Mo Yalo Malumalumu
Mai vei Elder Steven E. Snow
Ena Vitusagavulu
Na yalomalumalumu sa vakavuna meda na itubutubu, luvena tagane kei na yalewa, veiwatini, veiwekani ka veitokani vinaka cake.
Eda kalougata ena Lotu ni tiko na serenilotu ka vukei keda, ena noda sokalou. Ena noda soqoni ni Lotu, “na serenilotu e sureta mai na Yalotabu ni Turaga, vakavurea na tiko vakarokoroko, vakaduavatataki keda vaka lewenilotu, ka vakarautaka vei keda e dua na sala meda vakacaucautaka kina na Turaga. Eso na ivunau momona era dau vunautaki mai na lagati ni serenilotu.”1
Ni oti ga e vica na vula ena kena sa tauyavu na Lotu, sa ciqoma na Parofita o Josefa Simici e dua na ivakatakila me baleti watina o Emma. E vakaraitaka vua na Turaga me “mo lavetaka e so na sere talei sa dodonu vei iko, me taurivaki ena noqu lotu”2
Sa qai vakasoqona vata o Emma Smith eso na serenilotu ka a volai taumada ena ivolanisere mai Kirtland ena 1836.3 E 90 walega na sere e tabaki rawa ena ivola lailai o ya. E levu vei ira e serenilotu mai na so na matalotu Protestant. E 26 vei ira oqori e a tuva o William W. Phelps, ka a vakarautaka ka veivuke ena tabaki e muri ni serenilotu. Na qaqana walega e a volai ka sega na kena ikabakaba e salavata kei na vosa. Na ivolanisere lailai oqo e a itakataka ni kalougata vei ira na lewenilotu ena gauna a tekivu kina.
Na ivolanisere Vakavalagi ka qai tabaki wale tikoga oqo, e a tabaki ena 1985. E levu sara na kena a digitaka o Emma ena vica vata na yabaki sa oti era se tiko ga oqo ena noda ivola ni serenilotu me vaka na “Au Sa Kila Ni Bula Tu” kei na “Na Yavu Tudei.4
Dua na sere vou e tiko qo ena serenilotu ka tabaki ena 1985 na “Mo Yalo Malumalumu.”5 Na serenilotu vakaciriloloma oqo e a vola o Grietje Terburg Rowley, ka mai leqa ena yabaki sa oti. E a lewena na lotu ena 1950 mai Hawaii, ni a qasenivuli tiko kina. E a veiqaravi o Sisita Rowley ena Komiti Raraba ni Sere ka vukea sara na kena vakadewataki na sere ki na vica vata tale na vosa. E yavutaka na qaqanisere na “Mo Yalo Malumalumu” ena rua na tikina mai na ivolanikalou: Vunau & Veiyalayalati 112:10 kei na Ica 12:27. E vakaoqo na ka e volai ena Ica: “Au sa vota vei ira na tamata na malumalumu vakayago, mera yalomalumalumu kina, ia, na noqu loloma sa rauti ira kecega sa vakamalumalumutaki ira vei au, ia kevaka era sa vakamalumalumutaki ira ka vakabauti au, au na vakaukauwataki ira ena veika era sa malumalumu kina.”
Me vaka na serenilotu taucoko ena Lotu, “Mo Yalo Malumalumu” e vakatavulica na dina rawarawa ka savasava. E vakavulici keda ni kevaka meda yalo malumalumu ena saumi mai na noda masu, eda na sotava na yalo vakacegu, eda na yalodina vakalevu cake ena qaravi ni noda itavi, ka kevaka meda tomana noda vakabauta eda na lesu rawa tale kina iserau ni Tamada Vakalomalagi.
A vakatavulici ira na dau muri Koya na iVakabula mera dau yalo malumalumu me vakataka e dua na gone lailai me rawa ni ra na curu kina matanitu vakalomalagi.6 Ni da tuberi ira cake tiko na luveda, e dodonu meda vukei ira mera dau yalomalumalumu tiko ga me yacova yani ni ra sa qase cake. Eda sega ni cakava oqo ena noda vakamavoataka na yalodra ena yalo ca se ena itovo kaukauwa vei ira ena nodra tuberi. Ena nodra tuberi tiko mera yalodei ka nuitaki ira e dodonu meda vakavulici ira mera dau vakaliuci ira na tani, yalololoma, talairawarawa, kua na dokadoka, dau ivakaraitaki vinaka, ka kakua ni dau tukutukuni koya. Meda vakavulici ira mera marautaka ni rawa- ka e dua na tacina se dua na nona itokani. O Peresitedi Howard W. Hunter e vakavulica “me noda idusidusi na nodra rawaka e so tani tale.”7 Kevaka me sega, era na dau tukutukuni ira ga na luveda ka qati ira na tani, dauvuvu, ka yaloca ena nodra rawaka na nona ilawalawa. Au vakavinavinaka vua na tinaqu ni dau kaya mai, “Luvequ, na yalomalumalumu edai ena taura yani e dua na gauna balavu sara,” ni raica me vaka au sa dokadoka mai.
