“O Koya sa Vinakati Ira, sa Vinakati Au”
Mai vei Elder Neil L. Andersen
Ena Kuoramu ni iApositolo Le Tinikarua
Era kune ena veituvaki duidui ka ca sara ni matavuvale na gone nikua.Sa gadrevi meda dolele yani vei ira era galili, guilecavi tu mai ka tu e taudaku ni bai.
E lomani ira na gonelalai na Kalou. E lomani ira kece na gonelalai. A kaya na iVakabula, “Laivi ira [na] gonelalai … me ra lako mai vei au: ni sa vakataki ira na lewe ni matanitu vakalomalagi.”1
O ira na gonelalai nikua era sa voliti tu ena vuqa sara na veimataqali ituvatuva veicurumaki ni matavuvale.
Me ivakaraitaki, nikua, sa vakaruataki na levu ni gone e Amerika era tiko vata ga kei na dua na nodra itubutubu ni vakatauvatani ena 50 na yabaki sa oti.2 Ka vuqa na matavuvale e luluqa nodra duavata mera lomana na Kalou kei na gagadre mera muria Nona ivakaro.
Ena kena tubu tiko na veilecayaki vakayalo oqo, ena tomana tiko na kosipeli vakalesui mai na ivakatagede, na dodonu, kei na ituvatuva ni Turaga.
“Sa dodonu mera cadra mai vuravura na gone ena loma ni ivau ni vakamau, ka susugi mai vei rau e dua na tama kei na tina ka rau dau doka ena yalodrau dina na nodrau bubului ni vakamau. …
“Sa rui vakamareqeti kina na nodrau itavi na tagane kei na yalewa veiwatini, me rau dauveilomani ka veikauwaitaki vakaveiwatini ka vakakina vei ira yadudua sara na luvedrau. … Sa nodrau itavi bibi na itubutubu me rau susugi ira cake na luvedrau ena loloma kei na buladodonu, me rau vakarautaka na veika vakayago ka vakakina na veika vakayalo era gadreva, me rau vakavulici ira mera dauveilomani ka veirairaici vakataki ira [ka] me ra muria na ivakaro ni Kalou.”3
Eda vakavinavinaka vei ira na vuqa na itubutubu vinaka ena veimatalotu e vuravura raraba era sa daulomani ira vakavinaka na luvedra. Eda vakavinavinaka vei ira na matavuvale ena Lotu i Jisu Karisito ni Yalododonu Edaidai era sa ologi tu ena veikaroni nei tama kei tina sa saumaki vua na iVakabula, era sa vauci ena lewa ni matabete, ka ra sa vulica tiko ena matavuvale mera dauloloma ka nuitaka ga na Tamadra Vakalomalagi kei na Luvena, o Jisu Karisito.
Vakamamasu baleti ira na iTabagone
Au sa vakamamasu nikua ena vukudra na drau vakaudolu na gonelalai, itabagone, kei na gone qase cake era sega ni gole mai ena kena vakaoqo, ni sega na vosa e matau, na matavuvale e “uasivi sara.” Au sega ni vosa baleti ira ga na itabagone sa yaco vei ira na nodra itubutubu na mate, sere, se luluqa ni vakabauta, ia o ira talega na tini vakaudolu na cauravou kei na goneyalewa e vuravura raraba era sa ciqoma na kosipeli ni sega tu ni gole mai o tinadra se tamadra vata kei ira ki na Lotu.4
O ira na gone Yalododonu Edaidai era curu ena Lotu ena vakabauta cecere. Era nuitaka tu mera tauyavutaka ki na nodra dui bula ni matavuvale dodonu ena veisiga ni mataka.5 Toso na gauna, era sa na tiki bibi ni mataivalu daukaulotu, gone qase cake valavala dodonu, kei ira era na tekiduru ena icabocabo ni soro mera tekivutaka nodra dui matavuvale.
Qaqarauni
Eda na tomana tiko na vakavulici ni ituvatuva ni Turaga baleta na matavuvale, ia oqo ni sa milioni na lewenilotu, kei na duidui ni gone ena Lotu, sa gadrevi meda qaqarauni sara ka yadra tiko. Na noda ivakarau ni Lotu kei na kena veivosa sa cecere sara. Ena sega ni oti nodra lagata na gone ena Lalai na “Rawa Ni Tawamudu Na Vuvale,”6 ia ni ra sa lagata na, “I’m so glad when daddy comes home”7 se “with father and mother leading the way,”8 sega ni gone taucoko era na lagata na veika ni nodra matavuvale.
A wasea neitou itokani o Bette na kena yaco e dua na ka ena lotu ni se yabaki 10: “A wasea tiko o neimami qasenivuli na vakamau e valetabu. A tarogi au mai vakadodonu, ‘Bette, rau a sega ni vakamau na nomu itubutubu ena valetabu, se vavei?’ Era sa kila tu [o noqu qasenivuli kei na lewe ni kalasi] na kena isau.” A tarava sara na lesoni nei qasenivuli, ka sa nuiqawaqawa o Bette. A kaya o Bette, “E vuqa na bogi au a tagi. Ni mai tauvi au na malumalumu ni uto ni oti e rua na yabaki au nanuma niu sa na mate, au sa veilecayaki, kau vakasamataka niu sa na tiko duadua sara ga vakadua.”
