Sisita Bonnie H. Cordon

Karua ni Daunivakasala, ena Mataveiliutaki Raraba ni Lalai

Ena gauna taucoko ni nona bula vagone ena cevaicake kei Idaho, Amerika, a vulica o Bonnie Hillam Cordon e vuqa na lesoni bibi ni bula. Na cakacaka, qito, ka bula voli ena vanua ni teitei e vakavulica na bula rawati koya, cakacaka vakaukauwa, ka “kakua ni dau rerevaka me tovolea na veika eso,” e kaya na ikarua ni daunivakasala vou ena mataveiliutaki raraba ni Lalai.

Na lesoni bibi duadua e lako mai vei rau na nona itubutubu, o Harold kei Carol Rasmussen Hillam, o koya a vakavulica vua ena veivuke ni Turaga, e rawa ni cakava na ka kecega. “E sega ni yalani,” e dau kaya na tamana.

A vakararavi ena kilaka o ya o Sisita Cordon ni kacivi me daukaulotu e Lisbon mai Portugal, ka saga dredre tiko me vulica na vosa vaka Potukali. “Au dau tekiduru vakalevu ka kerea na cakacaka mana. Ia mai vei tamaqu, au a vulica kina niu rawa ni cakava na veika dredre.”

Ena masu vagumatua, cakacaka, kei na vosota, sa yaco me madila vakamalua mai ena vosa vaka-Potukali, ka a vakalougatataki koya ena vuqa na yabaki e muri ena nodrau kacivi kei na watina me rau laki veiqaravi ki Curitiba e Brazil.

“E taleitaki na ivakarau e vakarautaki keda ka tarai keda kina na Turaga, vakalalai ena dua na gauna,” e kaya o koya. “E dau vakaibalebale ni da raica ena iloilo na veika mai dakuda. Me da vakabauta ga.”

A sucu o Bonnie Hillam ena 11 ni Maji, 1964, mai Idaho Falls, Idaho. Ni oti nona kaulotu a vuli qasenivuli ena Brigham Young University, mai Provo e Utah, Amerika. Ni tiko voli e kea erau a veitokani vinaka sara kei Derek Lane Cordon. Sa yaco nodrau veitokani me veidomoni, ka rau vakamau ena 25 ni Epereli, 1986, ena Valetabu mai Salt Lake. E va na luvedrau—tolu na tagane ka dua na yalewa—ka tolu na makubudrau tagane.

Ena veiyabaki erau sa veiqaravi oti ena vuqa na veikacivi ena Lotu. A veiqaravi vata kei watina ena nona liutaka na Tabana ni Kaulotu na Brazil Curitiba Mission mai na 2010 ki na 2013, ka sa veiqaravi vakaperesitedi ni Goneyalewa ena iteki, iliuliu ni isususu, ka qasenivuli ni semineri, kei na isoqosoqo ni Goneyalewa ena tabanalevu, iSoqosoqo ni Veivukei, kei na Lalai.

Ena nona ilesilesi vou, e kaya o Sisita Cordon ni nuitaka me na vakavulica e dua na dina bibi vei ira na gone ni Lalai ena Lotu: “ni lomani ira na Tamada Vakalomalagi.”