.
O lenei la, i le avea ma se talavou matua, ua ou iloa ai, o lo’u naunau e aoao ma tuputupu ae i le talalelei e sau mai le ala e mafai ona ou faaaogaina ai e faatosina ai isi. Ou te iloa o mea uma ua ou aoaoina e mafai ona fesoasoani ai i se isi tagata faapea ma au lava.
Na e faia ni sini e fesoasoani ia te oe?
A o ou i ai i le seminare, sa ou faia se sini e faitau i tusitusiga paia i aso uma. Ae peitai, ao faasolo ona avea a’u suesuega o tusitusiga paia o se mausa, na suia le [agaga] na faaosofia ai a’u. Sa amata ona ou faitau e le o le tau ina ia ausia se sini, ae ona sa ou fiafia i tusitusiga paia ma manao e faamalosia la’u molimau. O lena taui e le faaletino, ae o se mea e mafai ona teuina e faavavau.
Ua faapefea ona fesoasoani lou fiafia i le talalelei ia te oe i lou olaga?
O le atiina ae o se fiafia e aoao i le talalelei, e le na o le mauaina o le atamai e faatatau i ai; e faatatau i le malamalama ma le faaaogaina o mataupu faavae o le talalelei. A o ou atiina ae se mausa o le faia o fesili ma le sailia o tali mai i tusitusiga paia, sa ou maua se molimau faapea foi ma le lototele e faasoa atu mea sa ou aoaoina i isi.
O le a le taua o le galue malosi ma le filiga?
O le mauaina o le atamai i soo se vaega o le olaga e manaomia ai le taimi ma taumafaiga. Ae ia te au, o le aoaoina o le talalelei a Iesu Keriso o se tasi o mea aupito sili ona taua e galue malosi i ai. E tatau ona e aoao e uiga ia Keriso ina ia maua ai se molimau ia te Ia.
Tausia o Tamaiti Laiti: Han Lin
O Han Lin sa fanau ma ola ae i Taiuani. Sa faamauina i laua ma lona toalua i le Malumalu o Laie Hawaii, ma o loo nonofo nei i Hawaii, ISA, ma le la fanau e toalua.
O le a lau faauigaga o se tama lelei?
O se tama lelei e le o se tagata atoatoa, ae o ia o se tasi e lava le lotomaulalo e talia ai fautuaga mai isi ma saili i taimi uma ia faaleleia atili o ia lava. O se tama lelei na te faamuamua lona aiga ma o latou manaoga. E naunau o ia e ositaulaga lona taimi, mea patino e fiafia i ai, ma isi mea uma ina ia faia ia lelei lona aiga. E taumafai ia iloa le ala e fesoasoani ai i tagata taitoatasi o le aiga ia ola ma avea e faapei o Keriso.
O le a se mea na e faia a o talavou na saunia ai oe ina ia e oo mai i le tulaga ua e i ai nei?
Sa ou faia le mea sili e tausi i poloaiga uma ma faia filifiliga lelei. O le alu i le seminare sa matuai fesoasoani tele foi. Sa o se tautinoga tele, ona sa ou ala i le 5:00 i le taeao. Ae ui i lea, ou te manatu o le i ai o ni uo sa tutusa a matou sini, sa fesoasoani tele lea ona sa siitia e le tasi le isi. Ou te manatu o gaoioiga uma sa matou faia o ni talavou ma i le avea o se vaega o ni uo lelei i le Ekalesia, sa fesoasoani tele ia i matou.
O a ni savali mai le lalolagi sa tatau ona e faatoilaloina ia avea ai ma se tama lelei?
E ta’u mai e le lalolagi i tagata e tatau ona tele ni taimi latou te faia ai ni gaoioiga malie ae itiiti ia tiutetauave, ae o le galue malosi e taua i le faamanuiaina i soo se mea e te faia. O le avea ma se tamā lelei e manaomia ai mea uma e mafai ona e tuuina atu; o le tuputupu a’e agai atu i le atoatoa o se faagasologa o le olaga atoa—ou te tuputupu ae faatasi ma lo’u aiga.
O le a sau tala e fai atu i lou tagata talavou ma isi tupulaga talavou?
E manaomia e tagata uma ni uo, o lea, fai ni uo lelei. Ia faauo ma tagata o e e “auai ma le naunautai i se faamoemoega lelei” (MF&F 58:27). Aoao mai i nei uo lelei, ma o le a faatosinaina ai oe e ala i a latou faataitaiga, ma i ai le manao ia avea e faapei o i latou ma alualu ai i luma oe lava.
Fai le mea sili e te mafaia i mea uma e te manao e fai—aua le tuua se mea. O le auala lena o le a e le faanoanoa ai pe a e toe tepa i tua.