Na Tikina sa Soqoni Vata kina e Lewe Rua se Lewe Tolu

Mai vei Peresitedi Henry B. Eyring

Matai ni Daunivakasala ena Mataveiliutaki Taumada

Kevaka o vakarorogo vata kei na Yalotabu, o na raica ni vakamalumalumutaki na yalomu, vaqaqacotaki nomu vakabauta, ka vakalevutaki cake nomu lomana na Turaga.

Kemuni na taciqu kei na ganequ lomani, au kidavaki kemuni mai ki na ika 186 ni Koniferedi Raraba Vakayabaki ni Lotu i Jisu Karisito ni Yalododonu Edaidai. Au reki niu tiko vata kei kemuni, kau kidavaki kemuni ena yalomarau.

Au vakavinavinaka ni o ni lako mai ki na koniferedi mo ni vakila na veivakauqeti mai lomalagi ka toro voleka vua na Tamada Vakalomalagi kei na Turaga o Jisu Karisito.

Eda soqoni vata ena soqoni oqo, ka roboti vuravura raraba, e milioni vakamilioni na tisaipeli i Jisu Karisito ka da yalataka me da dau nanumi Koya tikoga ka qaravi Koya. Ena cakamana ni tekenolaji vovou, sa yali yani na duidui ni gauna kei na rabailevu ni veiyawaki. Eda sota me vaka ga ni da soqoni tiko ena dua na valelevu.

Ia e bibi cake sara mai na noda soqoni vata na yaca eda vakayacora kina. Sa yalataka na Turaga ni dina ga ni da sa lewelevu na Nona tisaipeli e vuravura nikua, ena voleka vei keda yadua o Koya. A tukuna vei iratou nona ilawalawa tisaipeli lailai ena 1829, “E dina, e dina au sa kaya vei kemudrau, … na tikina sa soqoni vata kina e lewe rua se lewe tolu ka kerea e dua na ka ena yacaqu, … au na tiko kina ena kedratou maliwa—io me vaka au sa tiko ena kemudrau maliwa” (V&V 6:32).

Eda sa sivia oqo na lewe dua se lewe rua, eda sa dua na iwiliwili levu ni Nona tisaipeli eda soqoni vata ena koniferedi oqo, ka me vaka sa yalataki, sa tiko ena keda maliwa na Turaga. Ni sa vakaturi cake mai na mate ka sa vakalagilagi, sa sega ni dau tiko vakayago o Koya ena vanua kece era soqoni vata kina na Yalododonu. Ia ena kaukauwa ni Yalotabu, eda rawa ni vakila ni sa tiko vata kei keda eke o Koya nikua.

Na vanua kei na gauna eda vakila kina na voleka ni iVakabula e vakatau vei keda yadua. A veidusimaki vaqo o Koya:

“Raica au sa kaya vakaidina vei kemudou na wekaqu, au sa tukuna na veika mo dou vakananuma e lomamudou, ia mo dou vakananuma vata kei na veika au sa vakarota vei kemudou, ka tarogi au kina niu sa tu voleka vei kemudou—

“Dou toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou, dou tukituki ka na dolavi vei kemudou” (V&V 88:62–63).

Au kila e rua na tamata erau vakarorogo tiko nikua ka rau vinakata dina mai vu ni yalodrau na veivakalougatataki oya. Erau na tovolea vagumatua me rau toro voleka yani vua na Turaga ena koniferedi oqo. Erau a volavola mai vei au—ka yaco vata mai ki na noqu valenivolavola na nodrau ivola—ka kerea na mataqali veivuke vata.

Erau saumaki ruarua mai ki na Lotu ka rau a ciqoma na ivakadinadina matata ni nona loloma na Kalou na Tamana kei na Luvena o Jisu Karisito, na iVakabula ni vuravura. Erau kila ni a tauyavutaka na Lotu na Parofita o Josefa Simici ena ivakatakila vakadodonu mai vua na Kalou ka ni a vakalesui mai na idola ni matabete tabu. Erau dui vakila na ivakadinadina ni sa tu ena Lotu nikua na idola. Rau wasea vei au na nodrau ivakadinadina bibi ena ivola.

