Elder Peter Meurs

Vitusagavulu, Vakaitutu Raraba

Ni se gone, eratou a vakaitikotiko o Peter Meurs kei na nona matavuvale volekata e dua ka cicivaka tiko e dua na sitoa ni “ripeataki ka kecega” ni iyaya ni teitei. Erau dau vakayagataka vakalevu nodrau gauna o Peter kei nona itokani vinaka duadua ena sitoa me rau vakavinakataka na iyaya ni teitei ka caka motopai lalai kei na motoka ni veitau. E muri a qai laki vuli idinia ni misini o Peter ena Monash University mai Melbourne, Ositerelia.

Ni yabaki 18 ka tosoya tiko nona vuli, a tukuna vei iratou ena univesiti ni gadreva me cegu mada ena rua na yabaki me laki kaulotu. A tukuni vua ni rawa walega ni sereki ena dua na yabaki; kevaka e balavu cake sa na rawa ni kau tani nona idabedabe ena parokaramu. Sa mani nanuma me sa kua ni veiqaravi.

Ena dua na gauna lekaleka i muri, a rogoca nona tukuna o Peresitedi Spencer W. Kimball (1895–1985) ena koniferedi raraba ni dodonu me ra laki kaulotu kece na cauravou bula kilikili (raica “Tuvalaka e Dua na Bula Taucoko ka Vuavuai,” Ensign, Me 1974, 87).

“E vaka sara ga ni vosa tikoga vei au. E curubasikati au sara ga,” a nanuma lesu o Elder Meurs. Sa mani nanuma me sa laki veiqaravi. Ni vo e dua na macawa me lako, a ciqoma e dua na ivola mai na univeisiti sa vakatarai kina vua me sereki me rua na yabaki.

A lesu tale ki vuli o Peter ni oti mai nona kaulotu, ia e kaya ni “vuli vinaka duadua e cakava” na nona kaulotu. E vakavulici koya na kosipeli ni “ivakavuvuli vinaka duadua ni veiliutaki na nodra vukei na tamata me ra qaqa.”

Ni vakacavara nona diqiri ni bejila ni idinia ni veika vakaidini, a cakacaka o Elder Meurs vakamanidia ni cakacaka ena Esso Australia ka dua na itokani ena kena tauyavu na Worley Parsons Limited. A veiqaravi ena dua na gauna lekaleka se qai oti vakadairekita ni veivakatorocaketaki ena Fortescue Metals Group.

Ni oti nona kaulotu, a vakamautaka e dua na marama e vakatoka me nona itokani vinaka duadua, o Maxine Evelyn Thatcher, ena 2 ni Janueri, 1979, ena valetabu mai Hamilton New Zealand. E va na luvedrau ka ciwa na makubudrau.

O Elder Meurs—ka sucu ena 21 ni Tiseba, 1956, mai Warrnambool, Victoria, Australia, vei rau o Frederik kei Lois Jones Meurs—sa veiqaravi oti ena vuqa na veikacivi, okati kina na peresitedi ni italatala qase, daunioqani ena tabanalevu, peresitedi ni Cauravou ena tabanalevu kei na iteki, dairekita ni veika raraba, peresitedi ni tabana kei na tabanalevu, bisopi, peresitedi ni iteki, ka Vitusagavulu ni iWasewase.