Elder K. Brett Nattress

Vitusagavulu, Vakaitutu Raraba

Erau vakamacalataki rau o Elder K. Brett Nattress kei na watina, o Shauna Lee Adamson Nattress, ni rau “tamata sega ni uasivi sara ka vaqara eso na gauna uasivi sara.”

Erau sa kunea e vuqa na veigauna vakaoqori ena nodrau gauna ni bula—era semati taucoko ena dua na ivakarau vua na iVakabula kei na Veisorovaki, e kaya o Elder Nattress.

E kaya o Elder Nattress ni a sucu mai vei rau na itubutubu vinaka, o David kei Judy Sorensen Nattress, ka nanuma nona dau wilika na tinana na iVola i Momani e veisiga ki na matavuvale.

Ena dua na gauna a tiko e vale ni sereki tu na vuli. E vakanamata tiko ki na veitarogi vakayabaki sa roro mai ka sega ni vinaka na lomana, e dina ni sega ni vakila ni tauvimate.

“Kevaka o sega ni tauvimate ka sega tiko ni vinaka na lomamu,” e kaya vua na tinana, “o gadreva mo lako ka veiqaravi mada vua e dua.”

A biuta o Brett e dua na sivi ni ucacevata ena muaimuri ni lori ni matavuvale ka laki sivi ucacevata ena nodra icurucuru na yada ena tabanalevu. A vakila ni daumaka cake sara.

“Au sa rui vakasamataki au tikoga kei na veitarogi vakayabaki, kau guilecava ni inaki dina ni bula me da qaravi ira na tani,” e kaya o koya.

A sucu o Elder Nattress ena 4 ni Maji, 1965, mai Pocatello, Idaho e Amerika. A toki nona matavuvale ki Lehi, Utah e Amerika, ka ratou bula kina o koya kei iratou na tacina e lewe lima ena dua na vanua ni teitei lailai ni matavuvale.

A sotava na yalewa me qai watina ni rau sa tiko ena iotioti ni nodrau yabaki ena rua na koronivuli veivolekati. Ni lesu mai ena nona veiqaravi ena Tabana ni Kaulotu na California Sacramento mai na 1984 ki na 1986, erau a vakamau ena 24 ni Epereli, 1987 ena Valetabu na Salt Lake Temple. E vitu na luvedrau.

A vuli ena Brigham Young University mai Provo e Utah, ka taurivola mai na University of Utah ena 1990 e dua na diqiri ni qaravi ni yago. Erau qai tauyavutaka vata kei tacina o David na Advanced Health Care Corp. ena 2000.

Sa veiqaravi oti o Elder Nattress ena vicavata na veikacivi ni Lotu, oka kina na peresitedi ni Cauravou, bisopi, peresitedi ni Cauravou ena iteki, peresitedi ni iteki, ka Vitusagavulu ni iWasewase. Ena gauna e kacivi kina, a liutaka tiko na Tabana ni Kaulotu tauyavu vou na Arizona Gilbert.