A gole ga vakai koya na noqu itokani o Leif ki lotu. Ena Lalai, a kerei me dua na nona vosa lekaleka. E sega o tamana se tinana me tu vata kei koya ka vukei koya ke mani guilecava na ka me cavuta. A rere o Leif. Me kua kina ni madua, sa sega kina ni mai lotu me vica na vula.
“A sa kaciva mai e dua na gone lailai ko Jisu ka vakatura ena kedra maliwa …
“Ka sa [kaya] ko koya yadua sa vinakata e dua na gone lailai vakaoqo ena vuku ni yacaqu, sa vinakati au.”9
Yalo vakabauta kei na iSolisoli Vakayalo
Era sa kune kalougata na gone kei ira na itabagone ena yalo vakabauta kei na isolisoli vakayalo titobu. A kaya vei au o Leif, “Au sa kila taumada vakavinaka ni Kalou sa Tamaqu ka sa kilai au ka lomani au.”
E kaya na noda itokani o Veronique, “Niu sa vulica na ivakavuvuli ni kosipeli ka vulica na iVola i Momani, sa vaka meu nanuma lesu na veika au sa kila tiko ia au sa mai guilecava ga.”
Na neitou itokani o Zuleika e tadu mai Alegrete, Brazil. Dina ga ni ratou sega ni daulotu na nona matavuvale, a tekivu wilika na iVola Tabu ni se yabaki 12 o Zuleika ka sikova na veilotu e kea, nona vakasaqara me kila vakalevu cake na Kalou. Dina ni rau a rivabitaka nona itubutubu, a vuli vata kei rau na daukaulotu, rawata nona ivakadinadina, ka papitaiso. A kaya vei au o Zuleika, “Niu sa vuli tiko, sa vakaraitaki vei au na itaba ni Valetabu e Salt Lake ka tukuni vua na cakacaka vakalotu ni veivauci. Mai na gauna o ya, au sa gadreva meu na curu ki na Vale ni Turaga ka me dua na noqu matavuvale tawamudu.”
Dina ni na sega baka ni dodonu sara nona bula e vuravura e dua na gone, ia e tudonu na nona dra vakayalo baleta ni nona ivakadinadina bula e dua o ya ni sa luvena tagane se yalewa na Kalou.
E kaya o Peresitedi Thomas S. Monson: “Mera vukei na luve ni Kalou mera kila vinaka na veika e dina ka bibi ena nodra bula. Vuki ira mera vakatorocake taka nodra kaukauwa mera digitaka na salatu ena vukea mera taqomaki yani ena sala ki na bula tawamudu.”10 Meda dedeka vakalevu cake na ligada kei na yaloda. O ira na itabagone era gadreva noda gauna kei na noda ivakadinadina.
A lewena o Brandon, na Lotu mai Colorado ena koronivuli torocake, ka tukuni ira vei au era a dodoliga vua ni bera nona papitaiso vakakina ni sa oti. A kaya, “Au a tiko ena veimatavuvale era bulataka na kosipeli. A vakaraitaka vei au na itagede au vakila ni rawa me tiko ena noqu matavuvale vakai au.”
A sucu o Veronique, mai Netherlands, ka vuli vata kei luvequ yalewa o Kristen ni keitou vakaitikotiko mai Jamani. A kaya o Veronique, “Ira na gonevuli era lewe ni Lotu e tu vei ira na rarama. Au sa qai kila ni rarama o ya e tadu mai na nodra vakabauti Jisu Karisito ka bulataka na Nona ivakavuvuli.”
A papitaiso noqu itokani o Max ni se yabaki walu. A sega ni lewena e dua na lotu o tamana, ka so na gauna e dau lako se sega ni rawa ni lako i lotu o Max.
Ni se cauravou, ka sega tu ni lotu me vica na vula, a vakila o Max ni sa gadreva me lesu ki lotu ka sa lomana me laki lotu ena dua na mataka ni Sigatabu. Ia a malumalumu nona inaki ni sa tu e matani valenilotu, ka sa tekivu veilecayaki.
Sa tu cake tu e matani katuba na bisopi vou. A sega ni kilai koya o Max, ka vakadeitaka ni sega ni kilai koya o bisopi. Ni voleka yani o Max, e ramase mai na matai bisopi, ka dodoka mai na ligana ka kaya, “Max, au taleitaka niu raici iko!”
“Ni sa cavuta oqori,” a kaya o Max, “sa curumi au e dua na yalovinaka cecere kau sa kila niu sa cakava na ka e dodonu.”11
Noda kila na yacana e dua e na vakayaco veisau.
“A sa kaya [o Jisu] mera kau [mai vua] na gone lalai. …
“A sa … keveti ira yadua na gone lalai, ka vakalougatataki ira, ka masulaki ira vei Tamana.
