Sisita Joy D. Jones

Peresitedi Raraba ni Lalai

Vei Joy D. Jones, erau nona qaqa na nona itubutubu dauloloma.

“Au nanuma ni rawa ni cakava na ka kecega o tamaqu,” e tukuna o Sisita Jones me baleta na tamana, e dua na daunilivaliva. Me baleta na tinana e kaya o koya, “E dua na marama qoroi na tinaqu” e cakava na veika kecega mai na kakana me kania na matavuvale ki na isulu era daramaka—mai na sega. “Vei au, o koya e dua na yalododonu, kau vinakata meu tubu cake meu vakataki koya.”

Me ikuri ni nona vakamareqeta na vakanananu eso me baleti rau nona itubutubu, o Aldo Harmon kei Eleanor Ellsworth Harmon, dau vakamareqeta o Sisita Jones na vakanananu ni gauna ni gone ni dau vakarorogo vei Elder Robert L. Backman ena nona vosa ena koniferedi ni yasana mai Oregon, e Amerika. E a peresitedi ni kaulotu ena gauna oya o Elder Backman, sa Vakaitutu Raraba vakaemeritesi ena gauna oqo.

“Au vakila e dua na mana ena gauna e vosa tiko kina,” e kaya o Sisita Jones. “Au vakila e dua na ka duatani sara mai na veika kece au sa vakila oti. … Au sa vakavinavinaka kina vakalevu baleta niu a vakila e dua na ivakadinadina mai na Yalotabu ni dina na veika e tukuna tiko.”

A sucu o Joy Diane Harmon ena 20 ni Julai, 1954, mai The Dalles e Oregon. Erau a tubu cake ruarua mai Oregon o koya kei koya e qai mai watina, ia erau qai laki sota ena Brigham Young University, mai Provo, Utah e Amerika. Erau a vakamau ena 14 ni Okosita, 1974, ena Valetabu e Manti Utah. E lima na luvedrau ka 17 na makubudrau.

Ni oti sara ga nona taura nona diqiri ni vakadidike ena bula ni matavuvale, erau sa toki ki Portland, Oregon, qai muri ki Santa Rosa mai California, e Amerika, ka laki cakacaka kina vakavuniwai o Baraca Jones. Erau a vakauqeti o Baraca kei Sisita Jones me rau toki ki Draper mai Utah, ena 22 na yabaki sa oti. Sa dau marautaka tu kina o Sisita Jones na veivakalougatataki ni toka volekata e dua na valetabu me tekivu mai na gauna oya.

“Sa yaco me noqu vanua tabu na Valetabu na Jordan River,” e kaya o koya. “E dua na noqu ivakadinadina me baleta na mana ni valetabu kei na vakacegu kei na veidusimaki sa kauta mai ki na noqu bula.”

Sa veiqaravi oti o Sisita Jones vakaperesitedi ni iSoqosoqo ni Veivukei kei na Lalai ena tabanalevu ka daunivakasala ena mataveiliutaki ni iSoqosoqo ni Veivukei, Goneyalewa, kei na Lalai ena tabanalevu kei na iteki. A veiqaravi ena dua na gauna lekaleka sa oti ena matabose raraba ni Lalai.