Ia, na yalo malumalumu e sega ni dua na ka me qai dau vakavulici vei ira na luveda. Meda tovolea taucoko meda yalo malumalumu cake. Na yalo malumalumu e bibi meda rawata kina na veivakalougatataki ni kosipeli. Na yalomalumalumu ena vakavuna vei keda na yalo sa raramusumusu ni da sa ivalavala ca se caka cala ka na vakavuna vei keda meda veivutuni. Na yalomalumalumu sa vakavuna meda na itubutubu, luvena tagane kei na yalewa, veiwatini, veiwekani ka veitokani vinaka cake.
Ena dua tale na yasana, na dokadoka ena rawa ni vakaleqa na veimaliwai vakamatavuvale, vakavuna na kasere ni bula vakawati, kei na bula vakaitokani. Ena bibi sara meda nanuma tiko na yalo malumalumu ni ko sa vakila ni sa tubu tiko na yalo veiqati ena nomu matavuvale. Vakasamataka mada na mosi ni yalo o rawa ni levea ena nomu kaya, “Isa vosoti au sara”; “Au a sega ni veinanumi dina”; “Na cava o na vinakata mo cakava?”; “Au a sega sara ga ni vakasamataka tiko”; se “Au sa qoroqoro saraga vei iko.” Kevaka mera dau vakayagataki na veimala ni vosa oqo ena yalo malumalumu, ena lailai sara na yalo ni veicacati ka levu na yalo ni vakacegu ena noda dui matavuvale.
Na kena dau bulataki tu na veika e sotavi sa dua na ivurevure ni yalo malumalumu. Na mavoa kei na tauvimate, ni mate e dua eda lomana, ni leqa na veimaliwai, na sotavi ni leqa ni bula vakailavo ena rawa ni biligi keda sobu ki duruda. Kevaka me yaco na veika dredre oqo ia e sega ni noda cala se dua noda vakatulewa ca, ena veivakayalomalumalumutaki na kena yaco. Kevaka meda digitaka meda bula vakayalo tikoga ka yalomalumalumu talega ena taladrodro tu ga noda masu ka na tubucake noda vakabauta kei na ivakadinadina ni da sa vakamalumalumutaka na dredre e sotavi ena bula oqo. O keda kece eda sa vakanamata tu oqo ki na bula tawamudu, ia ni bera ni yaco na veika oqo, sa dodonu meda sasagataka yani na veika sa tukuni tu me ”buca ni yalomalumalumu”8
Vica na yabaki sa oti, a sotava na luvei keirau tagane o Eric e dua na mavoa bibi ni qavokavoka. A vakayalolailaitaki keitou ni sega tu ni vakilai koya me sivia e dua na macawa. Era kaya na vuniwai ni ra sega ni vakadeitaka rawa na ka ena rawa ni yaco tarava. Keitou a vakadrukai dina ni sa rawa vua me vakilai koya mai. Keitou nanuma ni sa na rawa ni daumaka oqo na veika kece, ia keitou a vakacalai.
Ni sa yadra cake mai e qai laurai ni o koya ena sega ni rawa ni na lako se vosa se me vakani koya. Na ca levu duadua ni sa sega ni rawa ni nanuma e dua na ka ni se bera na mavoa. O koya e rawa ni nanuma na veika kecega, ia sa sega ni rawa ni nanuma tale oqo, na veika sara mada ga e yaco ena vica ga na miniti yani ki liu.
