Veika eso mai nai ka 186 ni Koniferedi Raraba Vakayabaki ni Lotu i Jisu Karisito ni Yalododonu Edaidai

A tekivu na soqoni ena mataka ni Vakarauwai ni koniferedi raraba ni Epereli ena veisureti nei Peresitedi Henry B. Eyring ena nona vakayaloqaqataki ira era vakarorogo tiko mera masulaki ira era na vosa tiko kei na matasere, ni bera ni ra cakava kei na gauna era sa cakava tiko kina. Vakakina ni sa tini na koniferedi ena yakavi ni Sigatabu, a kaya kina o Elder Jeffrey R. Holland: “Ke o raica nomu veisiga ni mataka … na veigacagaca ena nomu bula e sega ni veiraurau ki na itukutuku o sa rogoca ena macawa oqo, kakua ni ko yalolailai. … Na ka e cecere kina na kosipeli o ya ni da na saumi ni da tovolea tiko gauna mada ga eda sega ni rawata kina” (tabana e 125, 126).

Na nodra kaci me cakacakataki e vakaraitaki ka vaqaqacotaki kina na kaci nei Peresitedi Thomas S. Monson ni “da vakasamataka na vakatulewa eda cakava ena noda bula ena veisiga, … ke da digitaki Karisito, eda sa digidigi donu tiko” (tabana e 86).

Eso tale na itukutuku talei mai na koniferedi e oka kina na:

• Nona kacivaka o Peresitedi Monson e va na valetabu vou: mai Belém, Brazil; Quito, Ecuador; Lima, Peru (na ikarua ni valetabu e kea); kei Harare, Zimbabwe (raica na kena itukutuku ena tabana e 142).

• Nodra tokoni e 11 na Vakaitutu Raraba vou (e tekivutaki tiko na kedra itukutuku ena tabana e 131).

• Nodratou tokoni na mataveiliutaki raraba vou ni Lalai (e tekivutaki tiko na kedra itukutuku ena tabana e 136).

• Kacivaki ni dua na veiqaravi vou ni tamata yadua kei na matavuvale mera dodoliga yani ena nodra vanua mera vukei na ise (raica na tabana e 13, 111, kei na 141).

• Na kena raicimatua ni veimaliwai vakamatavuvale, vakabibi na nodra ilesilesi na tagane vakawati, tama, kei ira na iliuliu ni matabete.

• Nodra veivakararamataki vakaivunau mai vei ira era vosa, me vaka oqo mai vei Elder Dale G. Renlund: “Ni da voleka cake yani vua na Kalou, ena yaco mai ki na noda bula na mana veivakaukauwataki ni Veisorovaki nei Jisu Karisito. Ka me vaka a yaco vei rau na tisaipeli ena sala ki Emeo, eda na raica ni a dau tu voleka ga e veigauna kece na iVakabula” (tabana e 42).