Ia erau lelevaka ruarua ni rau vakila sa malumu mai nodrau lomana na Turaga kei na Nona loloma o Koya vei rau. Erau vinakata ruarua mai vuniyalodrau, meu vukei rau me rau rawata lesu tale na reki kei na yalo e vakila na loloma erau a dau kila ena nodra curu mai ki na matanitu ni Kalou. Erau vakaraitaka ruarua na nuiqawaqawa kevaka erau na sega ni rawata taucoko lesu tale na yalo ni vakila na nona loloma na iVakabula kei na Nona Lotu, ena yaco me ulabaleta nodrau vakabauta na veivakatovolei kei na veitemaki erau dau sotava.

E sega ni o rau duadua e tu vei rau na kauwai oqo, ka sega ni ka vou nodrau vakatovolei. Ena Nona gauna ni veiqaravi ena bula oqo, a solia vei keda na iVakabula na italanoa vakaibalebale ni sorenitei kei na dau kakaburaki. Na sorenitei na vosa ni Kalou. Na dau kakaburaki na Turaga. Na bula ni sorenitei kei na kena tubu e vakatau ena ituvaki ni qele. O nanuma na ka a tukuna o Koya:

“Ia ni sa kakaburaki lako, sa lutu eso ena tutu ni sala, a sa lako mai na manumanu vuka ka kania:

“A sa lutu eso ki na vanua veivatu, sa sega ni levu kina na qele: a sa tubu cake vakatotolo sara, ni sa sega ni vavaku na kena qele:

“ia ni sa cabe na siga sa malai; ia ni sa sega na wakana sa raqosa sara.

“A sa lutu eso ki na veiwa-vakavotona; a sa tubu cake na veiwa vakavotona, ka vakaruguta:

“A sa lutu eso ki na vanua vinaka, a sa vuavua vinaka, sa vuaidrau eso, a sa onosagavulu eso, a sa tolusagavulu eso.

“O koya sa vakadaligana me rogoca, me mani rogoca sara” (Maciu 13:4–9).

Vakadua tale, na sorenitei na vosa ni Kalou. Na qele na yalo ni tamata sa ciqoma na sorenitei.

O keda kece e levu na ka eda tautauvata kina kei rau na tamata vakasakiti ka rau a volavola mai vei au me rau vukei ka vakadeitaki. O keda kece ena dua na gauna sa teivaki vei keda na sorenitei, se na vosa ni Kalou. Vei keda eso, a yaco ena noda gauna ni gone ena nodrau sureti keda na noda itubutubu me da papitaiso ka vakadeitaki mai vei ira e tu vei ira na kena lewa. Eso tale vei keda a vakavulici mai vei ira na italai kacivi ni Kalou. Eda a vakila yadua ni vinaka na sorenitei, eda a vakila sara mada ga na raragi ni yaloda, ka reki ni sa rabailevu cake na yaloda kei na noda vakasama.

O keda kece sa vakatovolei noda vakabauta ni vakadaroi na veivakalougatataki talei, nodra veivakacacani o ira era via vakarusa noda vakabauta, veitemaki ki na ivalavala ca, kei na loma kocokoco ka vakalailaitaka na noda igu me da vakabulabulataka ka vakamalumutaka na titobu vakayalo ni yaloda.

O ira era rarawataka na yali ni reki era a dau vakila sai ira era vakalougatataki. Eso era sega ni dau raica na kena sa seyavu yani na vakabauta e lomadra. Sa rui vuku o Setani. Dau tukuna o koya vei ira e vinakata o koya me ra vakaloloma ni reki era a vakila ena dua na gauna e vakasama vagonegonea.

Nikua na noqu itukutuku vei keda kece ni na dua na madigi vakamareqeti ena vica na siga mai qo me da digitaka me vakamalumutaki na yaloda ka da ciqoma ka susuga cake na sorenitei. Na sorenitei na vosa ni Kalou, ka na sovaraki yani vei keda kece eda na vakarorogo, sarasara, ka wilika na veika ena vakayacori ena koniferedi oqo. Na sere/ivakatagi, na vosa, kei na ivakadinadina sa vakarautaki mai vei ira na italai ni Kalou era sa segata vagumatua na veituberi ni Yalo Tabu ena nodra vakavakarau. Era masulaka vakabalavu tu mai ena yalomalumalumu levu ni roro mai na siga ni koniferedi.

