Na Cava Meda Cakava?

Mai vei Neill F. Marriott

Karua ni Daunivakasala ena Mataveiliutaki Raraba ni Goneyalewa

Eda tara na matanitu ni da susugi ira cake eso tale. Eda tara cake tale tikoga na matanitu ni da tukuna ka vakadinadinataka na dina.

Ni oti toka ga na Tucake Tale kei na Kaucake nei Jisu, a vakavulica vakaoqo na iApositolo o Paula, “Me kila sara kina … na mataqali taucoko, ko koya dou a vakota kina kauveilatai, sa lesia na Kalou me Turaga ka Karisito.” Ia ni ra sa rogoca, sa laucoka na yalodra, a ra sa kaya vei Pita kei ira na iapositolo sa vo, “Oi kemudou na veiwekani, a cava me keimami kitaka?”¹ A ra sa muria sara yani ena yalomarau na ivakavuvuli i Pita.

Ni mataka sa Sigatabu ni Siganimate, kau nuitaka ni sa laucoka talega na yaloda meda ciqoma na iVakabula, veivutuni, ka talairawarawa ena yalomarau.

Ena koniferedi raraba oqo eda na rogoca mai vei ira na iliuliu ni Lotu, na marama kei na turaga na veidusimaki veivakauqeti. Ena noqu kila ni na tara na yaloda na nodra vosa, au tarogi kemuni na Marama kei na tacida ena bogi nikua, na cava meda cakava?”

Na peresitedi raraba ni iSoqosoqo ni Veivukei, o Eliza R. Snow a vakaraitaka vakaoqo vei ira na veitacini ena voleka ni 150 na yabaki sa oti, “Sa biuta tu vei keimami na Turaga e dua na itavi cecere.”² Au vakadinadinataka ni se dina tikoga nikua na itukutuku oya.

Sa gadrevi ena Lotu ni Turaga na marama dusi ena Yalotabu era vakayagataka na nodra dui taledi mera susuga, ka vosa cake mai, me ra taqomaka na dina ni kosipeli. Era sa tiki bibi sara ni tarai ni matanitu ni Kalou na veisolisoli kei na taledi e tu vei keda, ka kena ibalebale dina na noda cakava na noda itavi ena nodra vakabulai na luve ni Kalou.

Tara na Matanitu ena Veisusu

Kemuni na taciqu, eda tara na matanitu ni da susugi ira cake eso tale. Ia na matai sara mada ga ni luve ni Kalou meda tara cake ena kosipeli vakalesui mai, sa ikeda. A kaya o Emma Simici: “Au gadreva me kilai au ka kila vinaka sara na veika baleti au na Yalo ni Kalou, me rawa niu ulabaleta rawa kina na ituvaki na ivakarau se ituvaki cava ga ka rawa me na vakalatilati ki na noqu vakacerecerei.”³ Sa dodonu, meda tara cake e dua na yavuvatu ni vakabauta ena kosipeli ni iVakabula ka toso ki liu, ka vakaukauwataki ena veiyalayalati ni valetabu, ki na vakacerecerei.

Vakacava ke sega na kena vanua e so noda itovo vakavanua ena kosipeli vakalesuimai i Jisu Karisito? Na kedra biu laivi yani ena rawa ni vakavuna na veitokoni kei na veisusu ni dua tale, me vaka a yaco vei au.

Ena noqu a sucu, rau a tea e dua na vuni magnolia na noqu itubutubu me rawa ni na vakayagataki ena soqo ni noqu vakamau na senimagnolia, ka vakayacori ena nodra valenilotu ni Protestant na tukaqu. Ia, ena siga au a vakamau kina, erau a sega e yasaqu na noqu itubutubu ka sega na senimagnolia, me vaka niu dua na saumaki vou mai, yabaki dua ena Lotu, au a gole yani ki Salt Lake City, Utah, meu ciqoma kina noqu edaumeni ni valetabu ka vauci vei David, na noqu itau.

Ena noqu biuti Louisiana ka volekati Utah yani, a tuburi au mai e dua na yalo ni tamata sega ni vakavale. Ni bera na vakamau, au sa na vakaitikotiko kei bui David vakacabecabe, ka kilai me o Nei Carol.

