Vukei na iSenivalu: “Au a Vulagi”

Ena nodratou veivakadonui na Mataveiliutaki Taumada, eratou sa veisureti na mataveiliutaki raraba ni iSoqoso ni Veivukei, Goneyalewa, kei na Lalai vei ira na marama ena veiyabaki kecega me ra qaravi ira na isenivalu ena nodra veitikotiko kei na veikorokoro ena dua na sasaga ni veivuke ka yacana “Au a Vulagi” (raica na Vunau ni Soro 19:34; Maciu 25:35).

E kaya vaqo o Sisita Linda K. Burton na peresitedi raraba ni iSoqosoqo ni Veivukei, “E vuqa vei keda e rawa ni vakalougatataki ena veitokani, veituberi, kei na loloma kei na veiqaravi Vakarisito tale eso.” “Na kena vakayacori na veiqaravi vakaoqori, sa tiki bibi sara ni kosipeli.

“Au nanuma kina na ivolanikalou e kaya vakaoqo me da kakua ni ‘guilecava na vakani ira na vulagi: ni sa so era a vakania na agilosi eso ka guilecava ga’ [Iperiu13:2],” e kaya o Sisita Burton. “Eda vakayaloqaqataki ira na marama me ra segata ena masumasu ka vakasamataka na madigi ni veiqaravi me tokoni na veisoqosoqo vakaitikotiko kei na matanitu. E rawa ni kunea eso na vakasama veivuke ena IWasAStranger.lds.org, ka wasea na veika o sotava ena nomu imeli ki na [e-mail].”

A vakau e dua nodratou ivola na Mataveiliutaki Taumada me baleta na “Au a Vulagi” ki na iteki, tabanalevu, kei na tabana ena mua ni Maji. A salavata kei na ivola na idusidusi vei ira na iliuliu. “E rawa ni ra vakaitavi ena sasaga oqo na marama kevaka e donu na kena gauna kei na ituvaki,” me laurai me kakua ni dua e namaki me “cici vakatotolo ni sa malumalumu na yago” ka me “vakayacori ga vakadodonu na veika kece” (Mosaia 4:27).” E dua nodratou ivola na Mataveiliutaki Taumada ena 27 ni Okotova, 2015 e vakayaloqaqataki ira na lewenilotu kece sara me ra vakayacora na veiqaravi Vakarisito vei ira era vakaleqai tu.

A veisoliyaki talega e dua na ivola mai vei iratou na peresitedi raraba ni iSoqosoqo ni Veivukei, Goneyalewa, kei na Lalai ka soli kina eso tale na itukutuku baleta na “Au a Vulagi” ena nodra soqoni na isoqosoqo oqori.