Era masulaka me tu vei ira na mana me ra vakayaloqaqataki iko mo vakayacora na digidigi ka na vakavuna e yalomu e dua na qele bulabula me tubu ka vuavuai vinaka kina na vosa ni Kalou. Kevaka o vakarorogo vata kei na Yalotabu, o na raica ni vakamalumalumutaki na yalomu, vaqaqacotaki nomu vakabauta, ka vakalevutaki cake nomu lomana na Turaga.

Nomu digitaka mo masu ena yalodina ni yalomu ena veisautaka na veika o sotava ena veisoqoni ni koniferedi kei na veisiga kei na veivula ena muri mai.

E levu vei kemuni sa tekivuna oti. Ena itekivu ni soqoni oqo, a sega walega ni o vakarorogo ki na masu; o a vakuria ena nomu vakabauta na kerekere me da rekitaka na veivakalougatataki ni kena sovaraki vei keda na Yalo Tabu. Ni o vakuria na nomu vakatakekere lo ena yaca i Jisu Karisito, o sa toro voleka yani Vua. Oqo na Nona koniferedi. Na Yalo Tabu ga e rawa ni kauta mai na veivakalougatataki e gadreva na Turaga ena vukuda. Ena Nona loloma vei keda, sa yalataka kina o Koya ni da na vakila:

“Ia na ka kecega era sa tukuna ena veivakauqeti ni Yalo Tabu sa ivunau, io sa ivakaro ni Turaga, sa loma ni Turaga, sa vosa ni Turaga, ka domo ni Turaga; io sa kaukauwa ni Kalou me ia kina na veivakabulai.

“Raica oqo na ka sa yalataka na Turaga vei kemudou, io oi kemudou na noqu tamata.

“Ia mo dou kakua ni rere se yalolailai; raica koi au na Turaga, au sa tiko vata kei kemudou ka vakaukauwataki kemudou; ia mo dou na tukuni au yani, koi au ko Jisu Karisito na Luve ni Kalou bula, io au sa bula e liu, ka bula edaidai, ka na bula talega e muri” (V&V 68:4–6).

E rawa ni o masu ka vakuria nomu vakabauta ena veigauna yadua e lako mai kina ki na itutunivunau e dua na italai ni Kalou me vakataucokotaka na yalayala ni Turaga ena Vunau kei na Veiyalayalati wase 50:

“Au sa kaya vakaidina vei kemudou ko koya au sa lesia ka tala yani me vunautaka na ivakavuvuli dina, sa vunau ena nona kaukauwa na Dauveivakacegui, io na Yalo Tabu na vu ni ka dina. Ia sa vunau tiko li ena kaukauwa ni Yalo Tabu na vu ni ka dina, se ena kaukauwa tale eso?

“Raica kevaka sa vunau ena kaukauwa tani tale eso, ia sa sega ni mai vua na Kalou.

“Ia ko koya sa vakabauta na ka dina, sa vakabauta li ena kaukauwa ni Yalo Tabu na vu ni ka dina, se ena kaukauwa tani tale eso?

“Raica kevaka sa vakabauta ena kaukauwa tani tale eso, ia sa sega ni mai vua na Kalou.

“A cava dou sa sega kina ni raica rawa ka kila na ka dina, raica ko koya sa vakabauta na ivakavuvuli ena kaukauwa ni Yalo Tabu na vu ni ka dina, sa vakabauta ena vuku ni sa vunautaki vua ena kaukauwa ni Yalo Tabu na vu ni ka dina?

“Raica ko koya sa vunau kei koya sa vakabauta, erau sa veikilai yalo; io erau sa veivakavulici ka marau vata” (V&V 50:17–22).

E rawa ni o masu me vaka era sa vakarau lagata na matasere. Na dairekita ni matasere, na daunioqani, kei ira na lewe ni matasere era sa masu ka vakatovotovo ena masu e yalodra kei na vakabauta me vakamalumutaka na yalo ka vakalevulevui nodra kaukauwa me ra tara cake na vakabauta ena sere/ivakatagi kei na ivunau. Era na lagasere vua na Turaga me vaka ga ni ra tu e Matana, ka ra na kila ni rogoci ira dina tiko na Tamada Vakalomalagi me vaka Nona dau rogoca nodra masu yadua. Era cakacaka vata ena veilomani me dina na yalayala ni iVakabula vei Emma Smith: “Raica au sa rekitaka sara na sere sa lagati ena yalodina; io na nodra sere na yalododonu sa nodra masu vei au, kau na vakalougatataki ira kina” (V&V 25:12).