Au mai tu yani oqo, koi au e dua na vulagi e Utah, meu laki vakaitikotiko ena vale ni dua au vulagi kina ni bera niu laki vauci—tawamudu—ki na dua na matavuvale au sega ni kilai ratou vinaka sara. (Vinaka ga niu nuitaki koya me na watiqu vakakina na Turaga!)

Ena noqu duri tu ena katuba eliu ni vale nei Nei Carol, au a via kino. A tadola mai na katuba—Au a tucake tu vaka e dua na rapete vakarerei—ia o nei Carol, sega ni vosa, dodoka mai na ligana ka ovici au yani ena ligana ruarua. E sega na luvena vakaikoya, a kila—ni a kila na yalona dauveisusu—niu gadreva tu e dua na vanua meu wili kina. Isa, na totoka kei na kamica ni miniti oya! A seyavu yani na noqu rere, ka basika mai vei au ekea e dua na yalo ni takasa ena dua na vanua au na maroroi vinaka kina vakayalo.

Na loloma sai koya na vagalalataki ni dua na tikina ena nomu bula me baleta e duatale, me vaka e a cakava vei au o Nei Carol.

Era dau solia na tina e dua na tikina ena yagodra mera susuga cake kina e dua na gone kunekunetaki—ka nuitaki ni na dua na tikina e yalodra ni ra susugi ira cake—ia na veisusu e sega ni yalani ga ena vakasucumi ni gone. A vakatokai me dua na “tina” o Ivi ni bera ni vakaluveni.⁴ Kau vakabauta “mo vakaluveni” e kena ibalebale “mo solia na bula.” Vakasamataka mada na veisala o rawa ni solia kina na bula. O ya e rawa ni o solia na inuinui vua sa yalolailai se na bula vakayalo vua sa vakatitiqa. Ena veivuke ni Yalo Tabu, eda na rawa ni vakarautaka e dua na vanua ni vakabulai ni nodra vakasama na vakaduiduitaki, na vakanadakui, vulagi. Ena veisala malua ia qaqa eso oqo, eda tara kina na matanitu ni Kalou. Kemuni na taciqu, a soli kece mai vei keda na isolisoli ni soli-bula, veisusu, kei na veiqaravi vakatina me vaka ni oqori sa nona ituvatuva na Kalou.

Na muri ni Nona ituvatuva kei na noda yaco me da dautara matanitu sa gadrevi kina na solibula e veinanumi. A vola vakaoqo o Orson F. Whitney: “Na veika kece eda sotava kei na veika kece eda vorata, vakabibi ni da vorata vakadede, … e vakasavasavataka na yaloda … ka vakavuna meda yalomalua ka dausolisoli cake vakalevu, … ia mai na … veika dredre kei na mosi, eda vuli rawa kina … lea o le a tatou avea atili ai e pei o lo tatou Tama ma Tina i le lagi.”⁵ Na veivakatovolei veivakasavasavataki vakaoqo, e kauti keda vei Karisito, o koya ka rawa ni vakabulai keda ka cakava meda yaga ena cakacaka ni veivakabulai.

Tarai ni Matanitu ena Vosa kei na iVakadinadina

Eda tara cake tale tikoga na matanitu ni da tukuna ka vakadinadinataka na dina. Eda muria na nona ituvatuva, na Turaga. E veivakavulici ena kaukauwa kei na lewa ni Kalou. Kemuni na taciqu, e rawa talega vei keda. Eda dau taleitaka na vakasoqonivata ka veitalanoa na marama! Ni da cakacaka ena lewa lesi vakamatabete sa soli vei keda, na vosa kei na vakasoqonivata ena buroro yani me veivakavulici ka veiliutaki ena kosipeli.

A vakavulica o Sisita Julie B. Beck, peresitedi raraba vakacegu ni iSoqosoqo ni Veivukei: “Na kena rawati me ciqomi, ka cakacakataki na ivakatakila yadudua sa ikoya na kila ka bibi duadua ka rawa ni yacovi ena bula oqo. … Sa gadrevi kina na sasaga ni lewa eloma.”⁶

Na ivakatakila yadudua mai vua na Yalo Tabu ena dau vakauqeti keda meda vuli, vosa, ka cakacaka ena veidina tawamudu—na veidina ni iVakabula. Na levu ni noda muri Karisito, na levu ni noda na vakila na Nona loloma kei na veidusimaki; na levu talega ni noda vakila na nona loloma kei na nona veidusimaki, na levu ni noda vinakata me da vosataka ka vakavulica na dina me vaka e kitaka o Koya, ena gauna mada ga eda sotava kina na veisaqasaqa.

