Fesoasoani e ala i le Agaga Paia
Saunia e Elder Chi Hong (Sam) Wong
O Le Fitugafulu
O le Agaga Paia e mafai ona fesoasoani ia te oe i le aoga, aiga, ma le galuega faapea foi ma mea faaleagaga.
Ata na tusia e Red Hansen
E mafai ona fesoasoani le Agaga Paia i vaega uma o o tatou olaga. Sa ou aoaoina lenei mea i se auala moni lava a o ou aoga i le kolisi i le Iunivesite o Polika Iaga–Hawaii.
O le taimi lea, sa ou faigaluega ma ave uma au mataupu i vasega. Sa i ai foi se ma pepe laitiiti ma lou toalua sa tausi. Faatasi ai ma nei manaoga uma i au fuafuaga faatulagaina, sa tau leai ai sou taimi mo suesuega. Sa ou tatalo i aso uma mo le mafutaga a le Agaga Paia. Sa ou manaomia se taitaiga e fesoasoani ai ia te au e faaaoga lelei ai lou taimi. Sa ou manaomia le fesoasoani ia malamalama i meaaoga faapea ma le manatuaina mulimuli ane i taimi o suega.
Fesoasoani Faalelagi mo se Suega a le Aoga
I se tasi aso i le taimi o le vasega, sa tusi ai e se polofesa ni vaega o ni fesili faigata i luga o le laupapa paepae e faamanino ai se manatu. O nei fesili faigata sa lei faatatau i lena vasega, ae sa manao e talanoa puupuu e uiga i ai. Ina ua mavae ni nai minute sa titina ese e le polofesa [tusitusiga] mai le laupapa.
O le isi au vasega na sosoo ai o le saienisi o komepiuta, ma sa fai se matou suega i le aso lena. Sa i ai i le suega ia fesili tonu mai le laupapa i lau vasega na muamua atu! O le mea na mataina moni ai, matou te lei aoaoina muamua nei mea i le matou vasega saienisi o komepiuta. Sa toe foi mai ia te au mea uma e manatua mai le isi vasega lea sa ou auai, ma sa mafai ona ou taliina le fesili.
Ina ua togi e le polofesa o le saienisi o komepiuta ia suega, sa ia mautinoa lava e leai se isi na sao lona taliina o lena fesili faapitoa, o lea sa otometi lava lona maka faaseseina o pepa a tamaiti aoga uma. Ae ina ua toe aumai lau pepa ia te au, sa ou faaali atu ia te ia o le tali sa ou tusia i le pepa sa sao. Sa manaia tele.
Sa fesoasoani le Agaga Paia ina ia ou faaaoga lelei avanoa uma o au suesuega i le taimi atoa i le kolisi. Sa mafai ona ou ausia ni togi maualuluga ma maua ni sikolasipi, lea na fesoasoani ia te au e totogi ai le aoga.
Taitaiga i le Olaga
I le tau faaiuiuga o au aoga, e toatele au uo sa fuafua e faaauau a latou aoaoga ma ausia se faailoga o le matuaofaiva. Sa ou fiafia e aoga ma manao e fai foi lea lava mea e tasi, ae sa manino lava le tau mai e le Agaga ia te au, ua maea lau misiona i Hawaii. Ua oo i le taimi ou te toe foi atu ai i Hong Kong.
Sa ma mulimuli ma lou toalua i le uunaiga. I le taimi lea, sa ou le malamalamala pe aisea na taitai ese mai ai au mai le faaauauina o au aoga. Ae o nisi taimi tatou te mulimuli ai i le Agaga e aunoa ma le iloaina o faamatalaga uma. E ui ina sa ma le iloa ma lou toalua le mea e faamoemoeina a o ma sueina ni galuega ma se fale mautotogi, sa faamanuiaina i maua ma e lei umi ae manuia.
A o ou toe tepa i tua i le taimi lenei, ua ou malamalama ai i le pogai na matua malosi ai le Agaga i le uunaia o i maua e toe foi i Hong Kong. Sa taua tele ia te au ma lou aiga le faamalosia i le Ekalesia i totonu o tagata iina. Sa ou auauna atu o se epikopo, o se fesoasoani i le au peresitene o le siteki, ma o se peresitene o le siteki a o lei valaauina o se Fitugafulu Eria. Ina ua ou litaea mai lau galuega, sa mafai ona ou maua se faailoga o le matuaofaiva. O na aafiaga uma sa fesoasoani e saunia ai au mo lou valaauga i le taimi nei.
Ou te molimau atu ia te outou, o le saili ma le mulimuli i le taitaiga a le Agaga Paia o taimi uma lava o le auala sili lea ona lelei e fuafua ma ola ai lou olaga. Ua uma ona tuuina atu ia te oe le meaalofa o le Agaga Paia ina ua faamauina oe o se tagata o le Ekalesia, ma afai o le a e faaaogaina lena meaalofa, o le a avea ma se fesoasoani tele i mea uma e te faia.