Fesili & Tali
“E manatu nisi o au uo, o le alu i le lotu e maumau ai le taimi. E mafai faapefea ona ou fesoasoani ia latou iloa e mafai ona avea o se faamanuiaga maoae?”
Atonu o le a fesoasoani se faatusatusaga i au uo. E mafai ona e faamalamalama i ai, e pei ona tatau i lou tino ona ai ma inu ma moe, ma tatau foi i lou faiai ona aoao, o lea e tatau ai foi ona fafaga lou agaga. O le alu i le lotu e fesoasoani e te fafagaina ai lou agaga.
E faia lenei mea e ala i le aoaoina o le talalelei, ma taumafa i le faamanatuga, faafouina o folafolaga paia na e osia ma le Tama Faalelagi. O lenei toe tomanatu ma le toe tautino, e fesoasoani e te maua ai faamanuiaga na folafola mai ia “maua pea lona Agaga e faatasi ma [oe]” (MF&F 20:77). O le faatasi o Lona Agaga ma oe e faamalosia ai lou faatuatua ma fesoasoani e te avea atili ai faapei o Keriso.
E mafai foi ona e talanoa i au uo e uiga i isi faamanuiaga e te maua. E mafai ona e tau i ai e uiga i le toafilemu e te lagona i le lotu, faasoa i ai se mea aoga na e aoaoina i le lotu, faamatala e uiga i se avanoa sa e maua e auauna atu ai, pe molimau atu o le alu i le lotu e fesoasoani e fai ai le aso Sapati o se mea fiafia (tagai i le Isaia 58:13–14).
Atonu o le auala sili ona mamana e fesoasoani ai i au uo, o le valaaulia o i latou e o mai ma vaai mo i latou lava. A o latou auai faatasi ma oe i sauniga faamanatuga ma isi sauniga, o le a mafai ona latou lagona le mana o le Agaga Paia, aoao le talalelei, ma vaaia ona faamanuiaga i olaga o tagata o le ekalesia.
Tuu Atu i le Agaga e Taitai Mai
E mafai ona tuu atu i ai lau molimau e uiga i le alu i le lotu. E mafai ona e faamatala i ai le manaia o ou lagona ma le taua o mea e te aoao i ai. A o tuu atu lau molimau, o le a fesoasoani le Agaga ia e iloa mea e fai atu, ma o le a iloa e au uo, e moni mea o loo e fai atu ai. O le tele o mea latou te iloa, atonu o le tele foi lea o le latou fia iloa. E mafai foi ona e valaaulia i latou tou te o mai faatasi i le lotu.
Mikelle M., 13 tausaga, Iuta, ISA
Valaaulia i Latou i le Lotu
E faigata le i ai o ni uo o e manatu o le alu i le lotu e maumau ai le taimi, e ui, e mafai ona tatou lagona le fiafia mo i latou a o tatou fesoasoani ia latou iloa mea o loo faapolopolo e le Tama oi le Lagi mo i latou taitoatasi. E mafai ona tatou fesoasoani ia i latou e ala i le valaaulia o i latou i le lotu, ina ia mafai ona latou lagona le olioli i le i ai i se falelotu ua faapaiaina, ma faatuatua e mafai ona latou lagona le alofa i le Tama Faalelagi ma nofouta i faamanuiaga tatou te maua e ala i le o i le lotu.
Oscar Y., 19 tausaga, Monagas, Venesuela
Taulai atu i le Faamanatuga
O le sau i le lotu e taua ona o le nofoaga lea e mafai ona toe faafou ai a tatou feagaiga o le papatisoga ma feagaiga uma lava e ala i le faamanatuga. Ua folafola mai e le Alii o le a faatasi pea Lona Agaga ma i tatou pe a tatou talisua ma le agavaa i le faamanatuga ma faataunuu la tatou pitolaau o le feagaiga. O le puipuiga, taitaiga, ma le faamafanafanaga lea tatou te maua mai le Agaga e taua mo o tatou olaga o aso taitasi. O nei faamanuiaga tulaga ese e le mafai ona maua i se isi lava auala ae na o le alu i le lotu ma talisua i le faamanatuga.
Diana R., 16 tausaga, Oregon, ISA
Ia Lotototoa
E mafai ona e fesoasoani ia latou malamalama e ala i le na o le talanoa atu ia te i latou, valaaulia i latou, ma tuu atu ia te i latou tusitusiga paia, po o le valaaulia foi o faifeautalai i o latou fale. Aua le ma. Ia fiafia aua atonu latou te auai lava i le Ekalesia.
David H., 12 tausaga, Mekisiko Fou, ISA
Fai Lau Vaega
O le alu i le lotu e le o se maumau o le taimi pe afai e te auai malosi ma taumafai e aoao ma malamalama i mea o loo tautalagia pe o aoaoina. E mafai ona e lagona le Agaga, ma o nisi taimi e mafai ona e feiloai atu i tagata fou.
Ethan H., 15 tausaga, Iuta, ISA
Ia Faasusulu Atu Lou Malamalama
I le avea ai ma tagata o le Ekalesia, tatou te faasusulu atu mea na tatou aoaoina i le talalelei a Iesu Keriso. O le faia o se faataitaiga lelei ma faaali atu i au uo o loo e fiafia i faamanuiaga ua e mauaina e ala i le alu i le lotu, e ono mafai ona aoao ai i latou o le alu i le lotu e matua aoga lava.
Johanna R., 20 tausaga, Surigao del Sur, Filipaina
Ia Tausisia Pea le Vaaiga e Faavavau
O le iloaina o le Ekalesia o le malo o le Atua i le lalolagi, tatou te o ai i le lotu i Aso Sa uma e faia se laasaga e agai atu i le atoatoa ma agai atu i le malo selesitila. O le alu i le lotu i Aso Sa uma, tatou te latalata atili atu ai i le Tama Faalelagi e ala i le faafouina o a tatou feagaiga (talisua i le faamanatuga), ma tatou te iloilo ai i tatou lava e iloa ai pe o faapeī i tatou faaleagaga.
Esther M., 17 tausaga, Itumalo o Kasai-Oriental, Temokalasi Ripapelika o Congo