Vica na yabaki sa oti, au a masulaka na ivakatakila meu taqomaka na bula vakatina ena noqu ciqoma e dua na qiri tawakilai.

A taroga o koya e qiri tiko mai, “O iko beka o Neill Marriott, na tina ni dua na matavuvale levu?”

Au a sauma yani ena yalomarau, “Io!” ka namaka me kaya mai vakaoqo, “Oi, totoka qori!”

Ia sega! Au na sega vakadua ni guilecava na kena isau ni a kuruseta mai na talevoni na nona vosa: “Au rarawataka vakalevu saraga na nomu kau gone tiko mai ki na na vuravura vutucoqa oqo!”

“Oi,” au tiloqata yani, “au raica rawa nomu nanuma.”

A qolouvaka mai, “Sega—o sega saraga!”

Au tagicaka yani, “Ia, au sega beka.”

A vosataka vakaukauwa na noqu digidigi cala meu dua na tinanigone. Ni tomana tiko, au masulaka yani na veivuke ka gole mai vei au e dua na vakasama malumu: “Na cava beka ena tukuna vua na Turaga?” Au vakila niu sa butu tu ena vanua kaukauwa kau yalodei mai ena vakanananu kei Jisu Karisito.

Au sauma yani, “Au marautaka niu dua na tina, kau yalataka niu na cakava na ka kece sara ena noqu kaukauwa taucoko meu susugi ratou cake na luvequ ena dua na sala ka rawa ni vanua vinaka cake kina o vuravura.”

A sauma mai, “Oi, au nuitaka mo na cakava vakakina!” ka biuta yani na talevoni.

E sega soti ni dua na ka levu—kau a duri toka ga yani ena veimaroroi ni noqu loma ni valenikuro! Ia ena noqu sala lailai ga vakaiau a rawa vei au meu vosa maroroya na matavuvale kemuni na tina kei na dauveisusu baleta e rua na ka: (1) niu kila ka vakabauta na ivunau ni Kalou me baleta na matavuvale, kei na (2) kau masulaka na vosa meu tukuna na dina oqo.

Na noda kilai tani ka duidui mai vei vuravura ena vakavuna eso na vakalelewa, ia e dodonu meda yavutaki keda ena so na ivakavuvuli tawamudu ka vakadinadinataki ira, veitalia na ka e kaya o vuravura.

Ni da tarogi keda, “Na cava meda cakava?” meda vakanananutaka mada vakatitobu na taro oqo: “Na cava sa dau nona cakacaka tu ga na iVakabula?” E dau veisusu. E dau veibuli. E dau vakauqeta na tubu kei na vinaka. Kemuni na marama kei na taciqu, eda rawa ni cakava talega oqori! Kemuni na goneyalewa ena Lalai, e tiko e dua ena nomuni matavuvale e gadreva na nomuni loloma kei na veikauwaitaki? O ni tara cake na matanitu ena nomuni maroroi ira eso tale.

Na Nona bulia na vuravura na iVakabula, ena veidusimaki nei Tamana, e dua na ivalavala qaqa ni veisusu. E vakarautaka e dua na vanua me da tubu kina ka tara cake na vakabauta ena Nona kaukauwa ni veisorovaki. Na vakabauti Jisu Karisito kei na Nona Veisorovaki sai koya na vanua ni veivakabulai kei na inuinui, tubu kei na inaki. O keda yadua eda gadreva e dua na vanua vakayalo kei na vanua vakayago me da wili kina. O keda, na marama ena itabayabaki kece e rawa ni da bulia oya; e vanua tabu mada ga.

Na noda itavi cecere duadua sa ikoya meda marama daumuria na iVakabula, veisusugi ena veivakauqeti, ka bulataka ena yaloqaqa na dina. Ni da kerei Tamada mai Lomalagi me da dautara Nona matanitu, ena drodrovi keda na Nona kaukauwa ka da na kila na sala meda veisusu kina, ka yaco meda vakataki rau na noda itubutubu vakalomalagi. Ena yaca i Jisu Karisito, emeni.