Elder S. Mark Palmer

Vitusagavulu, Vakaitutu Raraba

Ena 1992, e dua na ka talei ka yalani sara vei rau o Elder S. Mark Palmer kei na watina, o Jacqueline na gauna.

A veiqaravi voli vakalewe ni matabose e cake ni iteki o Elder Palmer. A cakacaka tale tikoga vakaukauwa me tara cake nona bula vakacakacaka saumi. A osooso sara talega vakalevu o Sisita Palmer. Erau a susugi ira cake tiko e ono na gone ena nodrau itikotiko mai Austin e Texas, Amerika na veiwatini na Palmer—okati kina e dua na gonetegane vula ono.

Ni sureti rau nodrau peresitedi ni iteki me rau veiqaravi vakaliganicakacaka ena Valetabu na Dallas Texas, erau sega ni kila me rau na qarava vakacava e dua tale na itavi. Ia erau a ciqoma na veikacivi—ka qai masuta na veivuke ni Turaga.

Na vodo basi vakadua e veivula ka laki veiqaravi ena siga taucoko ena valetabu e gadrevi kina e dua na solibula levu kei na tuvatuva vakamatau. “Ia sa vakalougatataka vakalevu sara na neirau bula,” e kaya o Elder Palmer.

Na veiqaravi ena valetabu, e vakuria o koya, sa vakarautaki koya vakayalo me baleta na veikacivi eso vakamatabete mai muri. Sa yaco talega kina me tagane vakawati vinaka cake ka tama—ka rawa ni vakatautauvatataka nona bula osooso.

“Dau vukei keda na lako ki na valetabu mo vakadavora tale nomu ituvatuva ka vakananumi vei iko na veiyalayalati o sa vakayacora,” e kaya o koya.

A sucu o Stanley Mark Palmer ena 11 ni Feperueri, 1956, mai Te Puke, Niu Siladi, vei rau o Kenneth kei Jill Palmer. A curu ki na Lotu nona matavuvale ni se cauravou lailai sara. A laki kaulotu tudei ena tabana ni kaulotu mai Wellington Niu Siladi.

Ni rawata e dua na diqiri vakavakarau ena Univesiti mai Okaladi, a volayaca ki na parokaramu ni master of business administration ena Brigham Young University. Ni vakaitikotiko mai Provo e Utah, Amerika, a sotava e dua se qai lesu mai na kaulotu ka yacana o Jacqueline Wood ena dua na veigadivi sega na veikilai. Erau a vakamau ena 18 ni Tiseba, 1981, ena valetabu e Salt Lake. E ono na luvedrau ka ciwa na makubudrau na veiwatini na Palmer.

O Elder Palmer a tauyavutaka ka peresitedi ni SMP Ventures, e dua na kabani ni vakatorocaketaki iyauqaqa. Sa veiqaravi oti o koya vaka: bisopi, peresitedi ni iteki, peresitedi ni Tabana ni Kaulotu na Washington Spokane (2009–12), peresitedi vakawawa ni Tabana ni Kaulotu na Australia Sydney South (2014), ka Vitusagavulu ni iWasewase.