Kevaka o sega walega ni vakarorogo ia masu tale tikoga ni ra lagasere, ena saumi na nomu masu kei na nodra masu ena veivakalougatataki ki ulumu vakakina o ira. O na vakila na veivakalougatataki ni nona loloma kei na veivakadonui na iVakabula. O ira kece era duavata ena veivakacaucautaki oya era na vakila na tubu ni nodra lomani Koya.

O na digitaka beka mo masu ni voleka tiko me tinia na nona itukutuku e dua. Ena masu lo tiko e lomana vei Tamada me solia vua na Yalo Tabu na vosa ni ivakadinadina ena laveta na yalodra, nodra vakanuinui kei na yalodina na vakarorogo me da dau nanuma tikoga na iVakabula ka muria na ivunau sa solia vei keda ko Koya.

Na ivakadinadina ena sega ni tokaruataki kina na itukutuku. Ena vakadeitaka na dina e rawa ni kauta na Yalotabu ki yalodra o ira era na masuta tiko na veivuke, na veidusimaki vakalou, ka me ciqomi na loloma savasava i Karisito.

Ena soli vua e vosa tiko na ivakadinadina savasava. Ena vica wale beka ga na ka e tukuna, ia ena kau yani ki yalodra na vakarorogo yalomalumalumu ka ra lako mai ki na koniferedi ni ra via kania na vosa vinaka ni Kalou.

Au sa kila mai na veika au sa sotava na ka e rawa ni cakava na nodra vakabauta na tamata vinaka me kauta mai na vosa mai na Yalotabu ena isogo ni dua na vunau. Sa vakalevu na nona dau tukuna vei au e dua ni oti na noqu ivakadinadina, “O kila vakacava na ka saraga au via rogoca tiko?” Au sa vulica meu kakua ni dau kidacala niu sega ni vakasamataka rawa na noqu cavuta na vosa. Au cavuta na vosa ni ivakadinadina, ia a tu e kea na Turaga, ka solia tiko mai ena kena gauna. Na yalayala ni na solia mai na Turaga na vosa ena gauna sara ga oya sa baleta vakauasivi na ivakadinadina (raica na V&V 24:6). Vakarorogo matua ki na ivakadinadina ena wasei ena koniferedi oqo—o na vakila ni o voleka cake vua na Turaga.

Ena rawa ni o vakila niu sa yacova mai na gauna meu tinia kina na itukutuku au a tovolea meu tukuna kei na dua na ivakadinadina ni dina. Nomuni masu ena vukei au me soli mai na veimalanivosa ni ivakadinadina ena rawa ni vukea e dua e gadreva tu me saumi nona taro.

Au laiva vei kemuni na noqu ivakadinadina bula ni lomani keda ka kilai keda na Tamada Vakalomalagi, ko Iloimi cecere, o keda yadua. Ena Nona veidusimaki a Bulibuli na Luvena, ko Jiova. Au vakadinadinataka ni a sucu mai o Jisu na kai Nasareci me Luve ni Kalou. A vakabulai ira na tauvimate, era rai na mataboko, ka vakaturi cake na mate. A sauma na isau ni nodra ivalavala ca kece na luvena vakayadua na Tamada Vakalomalagi era sucu mai ki na bula oqo. A sereka na ivesu ni mate ena vukuda kece ena nona duri cake mai na ibulubulu ena imatai ni Sigatabu ni Siganimate. Sa bula nikua, na Kalou—sa vakaturi cake ka lagilagi.

Oqo duadua ga na Lotu dina, sai Koya na kena Vatunitutu Liu. Na Nona parofita e vuravura taucoko o Thomas S. Monson. Era vosa ena vukuna na Turaga o ira kece na parofita kei na iapositolo o na rogoci ira ena koniferedi oqo. O ira na Nona italai era sa vakadonui me ra cakacaka ena Vukuna. E liutaki ira na Nona italai e vuravura o Koya. Oqo au sa kila. Kau vakadinadinataka ena Yacana, io na yaca tabu i Jisu Karisito, emeni.