Keitou sa vakayalolailaitaki sara ga ni na dua na luvei keirau ena sogolati tu ena vakasama ni dua na gone yabaki 15. Ni a bera ni mavoa e dau rawarawa tu na veika kecega vei luvei keirau. O koya e dau qito, kilai levu, ka gone vuku mai koronivuli. Ni se bera na ka oqo sa vaka e laurai ni nona veisiga ni mataka sa tu vinaka sara ga, ia keitou sa lomaleqa ni sa na sega ni dua na nona veisiga vinaka ni mataka, kevaka madaga me rawa ni nanuma. Oqo sa sasagataka sara ga me vulica tale e levu na ka. Oqo sa dua na gauna ni yalo malumalumu vua. E sa vakatalega kina vei rau nona itubutubu.
Vakaidina, keitou a vakataroga se rawa ni yaco vakacava na veika oqo. Keitou dau tovolea me keitou cakava na ka dodonu. Dau vakaliuci tu ena neitou matavuvale na bulataki ni kosipeli. Keitou sega ni kila se rawa ni yaco vakacava vei keitou na ka mosimosi vakaoqo. Sa vakavuna me keitou tekiduru ena kena sa vakilai ni na rawa ni vakavula, se vakayabaki saraga na nona qaravi vakavuniwai. Sa qai dredre vakalevu cake na kena vakasamataki ni sa na sega ni vaka e liu na nona bula o koya.
Ena gauna oqo, sa levu sara na wainimata e tuturu ka sa vakaibalebale tiko mai vakabibi na masu e dau cabori. Ena mata ni yalo malumalumu, keitou sa qai mai raica na veicaka mana lalai a sotava voli na luvei keirau ena gauna mosimosi oqo. Sa tekivu o koya me veisau mai vakamalua. Sa daumaka sara mai na nona ivakarau ni bula kei na itovo ni nona rai.
Nikua, na luvei keirau tagane o Eric sa vakawati tiko kei na dua na nona itokani daulomani, ka sa lima na luvedrau totoka. O koya e dua na dauniveivakavulici maqosa ka dau tutaka na nona vanua vakaitikotiko, vaka talega kina ena Lotu. Ka bibi duadua, se tomana tikoga o koya me bulataka na bula ni yalomalumalumu a rawata tu ena gauna sara eliu.
Ia vakacava kevaka meda sa yalo malumalumu rawa ni se bera ni da lakova na “buca ni yalomalumalumu”? Vakavulica o Alama:
“Raica sa kalougata ko koya sa yalomalumalumu vakaidina sara.”
“Io, sa kalougata vakalailai ga ko koya sa yalomalumalumu ena vuku ni nona dravudravua.”9
Au vakavinavinaka vei ira na parofita, vakataki Alama, ka sa vakavulici keda ena bibi ni ivakavuvuli oqo. O Peresitedi Spencer W. Kimball, nai ka 12 ni Peresitedi ni Lotu, a kaya, “Ena yalo malumalumu vakacava e dua? Vei au, sa dodonu me dau nanumi tikoga ni da dau vakararavi. Vakararavi vei cei? Vua na Turaga. Me vakananumi vakacava e dua? Ena masu ni vakavinavinaka vakaidina, ni sokalou wasoma.”10
Sega ni kidroataki ni sere ni lotu taleitaki nei Peresitedi Kimball na “Au Rai Vei Kemuni.”11 A tukuna o Elder Dallin H. Oaks ni sere ni lotu oqo sa dau lagati wasoma mai vei ira na Veitacini ena valetabu ena itekitekivu ni nona veiyabaki ena Kuoramu ni Le Tinikarua. A kaya o koya, “Raitayaloyalotaka na ka e yaco ni ra sa lagata vata e le vica ga na ilumuti ni Turaga na sere oya ni bera ni masuti na nona veituberi ena vakataucokotaki ni nodra itavi bibi.”12
Au vakadinadinataka na bibi ni yalomalumalumu ki na noda bula. Au vakavinavinaka vei ira me vakataki Sisita Grietje Rowley ka sa vola na vosa kei na ivakatagi ena vukei keda meda vulica na ivunau ni kosipeli i Jisu Karisito, ka oka kina na yalomalumalumu. Au vakavinavinaka ni sa tiko vei keda na veisere ni lotu vakadewataki mai liu, ka sa vukei keda ni sokalou ena sere, kau sa vakavinavinakataka na yalomalumalumu. Sa noqu masu ni da na sasagataka taucoko na yalomalumalumu ena noda bula me rawa ni da itubutubu vinaka sara, luvena tagane kei na yalewa, ka daumuria na iVakabula. Ena yaca i Jisu Karisito, emeni.