“A sa tagi ni sa vakalougatataki ira oti.”12
iTabagone Era se Bera ni Papitaiso
Ena nodra kerekere na itubutubu, e vuqa na itabagone era lomana na kosipeli era wawa ka vica vata na yabaki mera qai papitaiso.
Rau a sere na itubutubu nei Emily ni se gone lailai, ka sega ni vakadonui me papitaiso me yacova ni sa yabaki 15. E vakacerecerea o neitou itokani o Emily e dua na iliuliu ni Goneyalewa e “dau dodoliga yani ka vukea me qaqaco na [nona] ivakadinadina.”13
E rau itabagone tiko mai Utah o Colten kei Preston. Rau sa sere na nodrau itubutubu, ka sega ni soli na veivakadonui me rau papitaiso. Dina ga ni rau sega ni vota yani na sakaramede, ia e rau kauta mai na madrai ena veimacawa. Dina ga ni rau sega ni curuma rawa na valetabu me rau caka papitaiso vata kei ira na itabagone ni gole kina na nodrau tabanalevu, rau a vakasaqara mai na veitacini oqo na yaca ni matavuvale era toka tikivi rau ena valenivolavola ni tuva kawa. Na veivakauqeti cecere duadua ni nodra vukei na itabagone mera vakila nodra sa okati o ya o ira na itabagone buladodonu.
Elder Joseph Ssengooba
Meu tinia ena ivakaraitaki ni dua na itokani vou, e dua a keirau sotava ena vica na macawa sa oti mai na Tabana ni Kaulotu e Zambia Lusaka.
O Elder Joseph Ssengooba e lako mai Uganda. A mate o tamana ni se qai yabaki vitu. Ni sa yabaki ciwa, e sega ni qaravi koya rawa na tinana kei ira na wekana, sa bula ga vaka ikoya. Ni sa yabaki 12, a sotavi rau na daukaulotu ka papitaiso sara.
A kaya oqo vei au o Joseph na imatai ni nona siga e valenilotu: “Ni sa oti na soqoni ni sakaramede, au nanuma ni sa gauna ni suka i vale, ia rau a vakalululutaki au na daukaulotu vei Joshua Walusimbi. A kaya vei au o Joshua ni sa na noqu itokani, ka solia vei au e dua na Sere ni Lalai me kua niu ligalala yani ki na Lalai. Ena Lalai, a mai biuta sara o Joshua e yasana e dua na idabedabe. A sureti au ki liu o peresitedi ni Lalai ka kerea na Lalai taucoko mera lagata vei au ‘Au Luve ni Kalou.’ Au vakila niu taleitaki dina.”
A kauti Joseph o peresitedi ni tabana ki na matavuvale na Pierre Mungoza, ka me vakaitikotiko e kea me va na yabaki e tarava.
Ni oti e walu na yabaki ni sa tekivu kaulotu o Elder Joseph Sengooba, a kurabui ni a mai nona dauveituberi o Elder Joshua Walusimbi, na cauravou a vakaitaukenitaki koya ena imatai ni siga ena Lalai. Ka nona peresitedi ni kaulotu? O ya o Peresitedi Leif Erickson, na cauravou lailai a sega ni via tiko ena Lalai baleta ni rerevaka me vosa. Na Kalou sa lomani ira na Luvena.
The Children Came Running
Ena vica na macawa sa oti ni keirau a tiko kei Kathy mai Aferika, keirau a gole ki Mubji-Mayi, na Matanitu Tu Vakataki Koya o Congo. Baleta ni sega ni ka levu sara na valenilotu me rauti ira e 2,000 na lewenilotu, keimami a qai soqoni e tautuba ena ruku ni tavuleni lelevu ka duru bitu. Ni tekivu na soqoni, keimami raica ni so na gone era vakawadravi keimami tiko mai, era ququmi toka ena itautauri kaukamea ni bai e tuba e wavokita na itikotiko o ya. A vakasolokakana mai o Kathy, “Neil, o vinakata beka mo sureti ira na gone mera curu mai loma?” Au a lako yani vei peresitedi ni tikina o Kalonji ena itutu ni vunau ka kerei koya ke rawa ni sureti ira mai na gone era tiko e taudaku ni bai.
Au kurabui, ena nona sureti ira o Peresitedi Kalonji, era a sega walega ni lako mai na gone era sa cici mai—sivia na 50, rauta beka na 100—so era vakaisulu makawa ka sega na ivava ia era dredre mai ka matamamarau.
A tarai au sara ga na ka oqo kau raica ni sa ivakatakilakila ni sa gadrevi meda dodoliga yani vei ira na itabagone era galili tu, guilecavi, se tiko e taudaku ni bai. Meda sa qai nanumi ira, kidavaki ira, ka mokoti ira, ka cakava na ka kece me qaqaco nodra lomana na iVakabula. A kaya o Jisu, “Ia ko koya yadua sa vinakata e dua na … gone lailai vakaoqo ena vuku ni yacaqu sa vinakati au.”14 Ena yaca i Jisu Karisito, emeni.