Digidigi
Mai vei Peresitedi Thomas S. Monson
Meda sa qai digitaka na dodonu e dredre ka kakua ni cala e rawarawa.
Kemuni na taciqu kei na ganequ, ni bera niu vosa vei kemuni nikua, au gadreva meu vakaraitaka e va na valetabu vou, era na tara tiko ena vica na vula kei na yabaki mai oqo, ena veivanua oqo: Quito, Ecuador; Harare, Zimbabwe; Belém, Brazil; kei na ikarua ni valetabu mai Lima, Peru.
Niu se qai lewena na Kuoramu ni iApositolo Le Tinikarua ena 1963, a 12 na valetabu era sa vakayagataki tiko ena loma ni Lotu. Ena kena sa vakatabui na Valetabu e Provo City Center ena rua na macawa sa oti, sa 150 kina na valetabu era vakayagataki tiko e vuravura raraba. Eda sa vakavinavinaka vakalevu ki na veivakalougatataki eda sa ciqoma ena veivale vakalou oqo.
Ia, kemuni na taciqu kei na ganequ, au gadreva meu vakavinavinakataka na madigi meu mai wasea e vica na vakasama vei kemuni ena mataka nikua.
Walega oqo au a vakasamataka tiko na digidigi. E dau tukuni tu ni katuba ni veigauna e tosoi mai na idi lalai, sa vakakina na nodra bula na tamata. Na noda digidigi ena vakadeitaka na keda icavacava.
Ni da biuta mai na noda bula taumada ka curuma na bula e vuravura, eda a kauta tiko mai na isolisoli ni bula galala. Eda lalawataka meda rawata na lagilagi vakasilesitieli, kei na digidigi eda cakava, ena kena inaki levu, ena vakadeitaka se da yacova se sega na noda lalawa.
E vuqa vei kemuni ko ni sa kila tiko na italanoa talei kei Alice a vola o Lewis Carroll o ya na Alice’s Adventures in Wonderland. O ni na nanuma tiko ni sa yacova mai na veilatai ni gaunisala ka tu e matana e rua na gaunisala, e rau mua yani ki liu ia rau veibasai. Ni vakasamataka na kena me muria, a sotavi koya na Pusi ni Cheshire, ka tarogi koya sara o Alice, “Na sala cava beka meu muria?”
A sauma mai o pusi, “Qori ena vakatau ki na vanua o via gole kina. Ke o sega ni kila na vanua o via gole kina, e sega soti ni bibi na sala o na muria.”1
Eda sega ni vakataki Alice, eda sa kila na vanua eda via gole kina, ka bibi na sala meda na gole kina, ni sala eda muria ena bula oqo ena kauti keda ki na noda icavacava ena bula e tarava.
Me da digitaka me da tara e lomada e dua na vakabauta e cecere ka kaukauwa me sa noda isasabai qaqa ki na ivadi nei vu-ni-ca—na vakabauta dina, na mataqali vakabauta ena tokoni keda ka na vaqaqacotaka na noda gagadre me da digitaka na dodonu. Ni sega na vakabauta vakaoqo, eda na lakosese. Ni tiko, eda na rawata noda lalawa.
Dina ga ni bibi sara meda digidigi vakavuku, ia eso na gauna eda na digidigi vakalialia kina. Na isolisoli ni veivutuni, sa vakarautaka tu na iVakabula, ena rawa meda vakadodonutaka kina noda kosi, me da lesu ki na salatu ena kauti keda ki na lagilagi vakasilesitieli eda vakasaqara tiko.
Me da sa qai yaloqaqa tikoga meda kua ni muria na vakasama sa dau matau tu. Me da digitaka na dodonu e dredre ka kakua ni cala e rawarawa.
Ni da vakasamataka na vakatulewa eda cakava ena noda bula ena veisiga—me da digitaka o ya se na kena o ya—keda digitaki Karisito, eda sa digidigi dodonu tiko.
Sa noqu masu ena yalodina ka malumalumu me yaco dina oqo ena yaca i Jisu Karisito, na noda Turaga ka iVakabula, emeni.